Thessalonika Khuaa Mite Hnêna Lehkhathawn Pakhatna

5 Amaherawhchu, unaute u, a hunte leh a nîte chu ziahsak in ngai lo ve. 2 Jehova* nî chu zâna rûkru a lo kal angin a lo thleng dâwn tih nangmahni ngeiin chiang takin in hre si a. 3 “Muanna* leh himna!” tia an sawi lai takin, hmeichhe nau vei angin, chawplehchilhin an chungah chhiatna a lo thleng thut ang a, an pumpelh tawp lo vang. 4 Nangni erawh chu unaute u, chumi nî chuan rûkru anga a nanna tûr che uin thimah in awm lo ve, 5 ênga awm leh chhûna awm in ni si a. Zâna mi kan ni lo va, thima mi kan ni hek lo.

6 Chuvângin, mi dangte anga muhîl lovin, harhvâng taka awmin i ngaihven reng zâwk ang u. 7 Muhîlte chu zânah an muhîl ṭhîn a, zu ruite pawh zânah an rui ṭhîn si a. 8 Nimahsela, keini chu chhûna mi kan nih angin ngaihven tlatin awm ila, rinna leh hmangaihna âwmphaw hain, chhandam beiseina chu lukhumah i hmang ang u. 9 Pathianin a thinurna tuar tûr ni lovin, kan Lalpa Isua Krista zâra chhandamna hmu tûrin min thlang tawh si a. 10 Kan harh emaw, kan muhîl* emaw a nih pawha amah nêna kan nun tlân theihna tûrin ani chu kan tân a thi a ni. 11 Chuvângin, infuih* tawnin inti chak tawn reng rawh u, in tih reng ṭhin ang hian.

12 Tin, unaute u, in zînga thawkrimte leh Lalpaa kaihruaitu che u leh zilhhautu che u chungah chuan zahna lantîr tûrin kan ngên a che u. 13 An hnathawh avânga hmangaiha ngaihlu êm êm tûrin kan ngên bawk a che u. Inremin awm rawh u. 14 Chutih rualin, unaute u, kan fuih a che u, mi dâwngdahte chu vaukhân* ula, lunghnualte chu thlamuan ula, chak lote chu ṭanpui ula, mi zawng zawng chungah dawhthei rawh u. 15 Tu sual pawh suala thungrûl lo tûrin fîmkhur rawh u; chu aiin, in zîngah leh mi zawng zawng chungah thil ṭha ti reng zâwk rawh u.

16 Lâwm fo ula; 17 bâng lovin ṭawngṭai ula; 18 engkimah lâwmthu sawi rawh u. Chu chu Krista Isua zuitute tâna Pathian duh zâwng a ni. 19 Thlarau thianghlim mei chu ti mit suh u. 20 Hrilh lâwkna thute chu ngainêp suh u. 21 Engkim fiah ula; thil ṭha chu vuan tlat rawh u. 22 Suahsualna tinrêng lak aṭangin inthiar fihlîm rawh u.

23 Remna* Pathian ngei chuan ti thianghlim pumhlûm che u rawh se. Tin, kan Lalpa Isua Krista lo awm lehna chhûngin in thlarau leh in nunna* leh in taksa chu kawng tinrêngah sawisêl bova vawn ṭhatin awm rawh se. 24 A kotu che u chu a rinawm a, chutiang chuan a ti ngei ang.

25 Unaute u, min ṭawngṭaisak reng rawh u.

26 Unau zawng zawngte kha fawh thianghlimin chibai bûk rawh u.

27 He lehkhathawn hi unau zawng zawngte hnêna chhiar tûrin, Lalpa hmingin tih tak zetin ka ngên a che u.

28 Kan Lalpa Isua Krista khawngaihna nasa tak chu in hnênah awm rawh se.