“Ok Adwar Winjo”
1 Yot winjo ka jomoko wacho kamano kuonde moko ma walendoe. Ang’o mabiro konyowa mondo kik chunywa nyosore ka walendo kuonde ma ji ok dwar winjo? Ang’o ma wanyalo timo mondo wami ji obed gi gombo kata siso mar winjo wach maber?
2 Kik Mor Ma In-go Lal: Ng’eyo gimomiyo jomoko ok dwar winjo wach maber, biro konyowa rito mor kata ilo ma wan-go mar lando Wach Nyasaye. Jogo ma ne opuonj ni gik moko duto ne ok ochwe to ni ne gisieko mana kendgi kata joma ne odongo e anyuola ma ji ok oyie ni Nyasaye nitie, nyalo bedo ni podi ok gise nono ber mag gigo ma Muma puonjo. Jomoko nyalo bedo ni osin gi wuondruok ma gineno ei dinde. Jomoko to nyalo bedo ni ojok gi piny nikech gionge gi geno moro amora. (Efes. 2:12) Moko nyalo bedo ni wachni ‘ok donjnigi’ nikech chunygi ool kod parruok mag ngima.—Math. 24:37-39.
3 Kata obedo ni jomoko ok dwar winjo, wanyalo yudo mor kuom tijwa mar lendo, nikech ng’eyo ni kinda ma watimo kelo ne Jehova duong’. (1 Pet. 4:11) E wi mano, nyiso ji adiera kata ne jogo ma podi ok ong’eyo ber mantie e adiera ma Muma oting’o, jiwo yie marwa. Wadhiuru nyime gi neno jogo modak e alworawa mana kaka Jehova nenogi. Nokecho jogo ma ne odak e dala mar Ninawi nimar ne ‘ok ginyal pogo lwetgi ma korachwich gi lwetgi ma koracham.’ (Jona 4:11) Jogo modak e alworawa onego owinj Wach Maber! Kuom mano, ok onego chunywa ol, to onego wadwar yore mag miyo joma walendoni obed gi siso mar winjo Wach Maber ma Muma oting’o.
4 Wuouru Kuom Gik Machando Chuny Ji: Inyalo chako lendo ka iwuoyo kuom wach moro machando chuny ji e gweng’ kendo ipenj wuon ot ochiw pache kuom wachno. Chik iti maber seche ma owuoyo, eka bang’e inyise weche ma Muma hoyo godo chunywa. Bang’ masira ma ne otimore e gweng’ moro, Janeno moro ne dhi ot ka ot ka ohoyo chuny jogo ma ne ni e gweng’no. Ne owacho kama: “Ne apo mana ka ji oyie wuoyo koda, kendo ne wawuoyo maber ahinya chieng’no nikech ne anyiso ni adewogi.”
5 Pinyruodh Nyasaye biro tieko chandruok moro amora ma yudo dhano sani. Tem fwenyo gik ma chando chuny wuon ot ahinya. Onyalo yieni mondo ilerne geno ma Muma chiwo. Ka ok kamano, ‘ginyalo dwaro winji kendo kuom wachno’ odiechieng’ moro machielo.—Tich 17:32.