Rom Khuaa Mite Hnêna Lehkhathawn

11 A nih leh, Pathianin a mite chu a hnâwl em ni? Hnâwl lo ve! Kei pawh Israel mi, Abrahama thlah,* Benjamin hnama mi ka ni si a. 2 Pathianin a thlan hmasak a mite chu a hnâwl lo. Pathian Lehkha Thuin Elija chungchâng leh Israel mite chunga a lungnih lohna Pathian hnêna a thlen dân a sawi kha in hre lo vem ni? 3 “Jehova,* i zâwlneite an that a, i maichâmte an ti chim a, keimah chauh ka awm tawh. Tûnah hian kei pawh min tih hlum an tum a ni,” tih thu kha. 4 Nimahsela, Pathianin engtin nge a chhân? “Baal hmaa ṭhingṭhi ngai lo mi 7,000 ka la nei reng a ni,” tiin a chhâng a nih kha. 5 Chutiang bawkin, tûn laiah pawh Pathianin a khawngaihna nasa tak avânga a thlan, Israel mi a la bângte an awm a ni. 6 Khawngaihna nasa tak avânga thlan an nih chuan thil tih vâng a ni tawh lo; chuti lo chuan, khawngaihna nasa tak chu khawngaihna nasa tak a ni tawh lo vang.

7 A nih chuan engtin nge ni ta ang? Israel mite’n ṭhahnemngai taka an zawn chu an hmu lo va, thlante chauhvin an hmu a ni. Mi dang zawngte chu an hriatna a chawlawl si a. 8 “Pathianin vawiin thlengin tui taka muthilhna* thlarau te, hmuh theih lohna mit te leh, hriat theih lohna bengte an hnênah a pe a ni,” tih ziak ang khân. 9 Davida pawhin: “An dawhkân chu an tân lên* te, thang te, tlûkna te leh, phuba lâknate lo ni rawh se. 10 An hmuh theih loh nân an mitte lo thim sela, an zângte pawh lo kûl reng rawh se,” tiin a sawi bawk.

11 A nih leh, tho leh thei tawh lo tûrin an tlu tihna em ni? Ni lo ve! Kawng dik lo an zawh avângin hnam dang mite tân chhandamna a lo awm ta zâwk a, chu chuan anni chu a thîktîr a ni. 12 An kawng dik lo zawhin khawvêl hausakna a thlen a, an kiamnain hnam dangte hausakna a thlen si chuan, an kimna chuan hausakna a va thlen nasa lehzual dâwn êm!

13 Tûnah chuan, nangni hnam dang mite u, ka hrilh a che u, hnam dangte tirhkoh ka nih avângin ka rawngbâwlna hi ka ngaihlu hle a ni; 14 kawng eng emawti taka ka chipuite* ka thîktîr theihna tûr leh an zînga ṭhenkhat ka chhandam theihna tûrin. 15 Hnâwl an nihna chuan khawvêla mi ṭhenkhat chu Pathian nêna inrem leh tûrin a ṭanpui a ni. Tûnah anni chu a pawm leh si chuan, chu chu an tân thihna ata nun lehna ang a ni ang. 16 Chu bâkah, rah hmasa ber anga hlan atâna chhang sawh thlâk chu a thianghlim chuan, a chhang hlâwm pum chu a thianghlim a ni. Tin, a zung a thianghlim chuan a zârte pawh a thianghlim bawk a ni.

17 Amaherawhchu, a zâr ṭhenkhat chu a tliah a, nang oliv suak mah an zînga zawma i awm a, oliv zung ṭhatna chu i ṭâwmpui si chuan, 18 zâr dangte lakah chuan inchhuang suh. An lakah lo inchhuang pawh ni la, a zung i châwm lo va, a zungin a châwm zâwk che tih hre reng ang che. 19 Tichuan, nangin: “Zawma ka awm theih nân a zârte chu tih tliah a ni,” tiin i sawi ang. 20 Chu chu a dik e! Rinna an tlâkchham avângin tih tliahin an awm a, nang erawh chu rinna avângin i ding a ni. Chapo lo la, fîmkhur zâwk ang che. 21 Pathianin oliv zâr takte mah a zuah loh chuan, nang pawh a zuah bîk dâwn si lo che a. 22 Chuvângin, Pathian ngilneihna leh hremna chu ngaihtuah rawh. A tlute tân hremna a awm a; amaherawhchu, a ngilneihna dawng tlâka i awm reng chuan, i tân Pathian ngilneihna chu a awm a ni. Chutianga i awm reng loh erawh chuan, nang pawh sah thlâk i ni ang. 23 Tin, anni pawh rinna tlachhama an awm reng loh chuan zawmin an awm leh ang, Pathianin anni chu a zawm leh thei si a. 24 Nang, pianphung rênga oliv suak aṭanga sah thlâk i nih a, pian dân pângngai lo anga oliv thinga zawma i awm si chuan, chûng zâr takte chu anmahni oliv thing ngeiah chuan zawm leh an va ni nasa zâwk dâwn êm!

25 Unaute u, mahni ngaiha inti fing in nih loh nân, he thurûk thianghlim hi in hriat loh ka duh lo ve: Hnam dang mite hmanga an zât tih kim a nih hma loh chuan Israel mi ṭhenkhat chungah luhlulna a la thleng rih a ni, tih hi. 26 Chutiang chuan, Israel mi zawng zawng chhandamin an awm ang. “Zion aṭangin chhandamtu* a lo chhuak ang a, Jakoba hnên aṭangin Pathian ngaihsak lohna thil tih zawng zawng a ti bo vang. 27 An sualte ka lâk bo hunah chuan anni chu thu ka thlunpui ang,” tih ziak ang khân. 28 Chanchin ṭha an hnâwl avângin Pathian hmêlmate an lo ni a, chu chu nangni’n in hlâwkpui thung tih chu a dik e. Mahse, Pathianin an pi leh pute hnêna thu a lo tiam tawh avângin, an zînga ṭhenkhat chu a ṭhian atân a thlang a ni. 29 Pathian chu a thilpêkte avângin a inchhîr lo vang a, a mi kohte avângin a inchhîr hek lo vang. 30 Tûn hma chuan Pathian thu in âwih lo va, tûnah erawh chuan Judate thuâwih lohna avângin ani chuan in chungah zahngaihna a lantîr ta si a. 31 Judate thuâwih lohna avânga in chunga zahngaihna a lantîr ang vêka Judate chungah pawh zahngaihna a lantîr theihna tûrin. 32 Pathianin an vaia chunga zahngaihna a lantîr theihna tûrin, thuâwih lohnaah a khung khâwm ta vek si a.

33 Pathian malsâwmnate chu a va nasain, a finna leh hriatna chu a va thûk êm! A rorêlnate chu zawn chhuah rual loh leh a kawngte chu chhût chhuah rual loh a ni. 34 “Tuin nge Jehova* rilru hria a, tu nge a thurâwn petuah ṭang tawh?” 35 A nih loh leh, “A rulh leh tûrin tuin nge a hnênah thil pe hmasa tawh?” tih ziak a ni si a. 36 Thil zawng zawng hi amah aṭang leh amah avâng leh ama tâna lo awm a ni. A hnênah chatuanin ropuina awm rawh se. Amen.