Johana 3:16—“Nikech Nyasaye Nohero Piny Ahinya”

“Nimar Nyasaye nohero piny ahinya mi nochiwo Wuode ma miderma, mondo ng’at ma nyiso yie kuome kik kethi, to obed gi ngima ma nyaka chieng’.”​—Johana 3:16, Loko mar Piny Manyien.

“Nikech Nyasaye nohero piny ahinya, omiyo nochiwo Wuode ma miderma, mondo ng’a ma oyie kuome kik lal, to obed gi ngima mochwere.”​—Johana 3:16, The Bible in Luo, 1968.

Tiend Ndiko mar Johana 3:16

Nyasaye oherowa kendo odwaro ni wadag nyaka chieng’. Mano e momiyo ne ooro Wuode Yesu Kristo mondo obi e piny ka. Ka ne Yesu ni e piny ka, ne otimo gik mang’eny. Achiel kuom gik ma Yesu notimo en puonjo jolupne e wi Wuon-gi ma ne Nyasaye. (1 Petro 1:3) Bende, notho ne dhano. Mondo wayud ngima mochwere, nyaka wanyis yie kuom Yesu.

Weche ma wacho ni “nochiwo Wuode ma miderma” nyiso okang’ ma Nyasaye oherogo dhano.a Yesu ne en Wuod Nyasaye makende ahinya. Ang’o momiyo wawacho kamano? Yesu kende e ma Nyasaye nochueyo achiel kachiel. (Jo-Kolosai 1:17) Yesu “e jal makayo kuom chuech duto.” (Jo-Kolosai 1:15) Chuech mamoko modong’ moriwo nyaka malaike mamoko nochue kokalo kuom Yesu. To e ma pod Jehovab Nyasaye noyie oro Wuode mohero ahinya “mondo oti ne ji kendo mondo ochiw ngimane owar ji mang’eny.” (Mathayo 20:28) Yesu nosandore motho mondo owarwa kuom richo kod tho ma ne wayudo kuom Adam, janyuolwa mokwongo.​—Jo-Rumi 5:8, 12.

Nyiso yie kuom Yesu oriwo gik mang’eny moloyo mana yie kuome kata yie kuom gik ma notimonwa. Nyaka wanyis ni wayie kuom Wuod Nyasaye ka watimo gik ma nochikowa kendo luwo ondamo mage. (Mathayo 7:24-27; 1 Petro 2:21) Muma wacho kama: “Ng’at ma nyiso yie kuom Wuod Nyasaye nigi ngima ma nyaka chieng’; to ng’at ma ok winj Wuoyi ok none ngima.”​—Johana 3:36.

Weche Molworo Ndiko mar Johana 3:16

Yesu nowacho wechego ka nogoyo mbaka gi Nikodemo ma ne en achiel kuom jotend din mar Jo-Yahudi. (Johana 3:1, 2) E mbakano, Yesu nowacho weche moko e wi Pinyruodh Nyasayec kod “nyuol manyien.” (Johana 3:3) Bende, nowuoyo kuom kit tho ma nodhi thogo. Nowacho kama: “Wuod dhano bende nyaka ng’aw malo [gur e yath], mondo ng’ato ka ng’ato ma keto yie kuome obed gi ngima ma nyaka chieng’.” (Johana 3:14, 15) Kae to nojiwo ni hera maduong’ ma Nyasaye noherogo dhano e ma nomiyo nochiwo thuolo ma kamano mondo giyud ngima mochwere. Yesu notieko mbakano kowacho ni mondo ng’ato oyud ngima ma nyaka chieng’, nyaka obed gi yie kendo timo gik mamoro Nyasaye.​—Johana 3:17-21.