Wuod Dhano Biro Fwenyore

Nyalo bedo ni Yesu pod ni e alwora mar Samaria kata Galili. Koro Jo-Farisai penje e wi biro mar Pinyruoth, ma en gima gigeno ni biro timore e yo malich kendo miwuoro. Kata kamano, owachonegi kama: “Pinyruodh Nyasaye ok bi e yo ma nenore malich miwuoro; kata ji ok bi wacho ni, ‘Neuru en ka!’ kata ni, ‘En kacha!’ Nikech neuru! Pinyruodh Nyasaye ni e dieru.”​—Luka 17:20, 21.

Wechego nyalo miyo jomoko opar ni Yesu wacho ni Pinyruoth locho e chuny jotich Nyasaye. Adiera en ni mano en gima ok nyalre, nimar Pinyruoth ok ni e chuny Jo-Farisai ma e ma Yesu wuoyogo kanyo. Kata kamano, Pinyruoth ni e diergi nikech Yesu ma e Ruodh Pinyruodh Nyasaye, ni mana kodgi kanyo.​—Mathayo 21:5.

Nenore ni bang’ ka Jo-Farisai osea, Yesu medo lero weche mamoko ne jopuonjrene e wi biro mar Pinyruodhno. Yesu chiwo siem e wi kinde ma biro yudo ka entiere e kom-loch mar Pinyruoth. Owacho kama: “Kinde biro ma unugomb nenoe chieng’ achiel kuom ndalo mag Wuod dhano, to ok ununene.” (Luka 17:22) Yesu temo nyiso ni loch ma Wuod dhano nobedgo e Pinyruoth en gima notimre e kinde ma biro. Ka kindeno pok ochopo, nitiere jopuonjre moko ma nyalo gombo neno Pinyruodhno. Kata kamano, biro chuno ni gidhi nyime rito nyaka chop kinde ma Nyasaye owuon oseketo mondo Wuod dhano obie.

Yesu medo wacho kama: “Ji nowachnu ni, ‘Neuru, en kacha!’ kata ni, ‘En ka!’ kik uwuog oko kata lawo bang’gi. Nikech mana kaka mil polo rieny koa konchiel e polo nyaka komachielo, kamano e kaka odiechieng Wuod dhano nobed.” (Luka 17:23, 24) Ang’o ma biro konyo jopuonjre Yesu mondo kik giluwre gi mesia mag miriambo? Yesu wacho ni biro mar Mesia madier biro chalo gi mar mil polo ma en gima lerne rieny kama lach. Jogo duto ma nono gik moko e yo matut e ma biro fwenyo ayanga ranyisi ma nyiso ni Yesu nitie kendo osebet e kom-loch mar Pinyruodhno.

Kae to Yesu pimo birone gi gik moko ma ne osetimore chon mondo onyisgo kaka kit ji nochal e kinde ma birono. Owacho kama: “Mana kaka notimore e ndalo Noa, e kaka nobed e ndalo mag Wuod dhano . . . Kamano bende e kaka ne otimore e ndalo Lut: ji ne chiemo, ne gimetho, ne ging’iepo, ne giuso, ne gichuoyo, kendo ne gigedo. To chieng’ ma Lut nowuok e Sodom, mach gi salfa ne ochue koa e polo mokethogi giduto. Kamano e kaka nobed e chieng’ono ma Wuod dhano nofwenyree.”​—Luka 17:26-30.

Yesu ok tem wacho ni joma nodak e ndalo Noa kod Lut ne oketh nikech ne gichiemo, gimetho, ging’iepo, giuso, gipuro, kendo gigedo ma gin gik ma ji timoga e ngimagi mapile. Noa kod Lut kaachiel gi joodgi bende ne timo moko kuom gigo. Kata kamano, joma ne okethgo to ne timo gigo ma ok gidew timo dwach Nyasaye kata fwenyo ni ne gidak e kinde mage. Kuom mano, Yesu jiwo jopuonjrene mondo giket chunygi kuom dwach Nyasaye kendo neno ni dwach Nyasaye e ma gidichgo e ngimagi. Omiyo, onyisogi gima ka gitimo to gibiro tony mi gidhi nyime dak e kinde ma Nyasaye biro keloe kethruok.

Biro dwarore ni jopuonjrego owere gi “gik man chien” ma galo ji, tiende ni gik piny molworogi. Yesu wacho kama: “E chieng’no, ng’at manie wi tat ot to gige ni e i ot, kik olor piny mondo okawgi. Kamano bende, ng’at man oko e puodho kik dog ne gik man chien ngang’. Paruru chi Lut.” (Luka 17:31, 32) Chi Lut nolokore siro mar chumbi.

Ka Yesu dhi nyime lero gik ma biro timore e kinde ma Wuod dhano nobed ka locho kaka Ruoth, onyiso jopuonjrene niya: “E otienono ji ariyo nobed e otanda achiel; achiel nokaw to machielo nowe.” (Luka 17:34) Omiyo, jomoko ibiro res, to mamoko ibiro we kendo gibiro lalo ngimagi.

Jopuonjrego penje kama: “Ruoth, mano notimre kanye?” Yesu dwokogi niya: “Kama ringre gima otho nitie, kanyo bende e kama achudhe biro chokoree kanyachiel.” (Luka 17:37) Ee, jomoko biro bedo kaka achudhe ma wengegi neno mabor. Jopuonjrego biro chokore ir Kristo madier ma en Wuod dhano. E kinde ma birogo, Yesu biro puonjo jopuonjrene adiera ma nyalo reso ngima joma nigi yie.