Ere Kaka Ilando Wach Maber?

Machiegnini, Jehova biro tiyo gi Pinyruodhe e tieko chandruogewa duto. Mano en wach maber ma ok onego waling’go. Yesu nochiko jolupne mondo giland wachno ne ji duto! (Mathayo 28:19, 20) Ere kaka Joneno mag Jehova luwo chik ma ne Yesu ogolono?

1. Weche manie Mathayo 24:14 chopo nade e kindewagi?

Yesu nokoro kama: “Wach maber mar Pinyruoth ibiro yal e piny mangima.” (Mathayo 24:14) Joneno mag Jehova mor ahinya timo tich makendeno. Walando wach maber e piny mangima e dhok mokalo 1,000! Dwarore ni watim tijno gi kinda kendo e yo mochanore. Tijno ok nyal dhi nyime ka Jehova ok okonyowa.

2. Ang’o ma watimoga mondo walend ne ji?

Walendoga kamoro amora ma wanyalo yudoe ji. Walendoga “ot ka ot” mana kaka Jokristo mokwongo ne timo. (Tich Joote 5:42) Lendo e yo mochanore kamano miyo waromo gi ji mang’eny ahinya higa ka higa. Bende, walendoga e lela nikech kinde mang’eny ji ok yudrega e utegi. Kinde duto wamanyoga thuolo mar puonjo ji e wi Jehova kod dwache.

3. Gin jomage ma nigi ting’ mar lando wach maber?

Jokristo duto madier nigi ting’ mar lando wach maber ne jomamoko. Mano en migawo ma wakawo mapek ahinya. Watimo duto ma wanyalo e lando wach maber nikech wang’eyo ni tijno reso ngima ji. (Som 1 Timotheo 4:16.) Ok wati tijno mondo ochulwa nikech Muma wacho niya: “Nuyudo nono, omiyo chiwuru nono.” (Mathayo 10:7, 8) En adier ni nitie jo ma ok rwakga wach ma walando. Kata kamano, wadhi nyime lendo nikech timo mano moro Jehova kendo nyiso ni waluwo chikene.

TIM NONRO

4. Watimo kinda mondo walend ne ji duto

VIDIO: Lendo “Nyaka Kuonde Maboyo Mogik e Tung’ Piny” (7:38)

• Ang’o ma mori e wi kinda ma Joneno mag Jehova timoga mondo gilendi?

Som Mathayo 22:39 kod Jo-Rumi 10:13-​15, kae to uwuo e wi penjo ma luwogi:

• Ere kaka tijwa mar lendo nyiso ni wahero jowetewa?

• Jehova neno nade joma lando wach maber?​—Ne kwan matindo 15.

5. Wan jotich ma tiyo kanyachiel gi Nyasaye

Gik mosetimore nyiso ni Jehova tayo tijwani. Kuom ranyisi, owadwa moro miluongo ni Paul modak New Zealand noromo gi miyo moro sama nolendo ot ka ot godiechieng’. Miyono nolemo okinyino kokwayo Jehova mondo ng’ato olime. Paul wacho ni nochopo e dhood miyono mana bang’ seche adek.

Som 1 Jo-Korintho 3:9, kae to uwuo e wi penjo ma luwoni:

• Ranyisino nyiso nade ni Jehova tayo tij lendo?

Som Tich Joote 1:8, kae to uwuo e wi penjo ma luwoni:

• Ang’o momiyo dwarore ni Jehova okonywa mondo wachop tijwa mar lendo?

Be ing’eyo?

Itiegowaga ne tij lendo e chokruogewa ma kor juma. Ka po ni isedhi e chokruogego, inyalo wacho ang’o e wi tiegruok ma wayudo kuno?

6. Waluwo chik ma Nyasaye omiyowa sama walendo

E kinde Jokristo mokwongo, jo akwede ne otemo geng’o jolup Kristo mondo kik gilendi. Jokristo mokwongo notiyo gi “chik sirkal e siro ratiro” mar lando “wach maber.” (Jo-Filipi 1:7) Joneno mag Jehova bende timoga kamano e kindegi.a

VIDIO: Tiyo gi Chik Sirkal e Siro Wach Maber (2:28)

Som Tich Joote 5:27-​42, kae to uwuo e wi penjo ma luwoni:

• Ang’o momiyo ok wanyal weyo lendo?​—Ne kwan matindo 29, 38, kod 39.

PUONJ MADUONG’

Yesu nochiko jolupne mondo giland wach maber e pinje duto. Jehova konyo jotichne mondo giti tijno.

Ang’o ma ipuonjori?

• Ere kaka ilando wach maber e piny mangima?

• Ere kaka tijwa mar lendo nyiso ni wahero jowetewa?

• Be iparo ni tij lendo nyalo kelonwa mor? Ang’o momiyo iwacho kamano?

MED TIMO NONRO

Ne ane kaka Joneno mag Jehova lendo ne ji e taonde madongo.

Lendo ma Notim e Yo Makende e Taon mar Paris (5:11)

Ang’o ma Joneno mag Jehova osetimo mondo gilend ne joma oringo thuchegi?

Konyo Joma Oringo Thuchegi e Tieko Riyo mar Wach Nyasaye (5:59)

Winj ane kaka tiyo ne Nyasaye gi thuolowa duto kelonwa mor.

Amor ni Nayiero Tiyo ne Nyasaye (6:29)

Ne ane kaka buche ma kot nong’ado osekonyo e lando wach maber.

“Kaka Joyal Wach Pinyruoth Osebedo ka Tero Kes Maggi e Kot” (Pinyruodh Nyasaye Locho!, sula mar 13)