[Weche manie ite mar 3]

Chenro Manyien Makonyowa Mondo Wawere gi Remo

Bura Maduong’ mar Joneno mag Jehova oseyie mondo oriw weche manie fom mar DPA, gi weche manie kad mar Mwelekezo wa Mapema Kuhusu Tiba/Ondoleo la Hatia [Advance Medical Directive/Release] obed kad achiel mating’o dwach ng’ato kuom yore mag thieth, to kadno wabiro luongo ni DPA [durable power of attorney].

Onego ipong’ kad mar DPA mar piny ma idakie. Kad mar DPA tiyo kamoro amora e piny ma idakie, tarige bende ok rum, to bende kadno biro nyiso dwaro mari kuom yore mag thieth kata kapo ni idhi e pinje ma oko. Onego ipong’ kad manyien mar DPA ka (1) idwaro loko gimoro e kadni mar DPA, kaka loko dwaro ma in-go, jogo miketo mondo owuo e loyi, loko nonro, namba mag simo, kata (2) ka kadni mar DPA olal kata okethore.

Pong’o kad mar DPA en wach monego oket e lamo kendo ng’ato onego opong’e mos ka en pacho. Kata kamano, kapok iketo sei, dwarore mondo iluw machiegni ahinya weche modok korka chike. Kuom ranyisi, ka kadni wacho ni ji ariyo onego one ka iketo sei, onego gibedie sama iketo sei. Jorit puonjruok mar buk nyalo kawo thuolo kinde ka kinde mar konyo jogo ma podi ok opong’o kad maggi ka mano dwarore.

Kapok ibano kadno, tim fotokopi maber ne ji ariyo miyiero mondo owuo e loyi, machielo itim ne laktar to moro bende obed ma ikano. Bende inyalo dwaro miyo joodu fotokopi moko koda jagoro mar kanyakla. Fotokopigo onego ogo konchiel kende e kalatas mar A-4, ka kad mar DPA ni e diere tir. Kad mari mar DPA wuon ema onego iwuothgo, to ok fotokopi.

Kitambulisho [Identity Card] mar nyithindo ma oketie tarik 3/99 pok oloki, kadno en mar nyithindo ma podi ok obatisi ma jonyuolgi gin Joneno. Jonyuol onego one ni kad mar nyathi ka nyathi opong’ maber moketie sei, kendo ni nyithindo ting’e kaka dwarore.

Jolendo ma podi ok obatisi nyalo tiyo kod weche manie DPA kod manie Kitambulisho ka gindikogo dwachgi koda mag nyithindgi e weche mag thieth. Jagoro onego ochiw kad mar DPA ne jolendo duto ma eka nyocha obatisi machiegni.

RIT

Rit

Aneno Nade Gik Mawuok Kuom Ng’injo Maloso Remo Kaachiel gi Thieth Mitiyoe gi Remba Awuon?

Muma chiko Jokristo ni mondo giwere gi “remo.” (Tich 15:20) Kuom mano, Joneno mag Jehova ok oyie ni mondo omedgi remo kaka en oduto, kata moro amora kuom ng’injo ang’wen maloso remo—tiende ni, ng’injo marokwere [red cells], marochere [white cells], mamiyo remo poto [platelets], koda pi remo [plasma]. Joneno mag Jehova bende ok gol rembgi mondo omi ji, kata kano rembgi mondo obi omedgi.—Lawi 17:13, 14; Tich 15:28, 29.

Gik mawuok kuom ng’injo maloso remo gin ang’o, to ang’o momiyo wach tiyo kodgi e thieth en gima owene Jakristo mondo oyier en owuon?

Gik mawuok kuom ngi’njo maloso remo yudore kitiyo kod lony mar jothieth mar donyo kata pogo ng’injogo matindo tindo (fractionation.) Kuom ranyisi, plasma, ma en achiel kuom ng’injo ang’wen maloso remo, inyalo medo donyo matindo mi ogol: pi madirom 9 e wi apar; ogol proten, kaka albumin, globulin, kod fibrinojen chiegni pasent 7; hormones, vitamins, electrolytes kod moko matindo tindo pasent 1.5.

Be chik mawacho ni Jokristo owere gi remo okwero kata tiyo gi gik migolo kuom ng’injogo mag remo? Ok wanyal keto chik. Muma ok chiw chik achiel kachiel e wi wach tiyo gi gigi.a En adier ni gik manie ng’injo mag remo, igolo kuom remo ma ji ochiwo mondo oti godo e yore mag thieth. Jakristo ka Jakristo onego oyier e chunye en owuon kabe obiro yie kata ok obi yie tiyo gi gigi e thieth.

Seche miyiero gima inyalo timo e wi wachni, par ane penjo maluwogi: Be ang’eyo ni tiend tamruok gigo duto mawuok kuom ng’injo mag remo, nyiso ni ok abi yie gi moko kuom yedhe kaka mag kedo gi kute kod tuoche, kata ma konyo remo poto kik chwer? Be anyalo lero ne laktar gimomiyo ayie kata ok anyal yie thieth mitiyoe gi moko kuom gik mawuok kuom ng’injo mag remo?

Ang’o momiyo yore moko mag thieth mitiyoe gi remba awuon en gima an ema onego ayie kata kik ayiego?

Kata obedo ni Jokristo ok gol rembgi mondo omi ji, kata kano rembgi mondo obi omedgi, Muma ok kwed achiel kachiel yore moko mag thieth kata mag pimo remb ng’ato owuon. Kuom mano, ng’ato ka ng’ato onego otim yiero gi chunye owuon, kabe obiro yie kata ok obi yie yore moko mag thieth mitiyoe gi rembe owuon.

Seche miyiero gima inyalo timo e wi wachni, penjri penjo maluwogi: Kapo ni remba moko ibiro chiko mondo oringi oko mar denda, ma seche moko inyalo kata mana chunge matin kuom ringo, be chunya ma iye podi biro yie ni remono podi en fuon mar denda mamiyo kik ‘oole piny’? (Rapar. 12:23, 24) Be chunya michiko gi Muma biro chandore ka seche mag thieth, remba moko inyalo gol ma timne gimoro, ma chak dwoke e denda kendo? Be ang’eyo ni tamruok yore mag thieth duto mitiyoe gi remba awuon nyiso ni ok abi yie gi thieth kaka mar lwoko remo gi masin [tiende ni dialysis] kata tiyo gi masin matiyo tij adundo gi obo [tiende ni heart-lung machine]? Be aseketo wachni e lamo ka podi ok ayiero gima adwaro ni otimna?

An ayiero timo ang’o?

Non ane fom ariyo manie ite maluwogi. Fom Na. 1 nyiso moko kuom gik mawuok kuom ng’injo mag remo kendo kaka pile ihinyo tiyo kodgi e thieth. Ndik kabe iyie kata ok iyie tiyo gi moro amora kuom gigo. Fom Na. 2 nyiso yore mag thieth ma ithoro tiyogo gi rembi iwuon. Ndik kabe ibiro yie kata ok ibiyie tiyo gi yoregi. Fom ariyogo ok gin barupe moting’o chik, to kata kamano dwoko ma iketo kuomgi nyalo konyi pong’o kad ma imiyogo ng’at machielo teko mar chung’ni, matiende ni DPA (durable power of attorney).

Gima iyiero timo onego obed mari iwuon kendo ok onego otenore e gima chuny ng’at machielo paro. Kamano bende, onge ng’at monego okwed gima Jakristo machielo oyiero timo e wi wachni. Kuom wechegi duto “ng’ato ka ng’ato nyaka oting’ ting’ne owuon.”—Gala. 6:4, 5.