Barua Mowuok Kuom Bura Matayo

‘Onego ubed jopuonj.’ (Hib. 5:12) Parie apara ni Jehova ma en Japuonj Maduong’ie moloyo e piny gi polo omiyowa migawo mar puonjo ji wachne. Migawo moro amora mar puonjo ji e wi Jehova, bed ni watimo kamano e utewa, e kanyakla kata e tij lendo, en migawo maduong’ ahinya. Koro, ere kaka wanyalo puonjo e yo maber?

Dwoko mar penjono yudore e weche ma ne jaote Paulo ondiko ne Timotheo niya: “Dhi nyime keto chunyi kuom somo weche ne ji e lela, kuom sayo ji, kod kuom puonjo.” Paulo nomedo wacho niya: “Kuom timo kamano, iniresri iwuon kendo inires joma winjo weche mipuonjo.” (1 Tim. 4:13, 16) In-gi ote ma reso ngima ji monego iland. Mano e momiyo dwarore ni itim kinda mondo imed lony e yo misomogo kendo mipuonjogo. Olos brosuani mondo okonyi timo mano. Ne ane moko kuom weche manie iye.

Ndiko moket e somo ka somo nyiso puonj manie Muma motudore kod paro miwuoyoe e somono, kata ndikono nyalo bedo gi ranyisi ma nyiso kaka inyalo ti gi paro mochiw e somono

Jehova e Japuonj Maduong’. (Isa. 30:20) Kata obedo ni brosuani biro konyi mondo ibed jasomo maber kendo japuonj maber, kik wiyi wil ni Jehova e wuon weche duto ma wapuonjo kendo ni en e ma oywayo ji. (Joh. 6:44) Omiyo, kwaye roho maler kinde duto. Ti ahinya gi Wach Nyasaye. Ket pachi kuom Jehova to ok kuomi iwuon. Tem ikony jowinjo mondo giher Jehova gi chunygi duto.

Osegwelwa mondo waland ote maduong’ie ahinya ma ok nyal pim gi ote moro amora ma osega mi dhano. Wan gadier ni ka idhi nyime geno “teko ma Nyasaye chiwo,” ibiro dhi maber.​—1 Pet. 4:11.

Wan Jopuonj Weteu,

Bura Matayo Joneno mag Jehova