Bed Machiegni gi Joma Ohero Jehova

Ang’o momiyo onego wabed machiegni gi joma ohero Jehova? Nikech osiepewa nyalo miyo watim gik maricho kata mabeyo. (Nge 13:20) Kuom ranyisi, Ruoth Jehoash notimo gik “makare e nyim wang’ Jehova” kinde duto ma ne en machiegni gi Jehoiada jadolo maduong’. (2We 24:2) Ka ne Jehoiada otho, Jehoash noweyo Jehova nikech osiepe maricho.​—2We 24:17-19.

E kinde Jokristo mokwongo, jaote Paulo nopimo kanyakla mar Jokristo gi “ot mang’ongo,” kendo joma nie kanyakla nopimo gi “gik” manie odno. Wasiko ka wan ‘gige tich ma nigi duong’’ ka ok wamak osiep kata tudore gi ng’at ma timo gik ma Jehova osin-go, bed ni en achiel kuom joodwa kata Jakristo wadwa ma wan-go e kanyakla. (2Ti 2:20, 21) Omiyo, wadhiuru nyime mako osiep gi joma ohero Jehova kendo ma jiwowa mondo watine.

NEURU VIDIO MA WIYE WACHO NI KAKA INYALO KWEDO OSIEPE MARICHO, KAE TO UDWOK PENJO MALUWOGI:

• Gin yore mage ma wanyalo tudorego gi osiepe maricho?

• Ang’o ma nokonyo Jokristo moko adek ma waneno e vidiono mondo ging’ad osiep gi joma ok lam Jehova?

• Gin puonj mage mag Muma manyalo konyi tiyo gi rieko e yiero osiepe?