Puonjri Kuom Chik ‘Moting’o Adiera’

‘Chik oting’onu ng’eyo gi adiera.’ —RUMI 2:20.

1. Ang’o momiyo onego wabed gi gombo mar ng’eyo tiend puonj motudore gi Chik Musa?

DINE bed ni waonge gi buge mag Muma ma jaote Paulo nondiko kotelne gi Nyasaye, dikoro ok wang’eyo maber tiend weche moko motudore gi Chik Musa. Kuom ranyisi, e baruane ne Jo-Hibrania, olero kaka ‘jadolo maduong’ maradier’ ma en Yesu, nochiwo dichiel kende “misango” ma ne nyalo miyo jogo maketo yie oyud “warruok mochwere.” (Hib. 2:17; 9:11, 12) Paulo nolero ni, tabernakel ne en mana “tipo mar tich me polo,” kendo ni Yesu nobedo Jagach mar ‘muma maber moloyo.’ Tiende ni moloyo mano ma Musa nobedoe jagach. (Hib. 7:22; 8:1-5) E ndalo Paulo, lero puonj kaka mago e wi Chik ne dwarore ahinya ne Jokristo, to mano bende e kaka en e kindewagi. Puonjgo konyowa ng’eyo e okang’ momedore ahinya kaka chenro ma Nyasaye osechiwonwa e ndalogi konyo.

2. Jokristo ma Jo-Yahudi ne nigi ng’eyo mane ma Jokristo moa e Ogendini ne ongego?

² Kane Paulo ondiko ne Jokristo man Rumi, nitie weche moko ma nowacho ma ne mulo jokanyo mag kanyakla ma ne gin Jo-Yahudi, ma ne osepuonj Chik Musa. Ne owacho ni, nikech joma kamago noseng’eyo Chik Nyasaye, ne gin maber nimar Chik ne ‘oting’onegi ng’eyo gi adiera’ e wi Jehova koda chikene makare. Ng’eyo Chik ‘moting’o adiera,’ kendo bedo gi chuny makawo wechego gi pek, nomiyo Jokristo ma Jo-Yahudi otimo mana kaka Jo-Yahudi machon ma noluoro Nyasaye, nimar ne gitayo, gipuonjo, kendo konyo joma ne kiya Chik ma Jehova nosemiyo joge.—Som Jo Rumi 2:17-20.

TIPO MAG MISANGO MAR YESU

3. Ere kaka nono misengini ma Jo-Yahudi ne chiwo chon nyalo konyowa?

³ Ng’eyo Chik moting’o adiera ma Paulo nowuoyoe, podi en gima dwarore kuomwa mondo mi wang’e dwaro mag Jehova e yo maber. Weche ma ne omiyo oket Chik Musa, pod oting’o puonj manyalo konyowa. Ka wan gi wachno e paro, weuru wanon ane wach moro achiel motudore gi Chik, tiende ni kaka misengini kod chiwo mopogore opogore ne tayo ka tero Jo-Yahudi ma chunygi ne nikare ir Kristo, kendo konyogi ng’eyo gigo ma Nyasaye ne dwaro ni gitim. To nikech gik ma Jehova dwaro ni mondo jotichne otim gin gik maok lokre ngang’, wabiro neno bende kaka chike ma Nyasaye nomiyo Jo-Israel e wi misengini kod chiwo, nyalo konyowa nono chal mar tijwa ne Nyasaye.—Mal. 3:6.