Wuothuru Ka Jo Mariek
1 Kane Yesu ogwelo jolupo ang’wen mondo obed jolupne, ne ok gideko kuom wachno, to “gikanyono . . . ne giluwe.” (Math. 4:18-22) Kane Saulo ma Ja-Tarso oloki, mi ochako neno kendo, en bende ok ne odeko, to “gikanyono noyalo e sunagoke ni Yesu en Wuod Nyasaye.” (Tich 9:20) Sa siko ka sudo; to ka osekadho, odhi chuth. Mano emomiyo dwarore ahinya mondo ‘wawuothi ka joma riek’ kuom wach tiyo gi kindewa.—Efes. 5:15, 16.
2 Ok Wang’eyo Gima Biro Timore: Thuolo ma wan-go mar tiyo ne Jehova gie sani, nyalo lal kochopo kiny. (Jak. 4:14) Onge ng’ama ok ‘weche yude.’ (Ekle. 9:11) E wi mano, waduto wati, kendo “ndalo minenoe rach” ma ja bedoe kaka hikwa medore, kendo ma monowa timo mang’eny e tij Jehova, gin ndalo mochomowa e piny masani. (Ekle. 12:1) Kuom mano, ok en gima nyiso rieko ka wadigni kuom wach chiwruok ne Nyasaye, kata rito ni gik moko biro bedo maber kapok wamedo tiyo ne Nyasaye e okang’ malach kaka nyalore e kindegi. (Luka 9:59-62) Ibrahim ne oyudo kuwe kane en jaduong’ moti nimar notho “ka hike thoth maber” nikech ne oyudo osetiyo gi ngimane e yo mariek, kochiwore chuth ne Jehova.—Chak. 25:8.
3 Ndalo Modong’ Nok: Wan bende wadwaro tiyo gi thuolowa e yo mariek, nimar “ndalo modong’ nok.” (1 Kor. 7:29-31) E ndalo mokayo machiegni, piny machonni biro chopo e gikone. Thuolo mar timo tich maduong’ mar choko jogo ma nigi kido mag rombe e kinde mag ‘kayo piny,’ biro rumo. (Fwe. 14:15) Nyaka wabed motang’ mondo kik wawe parruok mag ngima kaachiel gi gik ma galo paro, omawa seche mwanyalo tiyo godo e yo maber moloyo e tij lendo. (Luka 21:34, 35) Mano kaka nobed gima ber kwang’iyo chien kendo ng’eyo ni ne wariwo tij keyo lwedo chuth!
4 Nyaka wabed motang’ mondo kinde duto wati gi thuolo ma wan-go kaka nyalore e tiyo tich maber makelo mor. Kuom mano, wadhiuru nyime timo duto mwanyalo mondo wati ne Jehova “ka pod ndaloni iluongo ni ‘Tinende.’” (Hibr. 3:13) Ka watimo kamano to wabiro nyiso ni adier wan joma riek, nikech “ng’a ma timo gi ma Nyasaye dwaro osiko nyaka chieng’.”—1 Joha. 2:17.