SULA MAR 38
Nyis ni Imor gi Mich mar Ngima
Bedo mangima nyalo miyowa thuolo mar timo gik mathoth ma morowa. Kata mana sama wan gi chandruoge, pod nitie gik ma nyalo morowa e ngima. Ere kaka wanyalo nyiso ni wamor gi mich mar ngima? To gima duong’ ma miyo watimo kamano en ang’o?
1. Ang’o momiyo onego wabed mamor gi mich mar ngima?
Jehova e ma omiyowa ngima, omiyo onego wagone erokamano kuom michno. En e “soko mar ngima” nikech nochueyo gik moko duto. (Zaburi 36:9) “En owuon omiyo ji duto ngima, gi muya, kod gik moko duto.” (Tich Joote 17:25, 28) Jehova miyowaga gik ma dwarore mondo wabed mangima. E wi mano, otimoga gik ma miyo wabedo mamor gi ngima.—Som Tich Joote 14:17.
2. Ere kaka wanyalo nyiso Jehova ni wamor gi mich mar ngima?
Jehova osebedo ka dewi ahinya chakre ne mak ichni. Daudi ma ne en achiel kuom jotich Nyasaye, nowacho kama kitaye gi roho: “Ne inena ka pod ichueya e ich.” (Zaburi 139:16) Jehova neno ngimani kaka gima duong’ ahinya. (Som Mathayo 10:29-31.) Jehova winjo marach sama ng’ato onego nyawadgi goyiem kata onegore owuon.a (Wuok 20:13) Bende, onyalo winjo marach ka watimo gik ma nyalo hinyo ngimawa kata ka ok watang’ gi gik ma nyalo hinyo jomamoko. Sama warito ngimawa, kendo wamiyo ngima mag jomamoko luor, mano nyiso ni wamor gi mich maber mosemiwa.
TIM NONRO
Non ane yore minyalo nyisogo ni imor gi mich mar ngima.
3. Rit ngimani e yo maber
Jokristo mochiwore ne Jehova tiyone gi ngimagi duto. Chal ka gima gichiwo ringregi kaka misango ne Nyasaye. Som Jo-Rumi 12:1, 2, kae to uwuo e wi penjo ma luwogi:
En ang’o monego ojiwi mondo irit ngimani e yo maber?
Moko kuom yore minyalo ritogo ngimani gin mage?
4. Bed motang’ mondo gik mitimo kik hiny ng’ato kata nege
Muma jiwowa ni wawere gi timbe ma nyalo hinyo ngimawa kata ngima jomamoko. Tug VIDIO mondo ing’e moko kuom gik minyalo timo mondo irit ngimani.
Som Ngeche 22:3, kae to uwuo e wi kaka inyalo geng’o gik ma nyalo kelo hinyruok . . .
sama in e ot kata e dala.
sama in kar tich.
sama itugo tuke.
sama iriembo kata oting’i gi mtoka, apiko, kod gik ma chalo kamago.
5. Kik ihiny ngima nyathi ma pod nie ich
Daudi nolero ni Jehova ong’eyo gik moko duto ma timore sama nyathi dongo e i min-gi. Som Zaburi 139:13-17, kae to uwuo e wi penjo ma luwoni:
E wang’ Jehova, be ngima ng’ato chakore sama omak ichne koso sama onyuole?
Chike ma ne Jehova omiyo Jo-Israel machon, ne rito mine kaachiel gi nyithindo manie ich. Som Wuok 21:22, 23, kae to uwuo e wi penjo ma luwogi:
Jehova ne neno nade ng’at ma nopo konego nyathi ma pod ni e ich?
Ne onyalo winjo nade ka ng’ato otimo kamano goyiem?b
Ineno nade paro ma Nyasaye nigo e wi wachno?
Kata mana miyo ma neno ngima kaka gima duong’ bende seche moko nyalo neno ni golo ich kende e ma nyalo konye. Som Isaya 41:10, kae to uwuo e wi penjo ma luwogi:
Sama jomoko temo chuno miyo moro mondo ogol ich, onego omany kony kanye? Ang’o momiyo iwacho kamano?
PARO MA JOMOKO NIGO: “Miyo ma nigi ich e ma nigi ratiro mar yiero ka be obiro golo ich kata ooyo. Mano en dende.”
Ang’o ma konyi bedo gadier ni Jehova ogeno ngima mar miyo kod nyathine manie ich?
PUONJ MADUONG’
Muma puonjo ni onego wami ngima luor, warite maber, kendo wanyis ni wamor gi mich ma Jehova omiyowano. Mano oriwo ngimawa wawegi kod mar jomamoko.
Ang’o ma ipuonjori?
Ang’o momiyo Jehova neno ngima dhano kaka gima duong’?
Jehova winjo nade sama ng’ato onego nyawadgi goyiem?
Be imor gi mich mar ngima? Nikech ang’o?
MED TIMO NONRO
Ere kaka wanyalo goyo ne Jehova erokamano kuom mich mar ngima?
Yud dwoko mar penjo ma wacho ni, Be Nyasaye nyalo ng’wono ne dhako ma ne osegagolo ich?
“Ang’o ma Muma Wacho e Wi Golo Ich?” (Sula ma yudore e jw.org)
Ne ane kaka ng’eyo yo ma Nyasaye nenogo ngima nyalo konyowa yiero yore mag manyo mor ma ok bi hinyowa.
“Tuke Mokalo Tong’—Be Onego Ituggi?” (Nenuru!, Oktoba 8, 2000)
To nade ka ng’ato gombo dere? Ne ane kaka Muma nyalo konyo ng’at ma kamano.
“Adwaro ni Atho—Be Muma Nyalo Konya Sama Agombo ni Adera?” (Sula ma yudore e jw.org)
a Jehova dewo ahinya joma chunygi onyosore. (Zaburi 34:18) Ong’eyo lit ma nyalo miyo ng’ato ogomb dere, kendo odwaro ni okony joma kamago. Mondo ing’e kaka Nyasaye nyalo konyo joma kamago, som sula ma wiye wacho ni: “Adwaro ni Atho—Be Muma Nyalo Konya Sama Agombo ni Adera?” ma yudore e kare ma wacho ni “Med Timo Nonro” manie sulani.
b Joma nosegologa ich ok onego owinj marach mokalo tong’ nikech Jehova nyalo ng’wononegi. Mondo iyud weche momedore, som sula ma wiye wacho ni: “Ang’o ma Muma Wacho e Wi Golo Ich?” ma yudore e sulani e kare ma wacho ni “Med Timo Nonro.”