Johana Hnêna Thu Puan Chhuah
21 Tin, vân thar leh lei thar ka hmu a; vân hmasa leh lei hmasa chu a boral tawh a, tuifinriat pawh a awm tawh lo. 2 Khaw thianghlim Jerusalem Thar chu monu, a pasal tâna a inchei anga inpeih diamin, Pathian hnên ata vân aṭanga lo chhuk ka hmu bawk a. 3 Chu veleh, lalṭhutthlêng aṭang chuan aw ring takin: “Ngai teh! Pathian puan in chu mihringte zîngah a lo awm ta, ani chu an hnênah a chêng ang a, anni chu a mite an ni ang a, Pathian ngei chu an hnênah a awm ang. 4 Ani chuan an mittui zawng zawng a hru hul ang a, thihna a awm leh tawh lo vang a, lungngaihna te, ṭahna te, natnate pawh a awm leh tawh hek lo vang. Min ti hrehawm ṭhîntu tûn hma thilte chu a ral ta,” a tih ka hria.
5 Tin, lalṭhutthlênga Ṭhua chuan: “Ngai teh! Thil engkim ka siam thar e,” a ti a. “Ziak rawh, hêng thute hi a rinawmin* a dik si a,” a ti bawk a. 6 Tin, ani chuan ka hnênah: “Chûngte chu a lo thleng tawh e! Kei Alpha leh Omega,* a bul leh a tâwp chu ka ni. Tuihâl apiangte chu an in atân nunna tuikhura* mi a thlâwnin ka pe ang. 7 Khawvêl hnehtu apiang chuan chûng thilte chu a rochung ang a, a Pathian ka ni ang a, ani chu ka fapa a ni ang. 8 Amaherawhchu, mi dawihzep te, rinna nei lo te, mi thianghlim lo leh tenawm te, tualthattu te, nungchang bawlhhlawh te,* ramhuai zâwl te, milem betu te leh, dâwt sawi hmang zawng zawngte chan tûr chu mei leh kâta kâng dîl a ni ang. Chu chuan thih hnihna a entîr a ni,” a ti a.
9 Hri hnuhnûng ber pasariha khat thlêng kum pasarih keng vântirhkoh pasarihte zînga pakhat chu lo kalin: “Lo kal rawh, monu, Berâm No nupui chu ka hmuhtîr ang che,” tiin min hrilh a. 10 Tichuan, thlarau thiltihtheihnain ani chuan tlâng lian leh sâng takah min hruai a, Pathian hnên ata vân aṭanga lo chhuk khaw thianghlim Jerusalem chu min hmuhtîr a. 11 Chu khaw thianghlim chu Pathian ropuinain a khat a, a ênzia chu lung man tam ber, jasper lung anga êng leh fîm tak* a ni. 12 Chu khua chuan kulh bang ropui leh sâng tak a nei a, kawngkhâr 12 neiin, kawngkhârahte chuan vântirhkoh 12 an awm a, kawngkhârahte chuan Israela thlahte hnam 12 hming a inziak a ni. 13 Chhak lamah kawngkhâr pathum, hmâr lamah kawngkhâr pathum, chhim lamah kawngkhâr pathum leh, thlang lamah kawngkhâr pathum a awm a. 14 Chu khaw kulh bang chuan lungphûm 12 a nei bawk a, chûng lungphûmahte chuan Berâm No tirhkoh 12-te hming a chuang a ni.
15 Tin, min betu chuan chu khua leh a kawngkhârte leh a kulh bangte chu teh tûrin, thil tehna tiang ang tak rangkachak luang a keng a. 16 Khua chu kil li nei a ni a, a dung leh a vâng a inchen a. Luang chuan khua chu a teh a, kilometer 2,220* bial vêl a ni, a dung leh a vâng leh a sân zâwngte chu a inchen vek bawk. 17 Tin, kulh bang sân zâwng pawh chu a teh a, mihring teh dân leh vântirhkoh teh dânin tawng 144-a* sâng a ni. 18 Kulh bang chu jasper lunga siam a ni a, khua chu rangkachak hlanga din, dârthlalang fîm tak ang a ni. 19 Chu khaw kulh bang lungphûmte chu lung man tam chi tinrênga cheimawi a ni a: lungphûm hmasa ber chu jasper lung a ni a, a pahnihna chu sapphire lung a ni a, a pathumna chu chalcedony lung a ni a, a palina chu emerald lung a ni a, 20 a pangana chu sardonyx lung a ni a, a parukna chu sardius lung a ni a, a pasarihna chu chrysolite lung a ni a, a pariatna chu beryl lung a ni a, a pakuana chu topaz lung a ni a, sâwmna chu chrysoprase lung a ni a, sâwm pakhatna chu hyacinth lung a ni a, sâwm pahnihna chu amethyst lung a ni.* 21 Tin, kawngkhâr 12-te chu tuikeplung 12 a ni bawk a; kawngkhâr tinte chu tuikeplung pakhat ṭheuhva siam a ni. Chu khaw kawtthlêr chu rangkachak hlang, dârthlalang anga fîm a ni.
22 Khaw chhûngah chuan biak in ka hmu lo, Engkimtithei Pathian Jehova* leh Berâm No chu a biak in an ni si a. 23 Tin, chu khua chuan a ti êng tûrin nî emaw, thla emaw a mamawh lo, Pathian ropuinain a ti êng a, a khâwnvâr chu Berâm No a ni. 24 Hnamte chu a êngah chuan an kal ang a, leia lalte chuan an ropuinate chu a chhûngah an luhpui ang. 25 A kawngkhârte chu nilênga hawn a ni ang, chutah chuan zân a awm tawh dâwn si lo va. 26 Hnamte ropuina leh chawimawina chu a chhûngah luhpui a ni ang. 27 Amaherawhchu, thil bawlhhlawh rêng rêng a chhûngah lâk luh a ni lo vang a, thil tenawm titute leh bumhmangte pawh a chhûngah an lût tawp lo vang; Berâm No nunna bu-a an hming chuangte chauh an lût ang.