Ka Yesu ni Jerusalem e Sawo mar Kiche

Yesu oseng’ere ahinya nyaka ne batise. Jo-Yahudi mang’eny oseneno honni motimo, kendo humb gik motimo osekere e pinyno duto. Sani to koro en Jerusalem e Sawo mar Kiche, kendo ji mang’eny manye.

Ji nigi paro mopogore opogore kuom Yesu. Jomoko wacho ni, “en ng’at maber.” To jomamoko wacho niya: “Ok en ng’at maber. Olalo oganda.” (Johana 7:12) Ji wacho wechego e odiechienge mokwongo mag sawono. To e ma onge ng’ato ma nigi chir mar wuoyo ayanga e lo Yesu. Mano en nikech thoth ji oluoro gima jotend Jo-Yahudi nyalo timonegi.

Sama sawono dhi nyime, Yesu donjo e hekalu. Ji mang’eny wuoro lony ma en-go e puonjo. Yesu ne ok osomo e skunde mong’ere mag jorabi. Omiyo, Jo-Yahudi wuoro ka giwacho kama: “Ere kaka ng’atni ong’eyo Ndiko kama to pok opuonjore e skunde?”​—Johana 7:15.

Yesu leronegi niya: “Weche ma apuonjo ok gin maga, to gin mag ng’at ma ne oora. Ka ng’ato gombo timo dwach Ng’atno, obiro ng’eyo kabe puonjgo oa kuom Nyasaye kata ka gik ma awacho gin moa kuoma awuon.” (Johana 7:16, 17) Weche ma Yesu puonjo luwore gi Chik Nyasaye. Omiyo, ji onego ong’e ni odwaro ni Nyasaye e ma oyud duong’, to ok en owuon.

Kae to Yesu wacho kama: “Musa nomiyou Chik, koso? To onge ng’ato kuomu ma timo kaka Chik dwaro. Ang’o momiyo udwaro nega?” Jomoko man e i ogandano ok ong’eyo ni nitie chenro ma kamano. Nenore ni jogo gin welo moa oko mar taon ma Jerusalem. Nyalo bedo ni giwuoro ahinya gimomiyo ng’ato nyalo dwaro nego japuonj ma nigi lony kamano. Omiyo, ging’ado ni Yesu nyalo wuoyo kamano mana ka nitie gimoro marach kode. Giwachone niya: “In gi jachien. En ng’a ma dwaro negi?”​—Johana 7:19, 20.

Adier en ni chiegni higa achiel gi nus motelo, jotend Jo-Yahudi ne dwaro nego Yesu kane ochango jal moro chieng’ Sabato. Yesu koro tiyo gi ranyisi moro ma miyo jogo paro matut kendo ma nyiso maler ni gin gi paro ma ok kare. Yesu nyiso jogo ni ka luwore gi Chik, nyathi ma wuowi onego oter nyangu e odiechieng’ mar aboro bang’ nyuolne, kata ka chieng’no en Sabato. Kae to openjogi niya: “Ka ng’ato itero nyangu chieng’ sabato mondo eka kik keth Chik Musa, ubedo nade gi mirima mager koda nikech asemiyo ng’ato ochango chuth chieng’ sabato? Weuru ng’ado bura gi kaka uneno ng’ato gi oko, to ng’aduru bura makare.”​—Johana 7:23, 24.

Joma odak Jerusalem mong’eyo gima ji dwaro timo ne Yesu wacho kama: ‘Donge ng’atni e jal ma [jotelo] dwaro nego, koso? To e ma pod neuru! owuoyo e lela, to onge gima giwachone. Dibed ni jotelo pok ong’eyo ni kuom adier ng’atni e Kristo, koso?’ Kare obet nade ni ji ok yie ni Yesu e Kristo? Giwacho: “Wang’eyo kama ng’atni owuokie; to ka Kristo obiro, onge ng’at ma biro ng’eyo kama owuokie.”​—Johana 7:25-27.

Yesu dwokogi ka en e hekalu kanyo niya: “Ung’eya kendo ung’eyo kama awuokie. Kendo ok asebiro kuom dwacha awuon, to Ng’atno ma ne oora en ng’at ma nitie adier, to ok ung’eye. An ang’eye, nimar asebiro e loye, kendo Ng’atno ne oora.” (Johana 7:28, 29) Ka Yesu osewacho weche ma achiel kachiel kamano, ji temo make. Nyalo bedo ni gidwaro tere e jela kata nege. Kata kamano, chenrogino ok timre nikech kinde ma Yesu thoe pok ochopo.

To pod ji mang’eny keto yiegi kuom Yesu, mana kaka onego gitim. Yesu osewuotho e wi pi, osekueyo yamo mager, osepidho ji gana gi gana e yor hono kotiyo mana gi makate kod rech manok, osechango joma tuore, osemiyo pudhe wuotho, oseyawo wenge muofni, osechango jodhoho, kendo osechiero kata mana jomotho. Kuom adier, ok en gima rach ka gipenjo niya: “Ka Kristo obiro, ok obi timo ranyisi madongo momedore moloyo ma ng’atni osetimo, koso?”​—Johana 7:31.

Bang’ winjo ka oganda wacho wechego, Jo-Farisai kaachiel gi jodong-jodolo oro askeche mondo gidhi gimak Yesu.