Hera e Gima Duong’ Mamiyo Tij Lendo Yudo Nyak Maber
1 “Biuru ira, . . . to anamiu yueyo.” (Math. 11:28) Wechego ma jiwo chuny nyiso kaka Yesu nohero ji gi hera matut. Kaka jotich ma Jokristo, wagombo ni mondo waluw ranyisi ma Yesu noketo ka wanyiso hera ne jogo ma chunygi onyosore nikech pinyni ma hera ongeye. Ere kaka wanyalo timo kamano e tijwa mar lando wach maber?
2 E Wuoyo gi Ji: Hera ma Yesu ne oherogo jomoko ne miyo oikore kawo thuolo moro amora mantie mondo omi oland wach maber. (Joha. 4:7-14) Hera biro miyo wabed gi chir mar lendo ne ng’ato kata ka dabed ni ok wan e tij lendo e sechego. Nyako moro ma jahigini auchiel ne olendo ne dhako moro ma ne onwang’o obet machiegni kode e ot ma jotuwo ritoe laktar. Ang’o ma ne omiyo otimo kamano? Ne owacho kama, “Dhakono ne nenrena ka ng’at ma onego ong’e wach Jehova.”
3 Wanyalo nyiso ni wahero ji ka wabuonjo kodgi kendo wuoyo gi dwol mamor. Bende wanyalo nyiso ni waherogi ka wachiko itwa malong’o ne paro ma gichiwo, ka wanyiso ni chandruokgi mulo chunywa, kendo ka wanyiso ni wadewogi gadier. (Nge. 15:23) Kuom luwo ranyisi mar Yesu, wach Pinyruoth e monego wajiw ahinya kaachiel gi wach hera mang’won ma Jehova nyiso ji.—Math. 24:14; Luka 4:18.
4 E Tim: Yesu ne nyiso chuny mar dewo jomoko e chandruokgi kotimo gino madwarore mondo omi okonygi. (Math. 15:32) Wan bende wanyalo yudo thuolo mar timo ne jomoko timbe manyiso hera mang’won ka wan e tijwa mar lendo. Nyaminwa moro ne ofwenyo ni dhako moro ne ok winj dhok ma ng’at ma ne goyone simo wacho. Omiyo ne ochiwore mar konyo dhakono e winjo tiend weche ng’at ma ne goyo simo-no. Tim mang’wonno ne oyawo ne nyaminwano thuolo mar wuoyo kuom Ndiko, mi dhakono ne oyie puonjre Muma. E ranyisi machielo, owadwa moro ma ne dok timo limbe ne onwang’o ka wuon ot chandre e chunye nikech sofa moro mapek ne omokone e dhoot. Bang’ chiwo kony e ting’o sofano, owadwano ne orwaki ei ot, mobet e sofano kochako puonjruok Muma gi jalo.
5 Sama watiyo tij lendo, wanyiso herawa kuom Nyasaye koda jowetewa. (Math. 22:36-40) Nyiso hera ma kamano ka wawuoyo gi ji koda e tim, konyo jogo ma chunygi ni kare e ng’eyo ni wan gi adiera.