Be Ing’eyo?

Ang’o momiyo ninwoyoga weche moko e Muma?

JOMA nondiko Muma ne nwoyoga weche moko sama ne gindiko. Wane ane weche moko adek ma ne nyalo miyo jondikogo otim kamano:

Kinde ma nondikie wechego. E kinde Jo-Israel machon, thoth ji ne onge gi bugegi giwegi ma nondikie chike mag Nyasaye. Thothne, ne giwinjoga kisomonegi Chike mana sama ne gichokore e nyim tabernakel. (Rap. 31:10-12) Nitie gik ma samoro ne nyalo chochogi kendo monogi chiko itgi maber nikech oganda ne thoth kendo ne gichung’ga kuom seche mang’eny. (Neh. 8:2, 3, 7) E kinde kaka mago, nwoyo weche madongo ne nyalo miyo obed ne ji mayot paro ndikogo kendo tiyo kodgi e ngimagi. Nwoyo weche moko ne nyalo konyogi, to ahinya-ahinya mondo gipar weche matindo tindo ma notudore gi chike mag Nyasaye.—Lawi 18:4-22; Rap. 5:1.

Yo ma ne indikogo wechego. Chiegni pasent 10 mag buge mag Muma gin wende, moriwo nyaka bug Zaburi, Wer Mamit Moloyo Wende Duto, kod Ywagruok. Seche moko wende ne nigi weche moko minwoyo, to mano ne konyo e jiwo wach ma wendego wuoye kendo konyo ji mako wendego. Kuom ranyisi, ne ane weche ma yudore e Zaburi 115:9-11: “A un Jo-Israel, genuru Jehova; en e mokonyou kendo en e okumbau. A un dhood Harun, genuru Jehova; en e mokonyou kendo en e okumbau. Yaye un jo moluoro Jehova, genuru Jehova; en e mokonyou kendo en e okumbau.” Be inyalo neno kaka nwoyo wechego ne nyalo konyo jower paro puonj madongo?

Ka ne idwa jiw weche madongo. Seche moko joma ne ndiko Muma ne nwoyoga thuond weche ma ne gindiko. Kuom ranyisi, ka ne Jehova ochiko Jo-Israel mondo kik gicham remo, nonyiso Musa mondo onwo nyading’eny gimomiyo ne ok onego gitim kamano. Nyasaye ne dwaro ni ojiw ni ngima mar gimoro ni e rembe. (Lawi 17:11, 14) Bang’e, ka joote kod jodongo ma ne ni Jerusalem ne kwano gik ma Jokristo onego owerego mondo gimor Nyasaye, ne ginwoyo wach weruok gi remo.—Tich 15:20, 29.

Kata obedo ni nitie weche moko monwo ahinya e Muma, mano ok nyis ni koro Jehova dwaro ni wanwoga weche sama wawuoyo. Kuom ranyisi, Yesu nowacho kama: “Sa ma ulemo, kik unwo anwoya weche.” (Mat. 6:7) Nonyisowa gik ma wanyalo wacho e lamo ka luwore gi dwach Nyasaye. (Mat. 6:9-13) Kata obedo ni ok onego wanwo anwoya weche sama walemo, pod wan thuolo nyiso Nyasaye gimoro amora ma chandowa nyading’eny kaka nyalore.—Mat. 7:7-11.

Wanyalo neno gimomiyo weche moko ma nondik e Muma ninwoyoga. En achiel kuom yore ma Japuonjwa Maduong’ puonjowago mondo wayud ber wan wawegi.—Isa. 48:17, 18.