Jakoba Lehkhathawn
2 Ka unaute u, kan Lalpa Isua Krista ring chung siin duhsak bîk in nei a ni maw? 2 In inkhâwmnaah rangkachak zungbun buna thawmhnaw ṭha tak inbel lo lût sela; tin, mi rethei thawmhnaw bâl tak inbel lo lût bawk sela, 3 thawmhnaw ṭha tak inbel hnênah chuan, “Nang chu he hmun ṭhaah hian ṭhu rawh,” in tih a, mi rethei hnênah chuan, “Nang chu ti khân ding rawh” emaw, “Ka ke nghahchhan bulah hian ṭhu rawh,” emaw in tih chuan, 4 in zîngah inthliar hranna a awm tih leh suaksual takin mite ro in rêlsak tihna a ni dâwn lâwm ni?
5 Ka unau duh takte u, ngaithla teh u. Pathianin khawvêl ngaiha retheite hi rinnaa hausa tûr leh, amah hmangaihtute hnêna a tiam Lalram rochung tûrin a thlang lo vem ni? 6 Nangni erawh chuan mi retheite chu in ti mualpho a ni. Mi hausate chu awp bettu che u leh rorêlna ina hnûk lût ṭhîntu che u an ni lo vem ni? 7 Koh in nihna hming zahawm tak sawichhetute an ni lo vem ni? 8 Pathian Lehkha Thuin a sawi, “Nangmah i inhmangaih angin i vêngte pawh i hmangaih tûr a ni,” tih lal dân hi in zawm chuan in ti ṭha e. 9 Nimahsela, duhsak bîk in neih chhûng chuan thil sual in ti a ni, chu dân chuan bawhchhetu in ni tih chiang takin a târ lang si a.
10 Miin Dân zawng zawng zâwmin pakhat lek pawh bawhchhia sela, Dân zawng zawng a bawhchhia a ni. 11 “I uirê tûr a ni lo,” titu chuan, “Tual i that tûr a ni lo,” tiin a sawi bawk si a. Chutichuan, uirê lo mah la, tual i thah si chuan dân bawhchhetu i ni tho tho. 12 Mite zalênna petu dân* hmanga rorêlsaka awm tûrte in nih angin, nangni pawh chumi mil chuan thu sawiin nung zêl rawh u. 13 Zahngaihna lantîr lotu chu zahngaihna tel lova rorêlsakin a awm dâwn si a. Zahngaihna hi rorêlna aiin a chungnung zâwk a ni.
14 Ka unaute u, tu emawin rinna ka nei ti mah sela, thil tih a neih si loh chuan eng nge hlâwkna awm ang? Chutiang rinna chuan ani chu a chhandam thei dâwn em ni? 15 Unaupate emaw, unaunute emaw chu thawmhnaw hâk tûr nei lo* leh nî tin chaw kham khawp nei lovin awm sela, 16 in zînga tuin emaw an hnênah, “Thlamuang takin kal ula; lum tak leh puar takin awm rawh u,” ti sela, an taksa mamawh in pêk si loh chuan an hlâwkpui dâwn em ni? 17 Chutiang bawkin, rinna ringawt chu thil tih tel lo chuan thi a ni.
18 Nimahsela, tuin emaw: “Nangin rinna i nei a, kei chuan thil tih ka nei. I rinna chu thil tih tel lovin min hmuhtîr la, keiin ka thil tihin ka rinna ka hmuhtîr ang che,” tiin a la sawi ang. 19 Pathian pakhat chauh a awm tih i ring maw? I ti ṭha e. Ramhuaite pawhin an ring a, an khûr ṭhîn asin. 20 Aw mi â pa, thil tih tel lo rinna chu eng mah lo mai a ni tih i hre lo vem ni? 21 Min thlahtu Abrahama kha a fapa Isaaka maichâma a hlan hnuah chauh, a thil tih avângin mi fela puan a ni lo vem ni? 22 A rinna chu a thil tihah a lang a, a thil tihte hmanga a rinna chu tih famkim a ni tih in hria e. 23 Pathian Lehkha Thua: “Abrahama chuan Jehova* a ring a, chu chu a felnaah ruat a ni,” tih thu kha a thleng famkim ta; tichuan, ani chu Jehova* ṭhiana vuahin a awm ta a ni.
24 Rinna avâng chauh ni lovin, thil tih avângin mi chu mi fela puan a ni tih in hre ta. 25 Chutiang bawkin, nawhchizuar Rahabi pawh enthlatute* ṭha taka a lo lawm hnua kawng danga a hawtîr khân, thil tih avângin mi fela puan a ni lo vem ni? 26 Taksa hi thlarau* tel lova thi a ni angin, rinna pawh hi thil tih tel lo chuan thi a ni.