Waonge gi joma ichulo kaka ichulo jotend din. Kar mano, mana kaka ne timore kane ichako kanyakla mar Jokristo, iketo jodongo molony mondo ‘gibed jokwadh kanyakla mar Nyasaye.’ (Tich Joote 20:28) Jodongogo gin owete molony e wach Nyasaye moket mondo ota kendo okwa kanyakla, ‘ok kichunogi, to gi chuny mohero e nyim Nyasaye; bende, ok nikech hero ohala mag mibadhi, to gi chuny mamor.’ (1 Petro 5:1-3) Gin tije mage ma gitimo mondo okonywa?

Gikonyowa kendo giritowa. Jodongo tayo kendo konyo kanyakla e rito winjruokgi gi Nyasaye. Nikech ging’eyo ni Nyasaye omiyogi migawo maduong’ni, jodongo ok ti gi agoko e wi oganda Nyasaye, kar mano, gikonyo mondo ngimawa odhi maber kendo wabed mamor. (2 Jo-Korintho 1:24) Mana kaka jakwath timo kinda e rito moro ka moro kuom rombene, jodongo bende temo ng’eyo moro ka moro kuom joma nie kanyakla.—Ngeche 27:23.

Gipuonjowa timo dwaro mar Nyasaye. Juma ka juma, jodongo tayo chokruoge mag kanyakla mondo gijiw yiewa. (Tich Joote 15:32) Chwo mochiworegi bende tayo tij lendo ka gilendo kodwa kendo gitiegowa e yore duto mag lendo.

Gijiwowa ng’ato achiel achiel. Mondo gikonywa ng’ato ka ng’ato e winjruokwa gi Nyasaye, jodongo me kanyaklawa nyalo limowa e utewa mondo gikonywa kendo gihowa ka gitiyo gi Ndiko, kata ginyalo wuoyo kodwa e Od Romo.—Jakobo 5:14, 15.

E wi tije ma gin-go e kanyakla, thoth jodongo bende nigi tije mochuno kendo makawo kinde kaka tije andika koda rito joot. Owinjore wami owete matiyo matekgi luor. —1 Jo-Thesalonika 5:12, 13.

• Gin migepe mage ma jodongo nigo e kanyakla?

• Jodongo nyiso ni gidewowa e yore mage?

Muma wuoyo kuom grube ariyo mag chwo ma Jokristo makonyo e tije mag kanyakla—‘jorit ma tayo kanyakla kod jokony-tich.’ (Jo-Filipi 1:1) Kinde mang’eny, owete ma kamagi yudore e kanyakla ka kanyakla. Gin tije mage ma jokony-tich timo mondo gikonywa?

Gikonyo bura mar jodongo. Jokony-tich gin joma nigi winjruok motegno e kindgi gi Nyasaye, gin joma igeno, kendo joma tiyo matek, bed ni hikgi ng’eny kata tin. Gikonyo e timo tije mapile dwarore e kanyakla moriwo tije lwedo. Mani miyo jodongo thuolo mar keto pachgi e chopo ting’gi mag puonjo koda kwath.

Gikonyo e timo tije kanyakla. Moko kuom jokony-tich omi migawo mar rwako ji duto mabiro e chokruoge. Jokony-tich moko tiyo e migepe kaka mar dwol, kar buge, rito weche mag pesa mag kanyakla, koda chiwo alwora mag lendo. Gikonyo bende e rito Od Romo. Jodong-kanyakla nyalo kwayo jokony-tich mondo okony joma hikgi ng’eny. Bed ni jokony-tich omi migawo mane, kanyakla miyogi luor nikech chuny mar chiwruok ma ginyiso.—1 Timotheo 3:13.

Giketo ranyisi maber kaka chwo ma Jokristo. Gima miyo iketo ng’ato obed jakony-tich en nikech kido mabeyo monyiso kaka Jakristo. Jokony-tich jiwo yiewa seche ma gitimo migepegi e kanyakla. Kuom keto ranyisi maber e tij lendo, gimiyo wan be wabedo gi kinda. Nikech giriwo jodong-kanyakla lwedo, gimiyo kanyakla bedo gi mor koda winjruok. (Jo-Efeso 4:16) Bang’ kinde, gin bende ginyalo bedo jodong-kanyakla.

• Jokony-tich nyiso kido mage?

• Ere kaka jokony-tich konyo e miyo weche odhi maber e kanyakla?

Ndiko mag Dho-Grik mag Jokristo wuoyo ding’eny e wi Barnaba gi jaote Paulo. Jogi ne tiyo kaka jorit malworo ka gilimo kanyakla me kinde Jokristo mokwongo. Nikech ang’o? Ne gidewo ahinya chal mar owetegi ma Jokristo. Paulo nowacho ni nodwaro ‘dok mondo olim owete’ mondo ong’e chal margi. Ne oikore wuotho kilomita miche mondo odhi oteggi e yie. (Tich Joote 15:36) Mano bende e gombo ma jorit malworo me kindegi nigo.

Gilimowa mondo gijiwwa. Jarit-alwora limo kanyakla madirom 20, ka olimo moro ka moro kuomgi kuom juma achiel, nyadiriyo e higa. Wanyalo yudo ber mang’eny kuom lony ma owetegi nigo, to kapo ni gin joma nie kend, mondgi be nyalo konyowa. Jorit-alworago gi mondegi temo ng’eyo joma tindo kaachiel gi joma dongo kendo gin gi siso mar dhi kodwa lendo ot ka ot koda e puonjruok mag Muma gi jopuonjre. Jorit-alworago kaachiel gi jodong-kanyakla limo owete gi nyimine e utegi mondo giteggi, bende gigolo twege majiwo ji e chokruoge mag kanyakla koda e chokruoge madongo.—Tich Joote 15:35.

Gidwaro konyo ji duto otim dongruok. Jorit-alwora dewo ahinya winjruok ma Jokristo me kanyakla nigo gi Nyasaye. Giromo gi jodongo koda jokony-tich mondo giwuo e wi dongruok mosetim e kanyakla koda kaka owetegi nyalo timo mondo gichop migepegi. Gikonyo jopainia oyud nyak e tijgi mar lendo, kendo gimor tudore gi joma eka odonjo e adiera kendo gimor winjo kaka gitimo dongruok e winjruokgi gi Nyasaye. Moro ka moro kuom owetegi chiwore kaka ‘jatich kanyachiel kodwa.’ (2 Jo-Korintho 8:23) Onego waluw ranyisi margi e yie koda chiwruokgi ne Nyasaye. —Jo-Hibrania 13:7.

• Ang’o momiyo jorit-alwora limo kanyakla?

• Inyalo timo ang’o mondo limbego okonyi?

Ka masira moro otimore, Joneno mag Jehova kawo okang’ mapiyo mar chano kaka gibiro chiwo kony ne owetegi moyudo masira. Kony makamano nyiso hera madier ma wan-go e kindwa. (Johana 13:34, 35; 1 Johana 3:17, 18) Wachiwo kony e yore mage?

Wachiwo pesa. Kane kech maduong’ owuok Judea, Jokristo ma ne ni Antiokia ne ooro pesa ne owetegi ma Jokristo ma ne ni Judea. (Tich Joote 11:27-30) Kamano bende, ka wawinjo ni owetewa manie pinje moko kalo e chandruok, waoro chiwo magwa kokalo kuom kanyakla mondo okonygo joma nie chal matekno.​—2 Jo-Korintho 8:13-15.

Wachiwore wawegi mondo wakony. Jodongo manie alwora ma masira otimoree manyo jo kanyaklagi duto mondo ging’e kabe gintie kendo gingima. Komiti mar chiwo kony nyalo tayo e chiwo chiemo, pi modho, lewni, kar dak, koda thieth. Joneno mang’eny man-gi lony madwarore chiwore ka gitiyo gi pesagi giwegi mondo gidhi gikony e tijego kata gikony e loso ute mokethore kaachiel gi Ute Romo. Winjruok maber manie oganda Jehova koda lony ma waseyudo sama watiyo kanyachiel miyo wanywako dichiel e chiwo kony mapiyo piyo. Kata obedo ni wakonyo “joma wan-go e yie,” tiende ni Jokristo wetewa, kanyalore, wakonyo jomamoko bende maok wadewo ni gin e din mane.—Jo-Galatia 6:10.

Wahoyo chuny ji kwatiyo gi Wach Nyasaye. Joma oyudo masira moro dwaro hoch ahinya. Kinde ma kamago wayudo tegruok kuom Jehova, “Nyasach hoch duto.” (2 Jo-Korintho 1:3, 4) Wamor nyiso jogo ma chunygi onyosore weche ma Muma osingo kuom kaka machiegni Pinyruodh Nyasaye biro tieko masiche duto makelonwa lit gi chandruok.—Fweny 21:4.

• Ang’o makonyo Joneno mag Jehova kawo okang’ mapiyo e konyo owetegi moyudo masira?

• En hoch mane mayudore e Wach Nyasaye ma wanyalo hoyogo joma otony e masira?

Matin nono kane pok otho, Yesu ne owuoyo gi jopuonjrene ang’wen, ma ne gin Petro, Jakobo, Johana, koda Andrea ka gin kar kendgi. Kane Yesu koro gik ma ne dhi nyiso ni entie e ndalo giko, ne openjo wach madwarore ahinya ni ji ong’e, niya: “Ng’ano ma kuom adier e jatich mogen kendo mariek, ma ruodhe noketo e wi joode mondo omigi chiembgi e kinde mowinjore?” (Mathayo 24:3, 45; Mariko 13:3, 4) Yesu ne nyiso jopuonjrene ni en kaka ‘ruodhgi’ ne odhi keto jomoko ma ne dhi siko ka pidho jolupne gi chiemb chuny e ndalo mag giko. Jatich mogen kendo mariek en ng’a?

En grup moro matin mar jolup Yesu mowal. “Jatichno” ema osebedo Bura Matayo mar Joneno mag Jehova. Ochiwo chiemb chuny e kinde mowinjore ne jowetegi ma lamo Jehova. Wageno jatich mogen kendo mariek mondo odhi nyime miyowa ‘chiemo e kinde mowinjore.’—Luka 12:42.

Orito jood Nyasaye. (1 Timotheo 3:15) Yesu nomiyo jatichno migawo mapek mar rito tich mitimo e riwruok mar oganda Jehova manie piny, ma gin rito mwandu mag riwruogno, tayo tij lendo, kod chiwo puonj kokalo kuom kanyakla. Kuom mano, mondo gimiwa gima wadwaro e sa ma wadwaree, “jatich mogen kendo mariek” chiwo chiemb chuny kokalo kuom buge ma watiyogo e tij lendo, kod chenro mag chokruoge mag kanyakla kod madongo.

Jatichno ogeno kata omakore chuth gi adiera mag Muma koda migawo mare mar lando wach maber, kendo otiyo gi rieko e rito mwandu Kristo manie piny. (Tich Joote 10:42) Jehova gwedho tijgi kuom ywayo ji mang’eny obed jonenone kendo kuom konyogi chiwo chiemb chuny mogundho.—Isaiah 60:22; 65:13.

• Ng’ano ma ne Yesu oketo mondo opidh jopuonjrene Wach Nyasaye?

• Gin yore mage ma jatichno nyisogo ni en ng’at migeno kendo mariek?

E kinde Jokristo mokwongo, grup matin mar “joote gi jodongo man Jerusalem” ne tiyo kaka bura matayo ma ne ng’ado weche mapek e lo kanyakla mar Jokristo mowal. (Tich Joote 15:2) Kane dwarore ni ging’ad wach kuom gimoro, ne ginono Ndiko mondo ging’e gima Ndiko wacho kendo ne giweyo mondo roho mar Nyasaye otagi, to mano ne miyo giwinjore e wach achiel. (Tich Joote 15:25) Ranyisino pod iluwo kata gie kindegi.

Nyasaye tiyo gi Burano e chopo dwache. Owete mowal matiyo e Bura Matayo ohero Wach Nyasaye ahinya kendo gin gi lony e ng’ado weche kare kuom kaka tijwa onego otim kendo e dwoko penjo mag Muma. Giromo juma ka juma mondo ginon gik madwarore ne oganda Jokristo e piny mangima. Mana kaka e kinde Jokristo mokwongo, ichiwo puonj mosir gi Muma e yor barupe kata kokalo kuom jorit malworo. Mano miyo wawinjore e paro koda e tim kaka oganda Nyasaye. (Tich Joote 16:4, 5) Bura Matayo iko chiemb chuny, ojiwo tij lando wach Pinyruoth, kendo ochung’ ne tij nono kwayo mag keto owete e migepe.

Oluwo kaka roho mar Nyasaye chiko. Bura Matayo ogeno Jaloch mar Piny gi Polo, Jehova, koda Wi kanyakla, ma en Yesu, mondo otagi. (1 Jo-Korintho 11:3; Jo-Efeso 5:23) Owete manie Bura Matayo ok kwanre kaka jotelo mag oganda Nyasaye. Bura Matayo kaachiel gi Jokristo duto mowal, “siko ka luwo Nyarombo [Yesu] kamoro amora ma odhiyoe.” (Fweny 14:4) Bura Matayo mor ka waketogi e lamo.

• Ng’a gini ma ne ni e bura matayo e kinde Jokristo mokwongo?

• Bura Matayo me kindegi timo ang’o mondo Nyasaye otagi?

Bethel en nying mowuok e Dho-Hibrania ma tiende en “Od Nyasaye.” (Chakruok 28:17, 19) En nying mowinjore gi ute ma Joneno mag Jehova tiyoe e piny mangima mondo gita kendo gisir tij lendo. Bura Matayo tiyo e ofis maduong’ mantie New York, e piny Amerka, kama gitayoe tije mitimo e bad ofise mag pinje mang’eny. Jogo matiyo kuondegi iluongo ni jood Bethel. Mana kaka joot, gidak, gitiyo, gichiemo, kendo gipuonjore Muma kanyachiel.—Zaburi 133:1.

Gin joot makende mochiwore ne tich. E moro ka moro kuom ute Bethel, nitie chwo gi mon ma ochiwore ne timo dwaro mar Nyasaye kendo gitiyo tij Pinyruoth kuom thuologi duto. (Mathayo 6:33) Onge kata mana achiel kuomgi michulo msara, kata kamano, giduto imiyogi kar dak, koda pesa matin ma gitiyogo e loyo yoregi matindo tindo. Ng’ato ang’ata man Bethel omi migawo, kaka tiyo e ofis, e jokon, kata kar chiemo. Moko kuomgi goyo kata riwo buge, lero udi, luoko lewni, loso kuonde mokethore, kata timo tije mamoko.

En kama ji tiyoe matek ka giriwo lwedo tij lando Wach Pinyruoth. Gima duong’ momiyo Bethel moro amora nitie en ni gikony ji mang’eny kaka nyalore oyud adiera mag Muma. Brosuani en achiel kuom buge molos mondo ochop mano. Bura Matayo ne otayo ndiko mar brosuani, kae to noore e yor kompyuta ne grube maloko dhok mayudore e pinje duto, mi ogoye kuonde gocho matiyo mapiyo ahinya mayudore e ute Bethel mogwaro, kae to okowe ne kanyakla mokalo 110,000. E okengegi duto, jood Bethel konyo e timo tije masiro e yo maduong’ tich madwarore ni otim mapiyo moloyo—lando wach maber.—Mariko 13:10.

• Jomage matiyo e Bethel, to imiyogi gik mage?

• En tich mane madwarore ni otim mapiyo ma Bethel moro amora siro?

Jood Bethel tiyo e migawo mopogore opogore ka gikonyo e tije motudore gi tij lendo mitimo e pinje mang’eny. Nyalo bedo ni gitiyo tije mag loko dhok, goyo gasede, riwo buge, kanogi, loso vidio miwinjo koda mineno, kata konyo e yore mamoko e alworagi.

Komiti mar Bad Ofis ema tayo tije kuno. Bura Matayo oketo Komiti mar Bad Ofis moting’o jodong-kanyakla molony adek kata mokalo kanyo mondo ota tije mitimo e ofisno. Komitino nyiso Bura Matayo dongruok mitimo e tij lendo e pinje duto ma gichung’ne kendo ginyiso Bura Matayo chandruoge ma giromogo. Ripode ma kamago konyo Bura Matayo ng’eyo weche monego oket e buge mibiro go kinde mabiro, weche monego owuo kuomgi e chokruoge kanyakla, koda e chokruoge madongo. Kinde ka kinde, Bura Matayo oro owete moko mondo olim bad ofise, kendo mondo gichiw weche ma konyo Komiti mag Bad Ofisego e chopo migepe maggi. (Ngeche 11:14) Kinde limbeno, ichano program makende moriwo twak migolo gi owadwa ma ofis maduong’ oorono mojiwogo jogo modak e alwora ma bad ofisno ochung’ne.

Gikonyo kanyakla duto manie alworagi. Nitie owete e bad ofisego ma omi migawo mar pwodho kwayo mar chako kanyakla manyien. Owete bende tayo tij lendo mar jopainia, jomisonari, koda jorit-alwora matiyo e alwora manie bwo bad ofisno. Gichano chokruoge mag alwora koda mag distrikt, gichano gedo mag Ute Romo, kendo gineno ni oter ne kanyakla ka kanyakla buge madwarore. Tije duto mitimo e bad ofis konyo e miyo tij lendo odhi nyime e yo mochanore maber.—1 Jo-Korintho 14:33, 40.

• Ere kaka Komiti mar Bad Ofis riwo Bura Matayo lwedo?

• Bad ofis chopo migepe mage?

Mondo omi watim duto ma wanyalo e chopo “wach maber” ne ji e “piny, ne ogendni duto, gi dhoudi duto, gi dhok duto, kod ji mopogore opogore duto,” wagoyo bugewa e dhok mokalo 750. (Fweny 14:6) Ang’o ma konyowa chopo migawo mapekni? Ikonyowa gi jondiko ma wuok e piny ma ngima kod jolok-dhok mochiwore ma duto gin Joneno mag Jehova.

Ikwongo ndik weche e dho Ingresa. Bura Matayo tayo tije mag Migawo Mochung’ne Ndiko e ofis maduong’ mar piny mangima. Migawoni tayo tije mag jondiko matiyo e ofis maduong’ koda e bad ofise moko. Bedo gi jondiko mawuok kuonde mopogore opogore miyo ginyalo ndiko e wi weche mamulo kit ogendini mopogore opogore, to mano miyo ji mawuok e pinje mang’eny orwak weche manie bugewa.

Wechego ikowo ne jolok-dhok. Bang’ pwodho wechego, iorogi e yor kompyuta ne grube mag jolok-dhok kuonde duto e piny mangima mondo gilok weche e dhok madwarore kendo ginon ni giloko kare. Gitemo yiero “weche mag adiera” mondo tiend weche owinjre kaka giwinjore e dho Ingresa.—Eklesiastes 12:10.

Kompyuta miyo tich dhi mapiyo piyo. Kompyuta ok nyal kawo kar jondiko koda jolok-dhok. Kata kamano, program mag kompyuta koda diksonari kaachiel gi gik timo nonro moket e kompyuta nyalo konyo jogo timo tijegi mapiyo piyo. Joneno mag Jehova ne oloso program miluongo ni Multilanguage Electronic Publishing System (MEPS) mitiyogo e ndiko weche e dhok miche, keto piche maluwore gi wechego, kendo chanogi kaka dwarore mondo gibed moikore ne gocho.

Ang’o momiyo watimo kinda ma kamano mondo walok weche e dhok kata mana ma iwacho gi ji manok? Watimo kamano nikech dwaro mar Jehova en ni “ji mopogore opogore duto onego ores kendo gibed gi ng’eyo malong’o chuth e wi adiera.”—1 Timotheo 2:3, 4.

• Indiko bugewa e yo mane?

• Ang’o momiyo waloko bugewa e dhok mang’eny kamano?

Riwruok marwa goyo kendo pogo Muma tara gi tara kaachiel gi buge mamoko higa ka higa maonge chudo ma gikwayo. Wagero Ute Romo koda ofisewa, kendo walosogi ka gikethore. Wachiwo kony marito alufe mag jood Bethel kod jomisonari, kendo wachiwo kony ne joma onwang’o masira. Omiyo, inyalo penjori niya: ‘To pesagi duto wuok kanye?’

Ok wagol achiel kuom apar, ok wakwa chudo moro amora, kendo ok wakwa sadaka. Kata obedo ni siro tijwa mar lendo kawo pesa mang’eny, ok wakwa solro. Higini 100 mokalo, gocho ma ariyo mar gaset mar Watchtower nolero ni wan-gi yie ni Jehova ema sirowa kendo ok wabi “kwecho kata timo solro kuom ji mondo wayud kony”—kendo pok wakwecho ngang’!—Mathayo 10:8.

Tijewa isiro gi chiwo maonge achune. Ji mang’eny mor gi tijwa mar puonjo ji Muma kendo gigolo chiwo mar konyo tijno. Joneno wegi chiwo gi mor thuologi, tekregi, pesagi, koda mwandugi mamoko ne timo dwach Nyasaye e piny mangima. (1 Weche mag Ndalo 29:9) Nitie sanduge mag keto chiwo e Ute Romo, e chokruoge mag alwora, kod chokruoge madongo mag ndalo adek, minyalo tigo gi jogo madwaro golo chiwo. Joma ohero bende nyalo golo chiwo ka gitiyo gi websaitwa mar jw.org/luo. Thothne, pesagi wuok kuom joma yutogi ni piny, mana kaka chi liel modhier ma Yesu ne opuoyo ahinya nikech noketo pesa ma mingli ariyo e kar keno mar hekalu. (Luka 21:1-4) Omiyo ng’ato ang’ata nyalo ‘keto gimoro tenge’ mondo ochiw “kaka oseng’ado ei chunye.”—1 Jo-Korintho 16:2; 2 Jo-Korintho 9:7.

Wan-gi yie ni Jehova biro dhi nyime chwalo chuny jogo madwaro miye ‘duong’ ka gichiwone gigegi’ e siro tij Pinyruoth.—Ngeche 3:9.

• Ang’o mamiyo riwruok marwa bedo mopogore gi dinde mamoko?

• Ere kaka itiyo gi chiwo ma ji ogolo maonge achune?

Puonj maduong’ mar Muma miwuoyoe e Od Romo en wach Pinyruodh Nyasaye—mano e wach maduong’ ma Yesu ne olando.—Luka 8:1.

Gin kuonde mag lamo madier e alwora. Kuondego ema Joneno mag Jehova timoe chenro mag lando wach maber mar Pinyruoth. (Mathayo 24:14) Ute Romo igero mopogore opogore, kata kamano, onge moger e yor nyisruok, kendo moko kuomgi itiyogo gi kanyakla mokalo achiel. E higini machiegni mokalo, mondo joma siko medore e kanyakla oyud kar chokruok, wasegero Ute Romo gana gi gana, chiegni abich e odiechieng’. Mano nyalore nade?—Mathayo 19:26.

Igerogi gi chiwo mawuok e piny mangima. Chiwogo ioro e bad ofis mar alworano mondo kanyakla madwaro gero Od Romo oyud pesa maok ng’adie ohala.

Igerogi gi joma ochiwore maok chul mawuok e kit ogendini mopogore opogore. E pinje mang’eny oselos Grube mag Gero Ute Romo. Grube mag jogedo mochiwore dhi e kanyakla moro bang’ machielo e piny moro, kendo gidhi kata mana kuonde matek chopoe e pinyno, mondo gikony kanyaklago e gero Utegi mag Romo. E pinje mamoko, oseket Joneno moko molony mondo ochung’ ne gero Ute Romo koda loso kuonde mokethore. Kata obedo ni nitie jogedo mang’eny molony ma chiwore e konyo tich kuonde migeroe Ute Romo, jo kanyakla ma igedonegi e alworago ema bedo mang’eny kuom jogo duto mochiwore. Mano nyalore nikech roho mar Jehova chwalo joge kendo gitimo kinda gi chunygi duto.—Zaburi 127:1; Jo-Kolosai 3:23.

• Ang’o momiyo waluongo kuondewa mag lamo ni Od Romo?

• Ere kaka gero Ute Romo e piny mangima nyalore?

Od Romo moro amora mar Joneno mag Jehova oting’o nying maler mar Nyasaye. Omiyo, waneno ni en migawo makende rito odno obed maler, konenore maber maonge kama okethoree kendo wakawo migawono kaka gima duong’ e lamo marwa. Ji duto nyalo konyo e rito Od Romo.

Chiwri mondo ikony e timo ler bang’ chokruok. Bang’ chokruok moro amora, owete gi nyimine timo ler mawiye wiye e Od Romo mondo giweye ka ochanore maber. Dichiel e juma, itimo ler mong’ith ne Od Romo. Jaduong’-kanyakla kata jakony-tich moro tayo tijno kendo kinde mang’eny oluwo chenro moting’o tije sie monego otim. Kaluwore gi gima dwarore, ji chiwore mondo giywech, giluok dier ot, giywe buru, gichan kombe, giluok choche, giwang’ yugi, kata gitim ler oko mar Od Romo. Iyango odiechieng’ achiel e higa mar timo ler e okang’ maduong’. Wapuonjo nyithindwa miyo karwa mar lamo luor kuom tiyo kanyachiel kodgi e timo ler.—Eklesiastes 5:1.

Chiwri mondo ikony e loso kuonde mokethore e Od Romo. Higa ka higa, inono adimba chal mar Od Romo, iye gi oko. Kaluwore gi nonro mitimono, iloso kuonde mokethore kinde ka kinde mondo Od Romo onen maber, to mano konyo kik keth pesa. (2 Weche mag Ndalo 24:13; 34:10) Od Romo maler kendo morit maber en kama owinjore gi lamo Nyasachwa. Kuom riwo tijni lwedo, wanyiso kaka wahero Jehova kendo wahero karwa mar lamo. (Zaburi 122:1) Mani bende miyo wabedo gi nying maber e alworawa.—2 Jo-Korintho 6:3.

• Ang’o momiyo ok onego wajwang’ karwa mar lamo?

• Gin chenro mage mitimo mondo Od Romo osik ka ler?

Bende diher timo nonro mondo imed ng’eyo Muma? Be igombo ng’eyo wach moro sie e wi ndiko moro kata e wi ng’at moro, piny moro, kata gimoro miwuoyoe e Muma? Koso isegapenjorie kabe Wach Nyasaye nyalo konyi loyo wach moro machando chunyi? Ka en kamano, inyalo tiyo gi laibrari mar Od Romo.

Omiyowa gige timo nonro manyalo konyowa. Nyalo bedo ni ionge gi buge duto mag Joneno mag Jehova malero Muma mayudore e dhou. Kata kamano, laibrari mar Od Romo nigi thoth buge mogo machiegni. Bende onyalo bedo gi loko mopogore opogore mag Muma, diksonari maber, kata buge mamoko mag timo nonro. In thuolo tiyo gi laibrarino kapok chokruoge ochakore kata bang’e. Kapo ni oket kompyuta e laibrarino, nyalo bedo ni en-gi Watchtower Library. Mani en program mar kompyuta moting’o bugewa mang’eny koda gima miyo manyo weche bedo mayot sama itimo nonro e wi wach moro kata ndiko moro.

Onyalo konyo jopuonjre man gi migepe e Chokruok mar Ngimawa kod Tijwa Kaka Jokristo. Inyalo tiyo gi laibrari mar Od Romo sama itimo ikruok ne migawo mari. Jarit Chokruok mar Ngimawa kod Tijwa Kaka Jokristo ema ochung’ ne laibrari. En gi ting’ mar neno ni buge mogo machiegni yudore kanyo kendo ochan-gi maber. Jarit Chokruok mar Ngimawa kod Tijwa Kaka Jokristo kata ng’at ma puonjore kodi Muma nyalo konyi ng’eyo kaka inyalo yudo weche midwaro. Kata kamano, ok oyie ne ng’ato kawo buk moro amora e laibrari mar Od Romo. Dwaher rito bugewa maber kendo weyo ka giler maok wakiewogi.

Muma lero ni mondo wayud “rieko ming’eyogo Nyasaye,” nyaka wabed moikore manyo riekono kaka imanyo “mwandu mopand.” (Ngeche 2:1-5) Laibrari mar Od Romo nyalo konyi chako manyo rieko.

• Gin gik mage mag timo nonro mayudore e laibrari mar Od Romo?

• Ng’ano manyalo konyi tiyo gi laibrari?

Yesu Kristo nowacho ne jolupne niya: “Ler maru orieny e nyim ji mondo gine timbeu mabeyo kendo gimi Wuonu manie polo duong’.” (Mathayo 5:16) Mondo wachop mano, watiyo gi teknoloji moriwo koda Intanet. Websaitwa ma en jw.org, e kama opwodh minyalo yudie weche kuom puonj kata tije mag Joneno mag Jehova. Ang’o gini mayudore kanyo?

Dwoko mag Muma kuom penjo ma ji jobedogo. Inyalo yudo dwoko mag penjo madongo ma ji osegapenjo. Kuom ranyisi, trakt ma wiye wacho ni Be Chandruok Chieng’ Norum? kod Be Jomotho Chieng’ Nobed Mangima Kendo? yudore e Intanet e dhok mokalo 600. Bende, inyalo yudo Muma mar New World Translation e dhok mokalo 130 koda buge mamoko malero Muma moriwo Ang’o ma Muma Puonjo Kuom Adier? koda gasede mag Ohinga mar Jarito koda Amkeni! mogo machiegni. Ng’ama ohero nyalo somo kata winjo bugegi e Intanet. Bende, inyalo golgi e Intanet e yor MP3, PDF, kata EPUB. Inyalo goyo ite moko ne ng’at morwako adiera e dhok ma wendo! Bugewa moket e yor vidio yudore e dhok mogwaro mitimoe ranyisi. Inyalo kawo somo mag Muma miwinjo, drama mag Muma, koda thum ma jaber minyalo yweyogo.

Weche madier kuom Joneno mag Jehova. Moko kuom weche moket e Websait gin lendo manyien koda piche mag vidio e wi tijwa mar piny mangima, weche mamulo Joneno mag Jehova koda kony ma gichiwo ne joma oyudo masira. Inyalo yudo tarige mag chokruoge-distrikt mabiro koda adres mag ofisewa.

Kokalo kuom yoregi, wamiyo ler mar adiera rieny kata kuonde matek ahinya chopoe e piny. Ji mayudore e pinje duto, moriwo Antarctica, yudo kony. Walemo ni “wach Jehova omed landore mapiyo” e piny duto mondo Nyasaye oyud duong’.—2 Jo-Thesalonika 3:1.

• Ere kaka Websait marwa ma en jw.org konyo ji momedore mondo opuonjre adiera mag Muma?

• Ang’o ma diher manyo e websait marwa?