Wuod Nyasaye e “Ler mar Piny”

E odiechieng’ mogik mar Sawo mar Kiche, ma en odiechieng’ mar abiriyo, Yesu puonjo e hekalu, kama iluongo ni “kar keno.” (Johana 8:20; Luka 21:1) Nenore ni kanyo en Laro mar Mon, kama ji ketogae chiwogi.

Gotieno e kinde mar sawo, kanyo jabedoga gi ler ahinya. Teyni ang’wen madongo iketoga kanyo, kendo moro ka moro kuomgi bedoga gi besende madongo ang’wen mopong’ gi mafuta. Ler ma wuok e teynigo rienyga ahinya ka gimenyo alwora ma kanyo nyaka kama bor. Gima Yesu wacho koro nyalo paro ne joma winje wach teynigo. Owachonegi kama: “An e ler mar piny. Ng’ato ang’ata ma luwa ok bi wuotho e mudho ngang’, to obiro bedo gi ler mar ngima.”​—Johana 8:12.

Jo-Farisai kwedo wach ma Yesu oa wachono. Giwacho ne Yesu niya: “In ichiwo neno kuomi iwuon; nendi ok en adier.” Yesu dwokogi kama: “Kata ka achiwo neno kuoma awuon, nenda en adier, nikech ang’eyo kama nawuokie kod kama adhiye. To un ok ung’eyo kama ne awuokie kod kama adhiyoe.” Yesu medo wachonegi niya: ‘E i Chiku uwegi ondikie niya: “Neno ma ji ariyo chiwo en madier.” An achiwo neno kuoma awuon, kendo Wuora ma ne oora chiwo nenda.’​—Johana 8:13-18.

Nikech Jo-Farisai ok oyie gi weche ma Yesu wachonegigo, gipenje kama: “Wuoru ni kanye?” Yesu dwokogi moriere niya: “Ok ung’eya, bende ok ung’eyo Wuora. Ka da bed ni ung’eya, dikoro useng’eyo Wuora bende.” (Johana 8:19) Kata obedo ni pod Jo-Farisai dwaro ni omak Yesu, onge ng’at ang’ata ma mule.

Yesu nwoyo gima osewacho motelo niya: “An awuok adhi, kendo unumanya, to e ma pod unutho e richou. Kama adhiyoe ok unyal biroe.” Jo-Yahudi ok winj tiend weche ma Yesu wachogo. Omiyo, gipenjore kama: “Odwaro dere, koso? Nikech owacho ni, ‘Kama adhiyoe ok unyal biroe.’” Ok giwinj tiend gima Yesu wacho nikech ok ging’eyo kama Yesu ne oaye. Oleronegi kama: “Un ua mwalo; an aa malo. Un ua e pinyni; an ok aa e pinyni.”​—Johana 8:21-23.

Yesu wuoyo e wi ngima ma ne en-go e polo kane pok obiro e piny; bende owuoyo konyiso ni en e Mesia ma ne okor wachne, tiende ni Kristo, jal ma jotend din-go osebedo ka rito. Kata kamano, gipenje e yor achaya niya: “In ng’a?”​—Johana 8:25.

Kata obedo ni gikwede kendo ok gidware, Yesu dwokogi ratiro niya: “Ang’o momiyo awuoyo kata mana kodu?” Kata kamano, pod omedo miyo Wuon-gi duong’ kendo olero gimomiyo Jo-Yahudi onego owinj Wuode kowachonegi kama: “Ng’at ma ne oora en ja adier kendo weche sie ma ne awinjo kuome e ma awacho e piny.”​—Johana 8:25, 26.

Kae to Yesu nyiso yie motegno ma en-go kuom Wuon mare, ma en yie ma Jo-Yahudigo ongego. Owacho kama: “Bang’ kuseng’awo Wuod dhano malo, eka unung’e ni an e en, kendo ni onge gima atimo gi dwacha awuon; to awacho gigi mana kaka Wuora nosepuonja. To Ng’at ma ne oora ni koda; ne ok ojwang’a kenda awuon, nikech kinde duto atimo gik ma more.”​—Johana 8:28, 29.

Kata kamano, moko kuom Jo-Yahudigo keto yie kuom Yesu, kendo owachonegi niya: “Ka usiko e wachna, un jopuonjrena adier, kendo ubiro ng’eyo adiera, mi adiera noketu thuolo.”​—Johana 8:31, 32.

Jomoko kuom jogo to neno wach keto ji thuolono kaka puonj ma wendo. Giwacho kama: “Wan koth Ibrahim kendo pok ne wabedoga wasumbni ng’ato ngang’. Obet nade ni iwacho ni, ‘Unubed thuolo’?” Jo-Yahudi ong’eyo maber ni nitie kinde ma gisegabedo e bwo loch mar ogendni mamoko. To e ma pod ok gidwar ni oluonggi ni wasumbni. Kata kamano, Yesu nyisogi ni pod gin wasumbni. Owachonegi niya: “Adier, adier, awachonu ni, ng’ato ang’ata ma timo richo en misumba richo.”​—Johana 8:33, 34.

Nikech Jo-Yahudi otamore yie ni gin wasumb richo, mano miyo ngimagi bedo kama rach. Yesu lero kama: “Misumba ok sik e od ruodhe nyaka chieng’; wuod ruoth to siko nyaka chieng’.” (Johana 8:35) Misumba onge gi ratiro mar yudo pok e mwandu mag ruodhe, kendo inyalo riembe sa asaya. Wuod ruoth kende monyuolo, kata mokawo mondo obed wuode, e ma siko “nyaka chieng’,” tiende ni e ngimane duto.

Kuom mano, adiera e wi Wuod Nyasaye e adiera ma keto ji thuolo chuth nyaka chieng’ kendo gologi e richo ma kelo tho. Yesu wacho niya: “Ka Wuod Nyasaye ketou thuolo, ubiro bedo thuolo gadier.”​—Johana 8:36.