Nitie ji mang’eny ma nigi paro kaka mar Christopher, Hannah, kod Gina. Ji mang’eny e piny ngima nigi adier ni Nyasaye nenogi kaka osiepene. To nade in? Be iwinjo ka in-gi winjruok machiegni gi Nyasaye? Koso diher bedo machiegni kata machiegni ahinya gi Nyasaye? Samoro isegapenjori kama: ‘Be en adier ni dhano adhana nyalo bedo gi winjruok machiegni gi Nyasaye Manyalo Duto? Ka en adier, mano nyalore nade?’

BEDO GI WINJRUOK MACHIEGNI GI NYASAYE EN GIMA NYALORE

Kaluwore gi Muma, ng’ato ka ng’ato nyalo bedo gi winjruok machiegni gi Nyasaye. Muma wacho ni Nyasaye ne oluongo jaduong’ Ibrahim ni “osiepna.” (Isaiah 41:8) Ne bende weche ma jiwowa ma yudore e Jakobo 4:8 ma wacho kama: “Suduru machiegni gi Nyasaye, to en bende nosud iru.” Omiyo, nenore maler ni wanyalo bedo gi winjruok machiegni gi Nyasaye, tiende ni wanyalo bedo osiepene. To nikech ok wanyal neno Nyasaye, ere kaka inyalo ‘sudo machiegni’ gi Nyasaye kendo bedo gi winjruok maber kode?

Mondo wadwok penjono, wanon ane kaka dhano chakoga mako osiep. Osiep chakorega sama ng’ato hulo ne nyawadgi nyinge. Kae to, kaka gimedo tudore kendo goyo mbaka kuom weche manie chunygi, e kaka osiep manie kindgi medo dongo. Kendo kaka gimedo konyore, e kaka osiep manie kindgi medo bedo motegno. Wanyalo wacho ni bedo gi winjruok machiegni gi Nyasaye bende chalo kamano. We wanon ane wachno.

Be in gi osiepni moro migeno to ikiya nyinge? Ooyo. Dhako moro miluongo ni Irina ma a e piny Bulgaria wacho niya: “Ok inyal bedo gi winjruok machiegni gi Nyasaye ka ikiya nyinge.” Mana kaka ne waseneno e sula mokalo, gima ber en ni Nyasaye dwaro ni isud machiegni kode. Kuom mano, kokalo kuom Muma, Nyasaye owuon nyisi nyinge kowachoni kama: “An Jehova; ma e nyinga.”—Isaiah 42:8.

Be Jehova dewo kabe ing’eyo nyinge kendo itiyogago? Par ane wachni: Nying Nyasaye mondik gi nyukta ang’wen mag dho Hibrania ma ong’ere kaka Tetragrammaton, yudore e Ndiko mag Dho-Hibrania machon chiegni nyadi 7,000. Nyingno yudore e Muma nyading’eny moloyo nying moro amora. Mano nyiso maler ni Jehova dwaro ni mondo wang’e nyinge kendo watigo.a

Kata kamano, jomoko neno ni tiyo gi nying Nyasaye ok en gima nyiso luor, nikech Nyasaye en ng’at maler kendo manyalo duto. En adier ni ok en gima ber tiyo gi nying Nyasaye e yo marach, mana kaka ok diti e yo marach gi nying osiepni moro migeno. Kata kamano, Jehova dwaro ni jogo mohere omi nyinge luor kendo oland nyingeno. (Zaburi 69:30, 31; 96:2, 8) Ng’e ni Yesu ne opuonjo jolupne mondo olem kama: “Wuonwa manie polo, nyingi mondo obed maler.” Wan bende wanyalo miyo nying Nyasaye obed maler ka walando ne ji nyingno. Timo kamano miyo wasudo machiegni kode moloyo.—Mathayo 6:9.

Muma nyiso ni Nyasaye dewo e yo makende ‘jogo maparo nyinge.’ (Malaki 3:16) Jehova singonegi kama: ‘Anachungu malo, nimar useng’eyo nyinga. Nuluong nyinga, mi nadwoku; nabed kodu e chandruok.’ (Zaburi 91:14, 15) Ng’eyo nying Jehova kendo tiyogo en gima ochuno ka wadwaro mondo wabed gi winjruok machiegni kode.

Osiepe mogenore wuoyoga pile ka pile kaka nyalore, kendo ginyalo timo kamano wang’ gi wang’, e simo, e barua, kata e Intanet, kata e vidio. Kuom mano, mondo wabed machiegni gi Nyasaye, dwarore ni wawuo kode pile ka pile. To kara, ere kaka wanyalo timo kamano?

Wanyalo wuoyo gi Jehova kokalo kuom lamo. Kata kamano, wuoyo gi Nyasaye e lamo ok chal gi kaka wanyalo goyo mbaka gi mbesewa. Nyaka wang’e ni sama walemo, wawuoyo gi Jachuechwa, kendo Ng’ama Malo Chutho e piny gi polo. Ng’eyo mano onego ochwalwa mondo walem ka wan gi luor matut. Mondo Nyasaye owinj lamo magwa, nitie weche moko ma dwarore ni waluw. Magi gin adek kuomgi.

Mokwongo, onego walam Jehova Nyasaye kende, ok Yesu, kata “jotakatifu,” kata kido moro. (Wuok 20:4, 5) Muma wacho maler kama: “Kuom gik moko duto, kulamo kendo kusayo kaachiel gi goyo erokamano, nyisuru Nyasaye kwayou.”a (Jo-Filipi 4:6) Mar ariyo, onego walem e nying Wuod Nyasaye, ma en Yesu Kristo. Yesu nolero kama: “Onge ng’at ma biro ir Wuora mak mana kokalo kuoma.” (Johana 14:6) Mar adek, nyaka walem kaluwore gi dwaro mar Nyasaye. Muma wacho kama: “Gimoro amora ma wakwaye ka luwore gi dwache, owinjowa.”—1 Johana 5:14.

Kuom adier, osiep maber ok bi siko ka ng’ato achiel kende ema wuoyoga gi wadgi. Mana kaka osiepe oheroga wuoyo e kindgi, onego wayie mondo Nyasaye owuo kodwa kendo wawinje sama owuoyo kodwa. Be ing’eyo yo ma Nyasaye wuoyogo kodwa?

Sani, Jehova Nyasaye wuoyo kodwa kokalo kuom Wachne mondik ma en Muma. (2 Timotheo 3:16, 17) Ang’o momiyo wawacho kamano? Kuom ranyisi: Wawach ni inwang’o barua mowuok kuom osiepni migeno. Bang’ somo baruano, samoro inyalo nyiso jomoko ka in gi ilo kama: “Osiepna moro ema oa wuoyo koda!” Kata kamano, ok ae uwuoyo dhok gi dhok, to ae isomo mana weche mondikoni. E yo ma kamano, sama isomo Muma, iyie mondo Jehova owuo kodi. Dhako miluongo ni Gina, ma ae wawuoyo kuome e sula mokwongo, wacho kama: “Aparo ni ka adwaro ni Nyasaye onena kaka osiepne, nyaka asom ‘barua’ momiyowa ma en Muma.” Omedo wacho kama: “Somo Muma pile ka pile osemiyo asudo machiegni ahinya gi Nyasaye.” Be iyiega mondo Jehova owuo kodi pile ka pile kuom somo Wachne ma en Muma pile ka pile? Timo kamano biro miyo iwinj ka in machiegni ahinya gi Nyasaye.

“Nyisa gimoro amora midwaro, to abiro timonigo.” Mago gin weche ma dak inyis ng’at ma ikiya kata ma ok ing’eyo malong’o. Kata kamano, nyalo bedo mayot nyiso osiepni migeno wechego. Osiepe mogenore oikorega timo ne wadgi gima okwayo.

Muma nyiso ni kinde duto Jehova timoga gik ma ong’eyo ni biro moro joma lame. Kuom ranyisi, Ruoth Daudi, ma ne nigi winjruok machiegni gi Nyasaye nowacho kama: “A Jehova Nyasacha, honini misetimo ging’eny, gi wecheni bende miparo kuomwa: . . . ging’eny moloyo kweno!” (Zaburi 40:5) E wi mano, Jehova timo gik mabeyo kata ne joma pok ong’eye maber, ka ‘oyieng’ogi gi chiemo kendo ka opong’o chunygi gi mor.’—Tich Joote 14:17.

Nikech Jehova ohero timo ne ji gik ma miyo gibedo mamor, omiyo jogo ma dwaro bedo osiepene onego otim gik ma miyo ‘chunye mor.’ (Ngeche 27:11) Kata kamano, en ang’o sie ma inyalo timo mondo imor Nyasaye? Muma dwoko kama: “Wiu kik wil gi timo maber kendo pogo gik ma un-go ne jomamoko, nikech Nyasaye mor ahinya gi misengni ma kamago.” (Jo-Hibrania 13:16) Be mano nyiso ni timo maber kod pogo giwa ne jomoko kende ema dwarore mondo wamor Jehova?

Muma wacho kama: “Ka ng’ato onge gi yie, ok onyal moro Nyasaye e yo malong’o.” (Jo-Hibrania 11:6) Omiyo, “Ibrahim noketo yie kuom Jehova” eka bang’e “ne oluonge ni osiep Jehova.” (Jakobo 2:23) Yesu bende ne ojiwo ni dwarore ni ‘wanyis yie kuom Nyasaye’ ka wadwaro yudo gueth mag Nyasaye. (Johana 14:1) Omiyo, ere kaka wanyalo bedo gi yie ma Nyasaye dwaro ni joma oywayo ire obedgo? Inyalo chako gi puonjruok pile ka pile Wach Nyasaye ma en Muma. Ka itimo kamano, ibiro bedo gi “ng’eyo malong’o kuom dwarone,” kendo mano biro konyi ‘bet ma long’one chuth.’ Kae to, kaka imedo bedo gi ng’eyo makare chuth e wi Jehova kendo tiyo kod gik ma ipuonjori e wi chikene makare, e kaka yie ma in-go kuome biro dongo, kendo Nyasaye biro sudo machiegni kodi.—Jo-Kolosai 1:9, 10.

Inyalo timo ang’o mondo ibed gi winjruok machiegni gi Nyasaye? Wasenono okenge maluwogi monego ikaw mondo ibed gi winjruok machiegni gi Nyasaye:

1. Ng’e nying Nyasaye, ma en Jehova kendo itigo.

2. Wuo gi Nyasaye pile ka pile kokalo kuom lamo kendo ipuonjri Wachne ma en Muma.

3. Bed gi kinda e timo gik ma moro Jehova.

Kaluwore gi weche mokwan-go, be inyalo wacho ni itimo gik ma dwarore mondo ibed gi winjruok machiegni gi Nyasaye? Be nitie kuonde ma ineno ni onego itimie dongruok? En adier ni samoro ok nyal bedoni mayot timo mano, kata kamano, we wanon ane ber ma wayudo ka watimo kamano.

Jennifer ma a e piny Amerka wacho kama: “Kinda moro amora ma ng’ato timo mondo obed gi winjruok machiegni gi Nyasaye ok dhi ka nono. Winjruok ma kamano kelo gueth mang’eny ahinya: wamedo geno Nyasaye, wamedo ng’eyo kido ma en-go, to e wi mago duto, wamedo here. Mano e yor ngima maberie moloyo!”

Kapo ni diher bedo gi winjruok maber gi Nyasaye, Joneno mag Jehova nyalo konyi timo kamano. Ginyalo chano mondo gipuonjre kodi Muma ma onge chudo. Bende gigweli e chokruogegi ma ipuonjruokie Muma e Od Romo man machiegni kodi, kama ibiro morie ahinya bedo kod joma okawo mapek winjruok margi gi Nyasaye.a Ka itimo kamano, ibiro winjo mana kaka jandik zaburi ma ne owacho kama: “Sudo machiegini gi Nyasaye okelona ber.”—Zaburi 73:28.