8. Gin weche mage ma Paulo jiwowa mondo wapar?

⁸ Ei barua ma ne ooro ne Jo-Rumi, jaote Paulo nopenjo niya: “Nitie wach ma ok kare kor ka Nyasaye koso?” Ne odwoko gi jing’o kowacho ni: “ngang!” Kendo omedo jiwo wach ng’wono mar Nyasaye kowuoyo kuom gima Jehova nowacho kane oweyo Farao mondo omed bedo mangima kuom kinde. Paulo bende nyiso ni wan dhano wachalo gi lowo manie lwet jachwe agulini. Bang’e owacho niya: “To en ang’o kata po nono Nyasaye ne dwaro nyiso mirimbe, kendo miyo ji ng’eyo tekone, nohore gi ng’wono maduong’ kod agulini mag mirima moket ni keth? En ang’o kotimo kamano bende ni mondo omi ji ng’eyo mwandu mar duong’ne kuom agulini motimonigi miwafu, moseloso chon mondo giyud duong’, e wan moseluongo kuom jo Yahudi kod jo ma ok jo Yahudi bende.”​—Jo Rumi 9:​14-​24

10. Ang’o momiyo Jehova osehore mos gi joma richo kuom higini mokalo 1,900?

¹⁰ Chakre chier Yesu chiegni higini 1,900 mosekalo, Jehova osemedo hore mos gi “agulini mag mirima.” Mano en nikech ang’o? Mokwongo, en nikech osebedo ka oiko jogo mabiro locho kaachiel kod Yesu Kristo e Pinyruodhe e polo. Kwan mar jogi gin 144,000, kendo gin “agulini motimonigi miwafu” ma ne Paulo wuoyo kuomgi. Jo-Yahudi ema ne okwong gwelo mondo gilos kweth madhi e poloni. Bang’e, Nyasaye ne ogwelo oganda ma ok gin Jo-Yahudi. Jehova ok osechuno ng’ato ang’ata kuomgi mondo otine. Kata kamano, jogo ma ne oyie gi chenro ma ne oketo, ne omiyo thuolo makende mar locho gi Wuode e Pinyruodh polo. Sani, chenro mar iko ogandano madhi e polo, chiegni rumo.​—Luka 22:29; Fweny 14:​1-4.