2 Timotheo 1:7​—“Nyasaye Ok ne Omiyowa Chuny mar Bedo Maluor”

“Nikech Nyasaye ok ne omiyowa chuny mar bedo maluor, to nomiyowa chuny mar bedo gi teko, hera, kod mar bedo jo ma pachgi long’o.”​—2 Timotheo 1:7, Loko mar Piny Manyien.

“Nyasaye ne ok omiyowa chuny mar bedo ngoche, to nomiyowa chuny mar bedo gi teko, gi hera, kod ritruok.”​—2 Timotheo 1:7, The Bible in Luo, 1976.

Tiend Ndiko mar 2 Timotheo 1:7

Nyasaye nyalo miyo ng’ato chir mar timo gik makare. Nyasaye ok dwar ni ng’ato ang’ata obed “maluor” kata ngoro, tiende ni luoro ma nyalo miyo ng’ato kik tim gik ma Nyasaye dwaro.

Ne ane kido moko adek mag Nyasaye miwuoye e ndikono ma nyalo konyo ng’ato loyo luoro.

“Teko.” Jokristo osebedo ka tiyo ne Nyasaye ka gin gi chir kata sama giromo gi jowasigu, kata sama giromo gi chal moko matek. Ok giwega mondo luoro ologi. (2 Jo-Korintho 11:23-27) Ere kaka gisebedo ka gitimo kamano? Jaote Paulo nowacho niya: “E weche duto, an gi nyalo kokalo kuom jal ma miya teko.” (Jo-Filipi 4:13) Nyasaye nyalo miyo jotichne “teko mokalo ma pile” mondo gilo pek moro amora ma ginyalo romogo.​—2 Jo-Korintho 4:7.

“Hera.” Hera matut ma Jakristo oherogo Nyasaye nyalo konye chung’ motegno sama otimo gik makare. Kamano bende, hera ma Jakristo oherogo dhano wetene miyo oketo dwach jowetene mokwongo ne mage, kata ka po ni timo kamano kelone akwede kod pek moko.​—Johana 13:34; 15:13.

“Jo ma pachgi long’o.” Muma tiyoga gi wechego kowuoyo kuom nyalo ma Jakristo nigo mar timo yiero mabeyo ka luwore gi puonj mag Muma. Ng’at ma pache long’o nyalo chung’ motegno kendo siko ka pache liw kata sama okaloe chandruoge madongo. Onyalo timo yiero ma nyiso ni oneno gik moko kaka Nyasaye nenogi, kendo ong’eyo ni winjruokne gi Nyasaye duong’ moloyo luwo pach dhano.

Weche Molworo Ndiko mar 2 Timotheo 1:7

Jaote Paulo e ma nondiko barua mar ariyo mar Timotheo ne Timotheo ma ne en osiepne kendo jatich Nyasaye wadgi. E baruano, Paulo nojiwo rawera ma Timotheo mondo odhi nyime timo kinda e tij Nyasaye. (2 Timotheo 1:1, 2) Samoro Timotheo ne luor, to mano ne nyalo miyo kik otim tije mag kanyakla gi kinda. (1 Timotheo 4:12) Kata kamano, Paulo noparo ne Timotheo ni nosemiye mich, tiende ni migawo makende e kanyakla. Nojiwo Timotheo ni kik luor tiyo gi teko ma nomiye kaka jarit kanyakla, sama nolando wach maber, kata sama nonano ka okedo ne yiene.​—2 Timotheo 1:6-8.

Kata obedo ni wechego ne ondik ne Timotheo, gikonyo ji duto ma dwaro tiyo ne Nyasaye e kindegi mondo gibed gadier ni oikore konyogi e pek moro amora ma giromogo.