Bang’ ka Adam gi Hawa nosewuok e puodho mar Eden, ne ginyuolo nyithindo mang’eny. Wuodgi maduong’ ma niluongo ni Kain ne obedo japur, to Habil wuodgi mar ariyo nobedo jakwadh rombe.

Chieng’ moro, Kain gi Habil ne ochiwo ne Jehova misango. Be ing’eyo ni misango en ang’o? En mich makende. Jehova ne mor gi misango ma ne Habil ochiwo, kata kamano, ne ok omor gi mar Kain. Mano ne omiyo Kain iye owang’ matek. Jehova ne osiemo Kain ni ich-wang’ ma ne en-gono ne nyalo miyo otim gima rach. Kain ne ok owinjo Jehova.

Kar mondo Kain owe ich-wang’, en nonyiso Habil niya: “Wadhi waba e pap.” Ka koro ne gin kendgi e pap, Kain nogoyo Habil mi onege. Jehova ne otimo ang’o? Nokumo Kain kuom riembe mondo odhi odag mabor gi joodgi. Ne otamo Kain duogo dalagi chuth.

Ang’o ma wechegi puonjowa? Sama waneno ka gik moko ok timre kaka wadwaro, iwa nyaloga wang’. Sama wawinjo ka wach moro chako wang’o iwa, kata sama jomamoko osiemowa ni wawe ich-wang’, ber ka watimo lokruok mapiyo ka pok ich-wang’ omwomowa ma watimo gimoro marach.

Wi Jehova ok nyal wil gi Habil nikech Habil ne ohere kendo ne otimo gik mabeyo. Nyasaye biro chiero Habil mi obed mangima e kinde ma piny duto biro bedo paradiso.

Mosmos, ji nochako bedo mang’eny e piny. Ng’eny ji ne timo gik maricho. Kata mana malaike moko e polo bende nobedo maricho. Malaike marichogo nodar e polo ma gibiro e piny. Be ing’eyo gimomiyo ne gitimo kamano? Ne gidwaro ni gibed kaka dhano mondo gikend mon ma ne nie piny.

Malaikego nonyuolo gi mon-go nyithindo ma yawuoyi. Yawuotgi nobedo roteke ahinya kendo ne gihero goyo ji. Ne gihinyo ji. Jehova ne ok nyal ling’ aling’a to gik marichogo timore. Omiyo, nong’ado ni ne odhi kelo koth maduong’ ma ne dhi tieko joma richo duto.

Kata kamano, ne nitiere ng’at moro ma ne opogore ahinya. Ng’atno nohero Jehova. Nyinge ne en Noa. Noa ne nigi chiege kaachiel gi yawuote adek ma ne gin Shem, Ham, gi Jafeth, kendo yawuotego bende ne nigi mon. Jehova nonyiso Noa mondo oger yie maduong’ ma ne dhi rese gi joode e koth maduong’ ma ne birono. Yie ma ne Noa dhi gero ne en sanduk mang’ongo ma ne nyalo lewore e wi pi. Jehova nonyiso Noa ni orwak le mang’eny mopogore opogore e yie mondo gin be oresgi.

Mapiyo bang’ mano, Noa nochako gero yie. Noa gi joode notieko gedo bang’ higni 50 kama. Ne gigere mana kaka Jehova nonyisogi ndi! Kinde ma ne gidhi nyime gi gedo, Noa ne miyo ji siem ni koth maduong’ ne biro. Kata kamano, ji ne otamore winje.

Gikone, sa mar donjo e yie nochopo. We wane ane gima ne otimore bang’ mano.