In Jarit Mogen, Bed Moikore!

Yesu oa lero ni “kueth matin” kende e ma biro yudo pok e Pinyruodh polo. (Luka 12:32) Kata kamano, mano ok en pok ma ng’ato onego okaw mayot. Adier en ni Yesu medo jiwo gimomiyo dwarore ni ng’ato obed gi paro mowinjore mondo oyud pok e Pinyruodhno.

Omiyo, Yesu jiwo jopuonjrene ni gibed moikore ne duoke. Owachonegi kama: “Rwakreuru kendo beduru moikore, bende teyni magu obed ka liel, kendo onego ubed kaka joma rito ruodhgi monego oduog koa e nyasi mar kend, mondo sama obiro mi odwong’o, giyawone mapiyo. Wasumbni mamor gin mago ma ka ruodhgi obiro to oyudogi ka gineno!”​—Luka 12:35-37.

Jopuonjrego nyalo fwenyo mayot paro ma Yesu dwaro ni gibedgo ka luwore gi ranyisi mochiwono. Wasumbni ma Yesu wuoyoego oseikore kendo girito ruodhgi mondo oduog. Yesu lero kama: “Ka [ruodhgi] obiro e arita mar ariyo [chakre kar sa ochiko odhiambo nyaka sa auchiel otieno], kata mana e mar adek [chakre sa auchiel otieno nyaka kar sa ochiko otieno], moyudogi ka giikore, gin joma mor!”​—Luka 12:38.

Wach ma Yesu wuoyoe e ranyisino ok en mana jiwogi mondo gibed jotich ma jokinda e od ng’ato. Mano nenore maler e yo ma Yesu owuon nyisogo ni odhi biro, nimar oluongore ni Wuod dhano e ranyisino. Owacho ne jopuonjrene niya: “Un bende beduru moikore, nikech e sa ma ok upar ni nyalore, e ma Wuod dhano biroe.” (Luka 12:40) Mano nyiso ni Yesu dhi biro e kinde moro nyime. Odwaro ni jolupne, to moloyo jogo manie “kueth matin,” obed moikore.

Petro winjo tiend gima Yesu wacho e yo maler. Omiyo, openje kama: “Ruoth, be wan e ma igoyonwa ngeroni kendwa, koso ne ji duto bende?” Yesu ok dwok Petro achiel kachiel. Kar mano, ochiwo ranyisi niya: “En ng’a ma kuom adier e jarit mogen, kendo mariek, mochung’ ne mwandu mag ruodhe, ma ruodhe biro keto e wi jotije duto mondo odhi nyime miyogi chiembgi e kinde mowinjore? Misumba mamor en mano ma ruodhe kobiro to yude kotimo kamano! Adier awachonu ni, obiro kete e wi gige duto.”​—Luka 12:41-44.

E ranyisi motelo ne mano, onge kiawa ni ‘ruoth’ miwuoyoe ochung’ ne Yesu ma e Wuod dhano. Kuom mano, “jarit mogen” gin moko kuom “kueth matin” mibiro mi Pinyruoth. (Luka 12:32) Gima Yesu wacho kae en ni nitie joma nie grubno ma biroga miyo ‘jotichne duto chiembgi e kinde mowinjore.’ Omiyo, Petro kod jopuonjre mamoko ma Yesu e ma koro puonjo kendo pidho gi chiemb chunygo, nyalo fwenyo ni nitiere kinde nyime ma Wuod dhano dhi biroe. Kendo chenro biro betie e kindeno mar pidho ‘jotij Ruoth duto’ gi chiemb chuny, tiende ni jolup Yesu.

Yesu temo nyiso e yo machielo gimomiyo dwarore ni jopuonjrene obed motang’ kendo gibed gi paro mowinjore. Mano en nikech yot mondo ng’ato obed jasamuoyo, mi chop kata kama okwedoe jowetene. Yesu wacho kama: “To ka misumbano nyalo wacho e chunye ni, ‘Ruodha odeko chopo,’ mi ochako goyo jotich ma chwo kod ma mon, kae to ochiemo, kendo ometho, kendo omer, ruodh misumbano biro chopo e chieng’ ma ok opar kendo e sa ma ok ong’eyo, kendo obiro miye kum magerie moloyo, kae to omiye pok gi joma ok oyie.”​—Luka 12:45, 46.

Yesu wacho ni gimomiyo obiro en “moko mach e piny.” Kendo osemoko majno gadier. Osetimo kamano kuom puonjo ji kendo timo gik ma miyo ji bedo gi ywaruok mager. To mano osegolo puonj mag miriambo kod kit timbe mag joma chon. Puonjgo pogo kata joma inyalo par ni ok onego obed gi pogruok kaka: “wuoro gi wuode, kendo wuowi gi wuon-gi, miyo gi nyare, kendo nyako gi min-gi, min wuowi kod chi wuode, kendo chi wuowi gi min chwore.”​—Luka 12:49, 53.

Joma Yesu dwaro ni owinj wechego ahinya gin jopuonjrene. Kae to Yesu chako wuoyo gi oganda. Thoth ji osebedo ka kwedo gik ma nyiso ni Yesu e Mesia. Omiyo, owachonegi kama: “Ka uneno bor polo koting’ore yo imbo, gie sano uwacho ni, ‘Kodh yamo mager biro,’ to timore kamano. To ka uneno ka yamb milambo kudho, uwacho ni, ‘Piny biro bedo maliet ahinya,’ to timore. Un joma wuondore, ung’eyo nono kaka kit piny gi polo chal, to obet nade ni ok ung’eyo nono kinde ma sani?” (Luka 12:54-56) Nenore ayanga ni pok giikore.