SOMO NAMBA 6

Nyiso Maler Kaka Ndiko Tiyo

Johana 10:33-36

GIMA INYALO TIMO: Kik isom asoma ndiko kae to idhi e wach machielo. Ne ni jowinjo oneno maler tudruok mantie e kind ndiko misomo kod wach midwaro jiwo.

KAKA INYALO TIMO MANO:

Ng’e weche moting’o puonj madongo. Bang’ somo ndiko, wach weche moko ma yudore e ndikono ma jiwo puonj maduong’ miwuoye. Inyalo timo mano kuom nwoyo wechego, kata penjo jowinjo penjo mabiro konyogi fwenyo wechego e ndiko.

Ka itiyo gi weche mamoko e wacho gima ndiko wuoye, ne ni jowinjo pod nyalo tudo wach maduong’ miwuoye kod gima nie ndiko.
Jiw wach miwuoye. Ka nisewacho ne jowinjo gimomiyo isomo ndiko moro, nyisgi maler kaka weche mojiw e ndikono otudore gi gimomiyo isome.

Sama ilero ndiko moro, we Muma koyawore. Mani konyo jowinjo mondo otud weche miwacho kod ndiko ma ia somo.
Nyis e yo mayot kaka ndiko tiyo. Kik iwach weche mang’eny ma ok ochuno. King’eyo gima jowinjo ong’eyo e wi wach miwuoye, mano biro konyi fwenyo weche monego ijiw mondo puonj owinjre maler kendo ging’e kaka ginyalo tiyo gi puonjno.