Penjo Moa Kuom Josombwa

Askeche ma ne ni e hekalu mar Jo-Yahudi ne gin jomage? To ne gitimo tije mage?

Achiel kuom tije ma yawuot Lawi ma ne ok gin jodolo ne timoga en tich moro minyalo pim gi tij polise e kindegi. Jogo ne tiyo e bwo kapten mar hekalu. Jandiko ma Ja-Yahudi miluongo ni Philo lero moko kuom tije ma askechego ne timo. Owacho niya: “Moko kuomgi [tiende ni, Jo-Lawigo] ne ritoga dhoudi kod dho rangeye duto mag hekalu. Moko to ne rito nyim kama ler mondo gigeng’ ne ng’ato ang’ata ma ok owinjore donjo kanyo, bed ni ng’ato ne temo donjo kanyo goyiem kata ka ong’eyo. Askeche moko to ne lwororega e hekalu koni gi koni ka girite, kendo ne giwilorega odiechieng’ gi otieno.”

Jo-Sanhedrin ne ni thuolo kwayo askechego mondo okonygi e tije moko. Askechego kende e Jo-Yahudi ma Jo-Rumi noyienegi ting’o gige lweny.

Jasomo moro miluongo ni Joachim Jeremias nowacho niya: “Weche ma Yesu nowacho ne joma nobiro make ka nopenjogi gimomiyo ne ok gimake e Hekalu to nopuonjo kuno pile, winjore maler mana ka po ni askeche mag Hekalu e ma noor mondo omake.” (Mat. 26:55) Jasomono wacho bende ni joma noor e kinde mokalo mondo omak Yesu be ne gin mana askechego. (Joh. 7:32, 45, 46) Kinde moko bang’e, mana askechego kod kapten margi e ma ne oor mondo okel jopuonjre Yesu e nyim Sanhedrin, kendo nyalo bedo ni moko kuomgi e ma noywayo jaote Paulo ka gigole e hekalu.​—Tich 4:1-3; 5:17-27; 21:27-30.