Be ne en gima nyalore mondo Nyasaye opar Daudi? Be Nyasaye nyalo pari in iwuon? Ji mang’eny paro ni Nyasaye ma nyalo duto ok odich kodgi kata matin. Ang’o momiyo giparo kamano?

Achiel kuom gimomiyo giparo kamano en nikech Nyasaye ni e kido mopogore gi mar dhano. Kopim dhano gi Nyasaye, ogendni ‘chalo gi ton mar pi achiel e i dapi, okwan-gi kaka buru matin e rapim mar ratil.’ (Isaiah 40:15) Jandiko moro ma kindegi noketo kiawa kuom Nyasaye kowacho ni: “En gima nyalo bedo fuwo mogik ka ng’ato nyalo paro ni nitie Nyasaye kamoro ma dewe kendo modich gi gik motimo.”

To komachielo bende, nitie jomoko ma paro ni timbegi e momiyo Nyasaye ok pargi. Kuom ranyisi, dichwo moro miluongo ni Jim wacho kama: “Nikech ne an ng’at ma iye wang’ piyo, ne asiko alemo mondo abed ng’ama muol kendo ma hore. Kata kamano, bang’ lemo, ne adok kendo e timnano. Gikone, chunya ne ojok ni an ng’ama timbene richo ma kata atim mana ang’o, to Nyasaye ok nyal konya.”

Be inyalo wach ni Nyasaye ni mabor kodwa ma ok onyal nenowa? Kuom adier, owinjo nade kuom dhano ma gin chuechne ma ok kare? Ka Nyasaye owuon ok onyisowa weche kuome, onge dhano ma nyalo dwoko penjogo e loye. Kata kamano, Muma ma en wach Nyasaye mokudho gi muche jiwowa ni Nyasaye ok ni mabor ma ok onyal konyowa. Muma wacho kama: “To adier ok obor kodwa ng’ato ka ng’ato.” (Tich Joote 17:27) Sula ang’wen ma luwo mae biro wuoyo kuom gima Nyasaye nyisowa e wi kaka oparo ng’ato ka ng’ato kuomwa kod kaka nonyiso kidono ne jomamoko ma chal kodi.

GIMOMIYO JOMOKO KETO KIAWA: Kaluwore gi nonro moro ma nyocha otim machiegni, wachore ni nitie chuech mamoko (planet) ma ket gi pinywani ma kwan-gi dirom bilion 100. Nikech gik ma Nyasaye ochueyo e piny gi polo ng’eny, ji mang’eny penjorega niya: ‘Ang’o ma dimi odij mana gi ng’iyo dhano modak e pinywani to kuonde mamoko to nitie?’

GIMA WACH NYASAYE PUONJO: Nyasaye ok omiyowa Muma kae to ojwang’owa kamano. Kar mano, onyisowa kama: ‘Nang’adni rieko ka wang’a neni.’—Zaburi 32:8.

arie ranyisi mar Hagar, ma ne en nyar Misri ma ne odak e kind higni mag 2000 nyaka 1900 Ka Ndalowa Podi. Nikech Hagar ne ochayo ruodhe ma Sarai kendo nikech gik ma ne Sarai timone ok ne more, mano ne omiyo Hagar oringo modhi e thim. To nikech Hagar ne otimo gima rach, be Nyasaye ne ojwang’e? Muma wacho kama: “Malaika mar Jehova nonwang’e.” Malaikano ne ojiwo Hagar kama: “Jehova osewinji e masichi.” Kae to Hagar ne owacho ne Jehova niya: “In Nyasaye maneno.”—Chakruok 16:4-13.

“Nyasaye maneno” neni. Par ane ranyisini: Miyo ma jahera ritoga nyithinde to ahinya wuon, nyithinde ma pod tindo. Mano en nikech nyithindo matindo e ma dwarore ni orit moloyo. Kamano bende e kaka Nyasaye ritowa kata nenowa, to moloyo, sama waonge nyalo kendo wan gi parruok mang’eny. Jehova wacho niya: “Adak ka maler ma malo, kod en man gi chuny mamuol, malokore kuom richo, mondo aduog chuny jo mamuol, ami chuny jo molokore kuom richogi oduogi.”—Isaiah 57:15.

Kata kamano, inyalo parori niya: ‘En yo mane ma Nyasaye rangago kata nenago? Dibed ni ong’iyo mana kita ma oko, koso onona mong’e gima chanda gadier?’

GIMOMIYO JOMOKO KETO KIAWA: Ji mang’eny paro ni Nyasaye odich mana gi gik maricho ma dhano timo, kendo gineno ni ok giwinjore yudo ng’wonone nikech gigak. Kendra ma ne nigi tuo mar parruok ne winjo ka chunye chande nikech ne oneno ni ok onyal rito chike mag Nyasaye e yo makare kaka dwarore. Omiyo, ne owacho niya: “Ne aweyo lemo.”

GIMA WACH NYASAYE PUONJO: Jehova ok ng’i mana gik maricho mitimo, kendo ong’eyi maber. Muma wacho niya: “Ong’eyo kitwa; oparo ka wan mana buch lowo.” E wi mano, ok ‘ochulwa kaka timwa mamono obet,’ to oikre ng’wononwa ka walokore gadier.—Zaburi 103:10, 14.

Par ane ranyisi mar Daudi ma ne en ruodh Israel ma ne owuo kuome e sula motelo. Nowacho ne Nyasaye kama e lamo: “Wang’i noneno chakruok mar denda, fuonde duto mag denda nondik e kitapi . . . A Nyasaye, ranga, ing’e chunya.” (Zaburi 139:16, 23) Ee, Daudi ne ni gadier ni kata obedo ni ne otimo richo, ma moko kuomgi ne dongo nyowuoyo, Jehova ne ofwenyo ni ne oloko chunye gadier.

Jehova ong’eyi maber moloyo dhano moro amora. Muma wacho niya: “Dhano ong’iyo kit nenruok ma oko, to Jehova ong’iyo chuny.” (1 Samuel 16:7) Nyasaye ong’eyo maber gik ma nyalo miyo itimo gimoro, kaka anyuola miae, kaka ne ipon, alwora ma intieree, kod kido ma in-go iwuon. Kata obedo ni kinde moko iketho, Nyasaye neno kinda mitimo mondo imore.

Kata kamano, ere kaka Nyasaye tiyo gi nyalo ma en-go mar ng’eyi maber mondo ohoyigo?

GIMOMIYO JOMOKO KETO KIAWA: Kata mana e seche ma jomamoko dwaro hoch gadier, jogo nenoga ni kwayo Nyasaye mondo okonygi loyo chandruogegi en ich lit. Miyo moro miluongo ni Raquel wacho kama: “Sama aneno kaka ji mang’eny nigi chandruoge modhuro moloyo ma an-go, mano miyo aweyo kwayo Nyasaye kony.”

GIMA WACH NYASAYE PUONJO: Kinde mang’eny Nyasaye osebedo ka konyo kendo hoyo ji. Ji duto manie piny onyuol e richo kendo mano e gima monogi timo kaka Nyasaye dwaro e wang’e kak. Kata kamano, Nyasaye “noherowa, kendo nooro Wuode ma miderma odok misango mar richowa.” (1 Johana 4:10) Kokalo kuom tho mar Yesu kaka misango, Nyasaye osetiyo gi misangono e weyonwa richowa, e miyo wabed gi chuny mokue ma ok ketnwa bura, kendo bedo gi geno mar yudo ngima mochwere e piny manyien ma onge chandruok.a Kata kamano, be misangono ne ochiw achiwa ne dhano duto koso Nyasaye ne ochiwe nikech noheri in iwuon?

Ne ane gima jaote Paulo nowacho e wi misangono. Paulo ne mor ahinya gi misango mar Yesu mondiko niya: ‘Angima kuom yie man kuom Wuod Nyasaye ma nohera, kendo nochiworena.’ (Jo Galatia 2:20) En adier ni Yesu notho ka Paulo ne pok obedo Jakristo. Kata kamano, Paulo noneno misangono kaka mich ma Nyasaye nomiye owuon.

Misango mar Yesu en mich makende ma Nyasaye miyi in iwuon bende. Michno nyiso ayanga kaka in ng’at ma Nyasaye ohero gadier. Michno nyalo miyi hoch “mochwere kod geno maber,” kendo onyalo ‘tegi e tim mabeyo duto, gi weche mabeyo duto.’—2 Jo Thessalonika 2:16, 17.

Kata kamano, Yesu nochiwo ngimane chiegni higni 2,000 mokalo. Ang’o ma nyiso e kindegi ni Nyasaye ywayi ire?

GIMOMIYO JOMOKO KETO KIAWA: Ng’eny joma oyie kuom Nyasaye neno kata winjo ni ok gin machiegni gi Nyasaye. Christina, dhako ma a e piny Ireland, ma ne ok bare dhi e kanisa juma ka juma wacho kama. “Ne ang’eyo ni Nyasaye e ma ne ochueyo gik moko duto, kata kamano ne ok ang’eye maber. Ne ok awinj ka an machiegni kode kata dichiel.”

GIMA WACH NYASAYE PUONJO: Seche ma walondni kata warwenyo, Jehova ok jwang’wa ngang’. Yesu ne otiyo gi ranyisini e lero kaka Nyasaye dewowa: “Ka ng’at moro ni gi rombe piero apar achiel, kendo achiel kuomgi orwenyo, ok oweyo piero ongachiel gi ongachielgo, to odhi e gode, omanyo mano morwenyo koso?” Ranyisino puonjowa ang’o? “Kamano bende, ok en dwaro mar Wuonu me polo ni achiel kuom jo matindogi olal.”—Mathayo 18:12-14.

Moro ka moro kuom “jo matindogi ” duong’ e wang’ Nyasaye. Ere kaka Nyasaye ‘manyo mano morwenyo’? Kaluwore gi ndiko ma ne ochakgo sulani, Jehova ywayo ji ire.

Ne ane okang’ ma ne Nyasaye okawo mar ywayo joma chunygi tir. E kinde Jokristo mokwongo, Nyasaye ne ooro japuonjre Yesu moro miluongo ni Filipo mondo ochung Ja-Ethiopia moro mondo olerne tiend weche moko ma ne okor e Muma ma ne oyudo osomo. (Tich Joote 8:26-39) Bang’e, Nyasaye ne ooro jaote Petro mondo odhi olim jatend jolweny moro ma Ja-Rumi ma nyinge Kornelio ma ne osebedo ka lemo mondo ong’e yo ma dolamgo Nyasaye e yo makare. (Tich Joote 10:1-48) Nyasaye bende ne omiyo Paulo kaachiel gi joma ne ni kode odhi e aora ma ne ni oko mar dala mar Filipi. Ka ne gichopo kuno, ne giyudo dhako moro ma nyinge Ludia “ma ne lamo Nyasaye,” kendo “Ruoth noyawo chunye mondo owinj weche.”—Tich Joote 16:9-15.

Ranyisigo duto nyiso ni Jehova ne otimo duto mondo joma manyo Nyasaye gadier oyud thuolo mar ng’eye. Gin ng’a gini e kindegi ma limo ji e utegi kod kuonde mamoko duto ma ji yudoree mondo ginyisgi weche Nyasaye e Muma? Ji mang’eny nyalo dwoko penjono ni, “Joneno mag Jehova.” Penjri ane niya, ‘Be dibed ni Nyasaye ywaya ire kotiyo kodgi?’ Wajiwi mondo ilem kikwayo Nyasaye mondo okonyi iyie gi okang’ ma Nyasaye kawo mondo oywayigo ire.a