Ere Kaka Tho Yesu Warowa?

Wachandorega, wan joricho, kendo watho nikech Adam gi Hawa notamore luwo chike Nyasaye.a Kata kamano, wan gi geno. Jehova osechiwonwa Wuode Yesu Kristo mondo oreswa a e richo kod tho. Muma puonjo ni Yesu ne ochiwonwa rawar ka ne otho. Rawar en nengo michulo mondo ogony ng’ato. Nengo ma Yesu nochulo en ngimane makare chuth. (Som Mathayo 20:28.) Yesu ne nyalo dak nyaka chieng’ e piny ka. Kata kamano, noyie thonwa mondo wayud gueth duto ma Adam gi Hawa nolalo. Yesu nonyiso kaka oherowa kod kaka Jehova bende oherowa. Sulani biro jiwi mondo imed goyo erokamano nikech Yesu noyie thonwa.

1. Ere kaka tho Yesu nyalo konyowa e kindegi?

Nikech wan joricho, watimoga gik mang’eny ma ok mor Jehova. Kata kamano, ka waloko chunywa gadier mi wakwayo Jehova ng’wono kokalo kuom Yesu Kristo, kae to watimo duto ma wanyalo mondo kik wanwo timo richono, mano nyalo miyo wabed gi winjruok maber kode. (1 Johana 2:1) Muma wacho niya: “Kristo ne otho dichiel ma ok bi nwo kendo, mondo oum richo, ng’at makare ne jo ma ok kare, mondo otau koterou ir Nyasaye.”​—1 Petro 3:18.

2. Ere kaka tho Yesu biro konyowa e kinde ma biro?

Jehova nooro Yesu mi ochiwo ngimane makare chuth “mondo ng’at ma nyiso yie [kuom Yesu] kik kethi, to obed gi ngima ma nyaka chieng’.” (Johana 3:16) Jehova biro tiyo gi misango ma Yesu nochiwo mondo ogol gik maricho duto ma Adam nokelo ka notamore winje. Mano nyiso ni ka waketo yie kuom misango ma ne Yesu ochiwo, wabiro yudo thuolo mar dak gi mor e paradiso e piny ka nyaka chieng’!​—Isaya 65:21-​23.

TIM NONRO

3. Tho Yesu gonyowa e richo kod tho

VIDIO: Ang’o Momiyo Yesu Notho?​—Kare Mokwongo (2:01)

• Gin ber mage ma Adam nolalo ka ne otamore luwo chik Nyasaye?

Som Jo-Rumi 5:12, kae to uwuo e wi penjo ma luwoni:

• Richo ma ne Adam otimo osekeloni rach mage?

Som Johana 3:16, kae to uwuo e wi penjo ma luwoni:

• Ang’o momiyo Jehova nooro Wuode e piny ka?

1. Adam ne en ng’at makare ma ne otamore luwo chik Nyasaye to mano nokelo ne dhano richo kod tho

2. Yesu ne en ng’at makare ma ne oluwo chik Nyasaye to mano noyawo ne dhano yo mar yudo ngima makare chuth kendo ma nyaka chieng’

4. Tho Yesu nyalo konyo ji duto

VIDIO: Ang’o Momiyo Yesu Notho?​—Kare mar 2 (2:00)

• Ere kaka tho mar ng’ato achiel nyalo konyo ji duto?

Som 1 Timotheo 2:5, 6, kae to uwuo e wi penjo ma luwoni:

• Adam ne en ng’at makare ma ne otamore luwo chik Nyasaye to mano nokelo ne dhano richo kod tho. Yesu bende ne en ng’at makare kendo noluwo chik Nyasaye. Mano noyawo ne dhano thuolo mar yudo ang’o?

5. Misango ma ne Yesu ochiwo en mich moa kuom Jehova

Moro ka moro kuom osiepe Jehova nenoga misango ma ne Yesu ochiwo kaka mich ma ochiwne en owuon. Kuom ranyisi, som Jo-Galatia 2:20, kae to uwuo e wi penjo ma luwoni:

• Jaote Paulo nonyiso nade ni oneno misango kaka mich ma ne ochiwne en owuon?

Ka ne Adam otimo richo, noyudo kum mar tho kaachiel gi nyikwaye duto. Kata kamano, Jehova nooro Wuode obi othoni mondo iyud thuolo mar dak nyaka chieng’.

Sama isomo ndiko ma luwogi, tem ane paro kaka Jehova nowinjo sama isando Wuode. Som Johana 19:1-7, 16-​18, kae to uwuo e wi penjo ma luwoni:

• Gima Jehova gi Yesu notimoni miyo iwinjo nade?

PUONJ MADUONG’

Tho mar Yesu miyo Jehova weyonwa richowa kendo miyowa thuolo mar dak nyaka chieng’.

Ang’o ma ipuonjori?

• Ang’o momiyo Yesu notho?

• Ere kaka misango ma Yesu nochiwo ne nyalo chulo gima Adam nolalo?

• Ere kaka tho mar Yesu nyalo konyi?

MED TIMO NONRO

Ne ane gimomiyo iluongo ngima makare mar Yesu ni rawar.

“Ere Kaka Misango mar Yesu Nobedo ‘Rawar ne Ji Mang’eny’?” (Sula ma yudore e jw.org)

Ne ane gima onego watim mondo wayud warruok.

“Yesu Waro Ji e Yo Mane?” (Sula ma yudore e jw.org)

Be Jehova nyalo ng’wono ne ng’ato richo madongo?

“Dwoko Penjo mag Muma” (Ohinga mar Jarito, Mei 1, 2013)

Ne ane kaka puonjruok e wi misango ma Yesu nochiwo nokonyo ng’at moro ma ne siko ka paro gik malit ma noneno ka timore.

“Naweyo Timbe Gero Chuth” (Sula ma yudore e jw.org)

1. Achiel kuom yore ma wagoyogo erokamano kuom gima Nyasaye gi Yesu notimonwa en mane?

Muma singonwa ni ‘ng’at ma nyiso yie kuom Yesu’ nyalo dak nyaka chieng’. (Johana 3:16) Nyiso yie tiende en ang’o? Ok en aena wacho awacha ni wayie kuom Yesu. Timbewa bende onego onyis ni wan gi yie. (Jakobo 2:17) Sama wanyiso yie kokalo kuom wechewa kod timbewa, wabedo gi winjruok motegno gi Yesu kod Wuon-gi ma en Jehova.​—Som Johana 14:21.