Yesu Odhi Chiemo e Od Ja-farisai Moro

Ka pod Yesu ni Judea, Ja-Farisai moro gwele mondo odhi ochiem e ode. Nenore ni en chiemb odiechieng’ to ok modhiambo. (Luka 11:37, 38; pim gi Luka 14:12.) Jo-Farisai ne nigi tim mar logo nyaka e okumbo ka pok gichiemo. Yesu to ok tim kamano. (Mathayo 15:1, 2) En adier ni logo kamano ne ok en gima rach. Kata kamano, Chik Nyasaye ne ok wach ni ji otim kamano.

Ja-Farisaino wuoro ahinya ni Yesu ok log kaka gin. Yesu fwenyo mano kendo owachonegi niya: “Koro un Jo-Farisai, ulwoko ng’e okombe kod san to e iu upong’ gi ich-lach kod gik maricho. Un joma pachgi ok ni kare! Ng’at ma noloso ng’eye, donge noloso iye bende, koso?”​—Luka 11:39, 40.

Gima duong’ ma Yesu kwedo en wuondruok margi e nyim Nyasaye, to ok bedo gi lwedo maler ka pok gichiemo. Jo-Farisaigo kod jomamoko ma logo nyaka e okumbo kamano ok gol gik maricho e chunygi mondo gibed maler. Kuom mano, Yesu rieyo pachgi kama: “Chiwuru mich mag konyo jochan kowuok e chunyu, kendo neuru! ubiro bet maler e gik mamoko duto.” (Luka 11:41) Mano kaka wechego gin adier ndi! Ng’ato onego ochiw mich koa e chunye, to ok temo ni omor ji ka owuondore ni en ng’at makare.

Yesu ok tem wacho ni jogo ok gin jochiwo. To gima owacho en ma: “Uchiwo achiel kuom apar mar mint, kod rue, gi kit alode mamoko duto, to usejwang’o tim makare kod hero Nyasaye! Nonego utim gigo, to ok ni koro ujwang’ gik mamokogo.” (Luka 11:42) Chik Nyasaye ne dwaro ni ji ogol achiel kuom apar mag cham. (Rapar mar Chik 14:22) Chiwogo noriwo mint, gi rue, kod alode mamoko ma ne itiyogo e medo ndhadhu e chiemo. Jo-Farisai ne luwore gi weche ma tindotindo sama gichiwo gik ma kamago. To nade kodok korka weche ma dwarore moloyo mag Chik, kaka tim makare kod bedo joma muol e nyim Nyasaye?​—Mika 6:8.

Yesu medo wacho kama: “Yaye nobednu malit un Jo-Farisai nikech uhero kombe ma nyime e sunagoke kod mos e chirni! Yaye nobednu malit nikech uchal gi liete ma wang’ ok ne malong’o ma ji wuothoe ka ok ging’eyo!” (Luka 11:43, 44) En adier ni ng’ato ne nyalo chwanyore mi olwar e liete ma kamago kae to odoko ma ok ler ka luwore gi Chik. Yesu tiyo gi wach ma ji ong’eyono mondo onyisgo ni Jo-Farisai ok ler, kata obedo ni mano ok nenre ne ji ayanga.​—Mathayo 23:27

Kae to ng’at moro molony e weche manie Chik Nyasaye ng’ur kama: “Japuonj, sama iwacho wechego, wan bende iyanyowa.” Ber mondo joma kamago ofweny ni onego gikony ji, to e ma ok gitim kamano. Yesu wachonegi niya: “Yaye nobednu malit un bende ma ulony e Chik nikech uketo ne ji ting’ ma ting’o tek, to un uwegi ok umul ting’go kata gi achiel kuom lith lweteu! Yaye nobednu malit nikech ugero liete jonabi, to kwereu e ma nonegogi!”​—Luka 11:45-47.

Chike ma tindotindo ma Jo-Farisai osemedo ka gilerogo Chik Nyasaye e yo mobam, e ting’ ma ting’o tek ma Yesu wuoyoe. Kar mondo jogo oket ngima obed mayot ne oganda, gin giramo ni ji nyaka dhi nyime rito chike ma turogi. Kweregi nonego jonabi mag Nyasaye chakre Abel ka dhi nyime. To koro gin sani gigero liete ka giwuondore ni gimiyo jonabigo duong’, kendo mano miyo ginyiso kido ma kweregi ne nigo kendo gitimo kaka kweregi notimo. To gidwaro kata mana nego Yesu ma en Janabi maduong’ie moloyo. Yesu wacho ni Nyasaye biro ng’ado ne tieng’ni bura. To mano e gima ne otimore higni 38 bang’e e higa mar 70.

Yesu medo wacho kama: “Yaye nobednu malit un ma ulony e Chik nikech ne umayo ji ofungu mar ng’eyo Nyasaye. Un uwegi ne ok udonjo, to joma dwaro donjo bende ugeng’onegi!” (Luka 11:52) Joma onego obed ni konyo ji ng’eyo tiend Wach Nyasaye, e joma tero ji mabor gi thuolo mar ng’eyo Wach Nyasaye kendo winjo tiende.

Jo-Farisai gi jondiko timo nang’o bang’ winjo mano? Sama Yesu wuok mondo odhi, gichako kwede gi mirima ka girake gi penjo modhuro. Ok gipenj Yesu kamano ka gima gidwaro ni opuonjgi. Kar mano, gipenje nikech gidwaro ketone obadho ma nyalo miyo owach gimoro ma dimi gimake.