Thessalonika Khuaa Mite Hnêna Lehkhathawn Pakhatna

4 A tâwp berah chuan unaute u, kan hnên aṭanga zirtîrna in dawn ang khân Pathian ti lâwm zâwngin in nung a; amaherawhchu, nasa lehzuala ti zawm zêl tûrin, Lalpa Isua hmingin kan fuihin kan ngên a che u. 2 Lalpa Isua hminga kaihhruainate kan pêk che u kha in hre si a.

3 Hei hi Pathian duh zâwng a ni: In thianghlim tûr a ni a, nungchang bawlhhlawhna* lak aṭangin in inthiar fihlîm bawk tûr a ni. 4 In zînga tu pawhin mahni taksa* thianghlim tak leh zahawm tak ni tûra thunun dân an zir tûr a ni a, 5 Pathian hre lo hnam dangte anga duhâm leh tisa châkna thunun lovin in awm tûr a ni lo. 6 Hemi kawngah hian tu man in unau chungah thil ṭha lo tiin, a dikna in palzûtsak tûr a ni lo. Kan hrilh tawh che u ang leh khauh taka kan vaukhân tawh che u ang khân, chûng thil zawng zawng titute chu Jehova’n* a hrem dâwn a ni. 7 Pathianin bawlhhlawh tûr ni lovin, thianghlim tûrin min ko tawh si a. 8 Chuvângin, chu thil pawisa lotu chuan mihring ni lovin, a thlarau thianghlim petu che u Pathian chu a pawisa lo a ni.

9 Nimahsela, unau inhmangaihna chungchâng thu chu kan ziahsak che u in ngai lo ve, inhmangaih tawn tûrin nangmahni ngei Pathian zirtîrin in awm si a. 10 Chutiang chuan, Makedonia rama unau zawng zawngte chungah in ti a. Amaherawhchu, unaute u, tûn aia nasa lehzuala ti zêl tûrin kan ngên a che u. 11 Kaihhruaina kan pêk tawh che u ang khân, mi dangte ti buai lo leh an thil tiha inrawlh lovin, mahni kuta hna thawkin awm tum tlat rawh u. 12 Tichuan, pâwn lam mite mit hmuhah mawi takin in nung thei ang a, eng mah tlâkchham in nei lo vang.

13 Chu bâkah, unaute u, beiseina nei lo mi dangte anga lungngaia in awm lohna tûrin, thihnaa muhîl tawhte chungchâng chu in hriat loh kan duh lo ve. 14 Isua a thi a, a tho leh tawh tih kan rin chuan, Isua hnungzuitute nia thihnaa muhîl tawhte chu Pathianin Isua hnêna awm tûrin a ti nung leh ang tih kan ring bawk ang. 15 Hei hi Jehova* thuin kan hrilh a che u, keini Lalpa lo awm lehna thlenga nung dama awmte hian, thihnaa muhîl tawhte chu kan thawh khalh tawp lo vang. 16 Lalpa ngei chu thu pe aw nên, vântirhkoh chungnungber aw nên, Pathian tawtawrâwt ri nên vân aṭangin a lo chhuk dâwn si a; tin, Krista zuitu thihnaa muhîl tawh zirtîrte chu an tho hmasa ang a. 17 Chumi hnuah chuan, keini nung dama la awmte hi anmahni bula awm tûr leh boruaka Lalpa tâwk tûrin chhûm zîngahte khian lâk chhohvin kan awm ang; tichuan, Lalpa hnênah kan awm reng tawh ang. 18 Chuvângin, hêng thute hian inthlamuan tawn reng rawh u.