Lando Wach Pinyruoth​—Lando Wach Maber e Piny Ngima

WAWACH ni iikori dhi e tij lendo gokinyi e odiechieng’ ma ok idhi e tij yuto. Iywari matin nikech iwinjo ka ijony. Chunyi moro nyisi ni nyalo bedo maber ka iyueyo ayueya e ot chieng’no. Kata kamano, ilemo kae to idhi adhiya e tij lendo. E grup, ipogi gi nyaminwa moro ma hike ng’eny mosebedo ka tiyo ne Jehova kuom higni modhuro, kendo sinani mare kod yo mokechogo ji mori sidang’. Sama udhi nyime gi lendo, ichako paro kaka oweteni gi nyimineni e piny mangima bende odich mana e tich achiel achielno ka gitiyo gi buge ma chal gi ma in-go, kendo gin be giyudo tiegruok ma chal gi ma iyudoga. Sama idok e ot godhiambo, iwinjo e chunyi ka imor kendo itek, kendo ineno ni ne itimo maber dhi e tij lendo chieng’no.

Tij lendo e tich maduong’ ahinya ma Pinyruodh Nyasaye odichgo e kindegi. Yesu ne owacho chon ni tij lando wach maber ne idhi tim e okang’ malach ahinya e ndalo mag giko. (Mat. 24:14) Ere kaka weche ma ne owachogo osebedo ka timore? E kare mar ariyoni, wabiro nono ni to jomage mosebedo ka lando wach maber ma konyo ji tara gi tara fwenyo ni Pinyruodh Nyasaye nitie adier. Bende, wabiro nono yore ma gisebedo ka gitiyogo e timo tijno, kod gige tich ma gisebedo ka gikonyorego.