Matthaia Ziak

26 Tin, Isua’n chûng thu zawng zawng chu a sawi zawhin a zirtîrte hnênah: 2 “Ni hnih hnuah Kalhlên Kût a lo thleng dâwn tih leh mihring Fapa hi bana khenbeh tûrin mantîr a ni dâwn tih in hria e,” a ti a.

3 Tichuan, puithiam lalte leh vântlâng upate chu puithiam lalber Kaiapha in kawtah an pung khâwm a. 4 Dâwt hmanga Isua an man theihna tûr leh an tih hlum theihna tûrin an inrâwn khâwm a. 5 Nimahsela: “Kût chhûng chuan ni suh se; chuti lo chuan, mipuite zîngah buaina a chhuak palh ang e,” an ti a.

6 Tin, Isua chu Bethani khuaa phâr vei dam ta Simona ina a awm laiin, 7 hmeichhe pakhatin alabasta ûma hriak rimtui man to tak kengin a rawn pan a, a hriak ken chu chaw ei mêk Isua lûah chuan a leih a. 8 Chu chu an hmuhin zirtîrte chu an lâwm lo hle a: “Engvângin nge hetianga a tih rîral mai mai? 9 He hriak hi man to taka hralh a, a hralhna man chu mi retheite hnêna pêk theih a ni asin,” an ti a. 10 Isua’n chu chu a hriatin an hnênah: “Engvângin nge hmeichhe chungah hian in lungnih loh? Ka chungah thil ṭha tak a ti a ni. 11 Mi retheite chu in hnênah an awm reng a, kei erawh chu in hnênah ka awm reng lo vang. 12 He hriak rimtui ka taksaa a leih hi, phûm tûra min buatsaih lâwkna atâna ti a ni. 13 Tih tak meuhvin ka hrilh a che u, khawvêl zawng zawnga chanchin ṭha hrilh a nihna apiangah, he hmeichhe thil tih hi amah hriat reng nân sawi a ni ve zêl ang,” a ti a.

14 Tichuan, Sâwm Pahnihte zînga pakhat Juda Iskariota chu puithiam lalte hnênah a kal a. 15 An hnênah: “In man theih nân ani chu phatsan ta ila, eng nge min pêk ang?” a ti a. Anni chuan tangkaraw pawisa 30 pêk an tiam a. 16 Chumi nî aṭang chuan a phatsan theihna tûr hun remchâng a zawng ta reng a.

17 Chhang Dawidim Telh Loh Kût ni hmasa berah chuan, zirtîrte chu Isua hnênah an lo kal a: “Khawiah nge Kalhlên Kût chaw buatsaihsak che ila i duh?” an ti a. 18 Ani chuan: “Khawpuiah va kal ula, ka hmêlhriat pakhat in va hmu ang, ‘Zirtîrtuin: “Ka hun ruat chu a hnai ta; i inah ka zirtîrte nên Kalhlên Kût kan hmang ang e,” a ti e,’ va ti ang che u,” a ti a. 19 Tin, zirtîrte chuan Isua’n a hrilh ang chuan an ti a, Kalhlên Kût chaw an buatsaih ta a.

20 Tlai lamah chuan a zirtîr 12-te nên dawhkân an kîlho va. 21 An la ei lai mêkin ani chuan: “Tih tak meuhvin ka hrilh a che u, in zînga pakhat hian min phatsan ang,” a ti a. 22 Tichuan, an lungngai ta êm êm a: “Lalpa, keimah em ni?” an ti ṭheuh va. 23 Ani chuan: “Thlênga chhang mi chiah ṭâwmtu chu min phatsantu tûr a ni ang. 24 Mihring Fapa hi a chanchin ziak a nih ang tak khân a thi dâwn a ni; nimahsela, mihring Fapa phatsantu chunga thleng tûr chu a va râpthlâk dâwn êm! Chu mihring chu piang lo se, a tân a ṭha zâwk tûr,” tiin a chhâng a. 25 Amah phatsantu tûr Juda chuan: “Rabbi, keimah ka ni lo tiraw?” a ti a. Isua’n: “A chhânna chu i hriat kha,” tiin a chhâng a.

26 An la ei laiin Isua’n chhang a la a, mal a sâwm zawhin a phel a, a zirtîrte chu a pe a, an hnênah: “La ula, ei rawh u. Hei hi ka taksa aiawhtu a ni,” a ti a. 27 Tin, no a la a, lâwmthu a sawi zawhin an hnênah a pe a: “In zain in rawh u, 28 hei hi ka ‘thuthlunna thisen’ aiawhtu, mi tam tak sualte ngaihdamna atâna chhuak tûr chu a ni. 29 Nimahsela, ka hrilh a che u: Ka Pa Lalrama in ruala a thar ka in nî a thlen hma loh chuan, uain rêng rêng ka in leh tawh lo vang,” a ti a. 30 Tichuan, Pathian fakna hla an sak zawhin Oliv Tlângah an kal ta a.

31 Tin, Isua’n an hnênah: “Zâninah hian in zain min thlahthlam ang:* ‘Berâm vêngtu ka vua ang a, berâm rual chu an darh ang,’ tih ziak a ni si a. 32 Nimahsela, ka thawhleh hnuah Galili ramah in hmaah ka kal ang,” a ti a. 33 Petera erawh chuan a hnênah: “Mi dang zawng zawngin thlahthlam che mah sela, kei chuan ka thlahthlam ngai lo vang che!”* a ti a. 34 Isua’n a hnênah: “Tih tak meuhvin ka hrilh a che, zâninah hian âr a khuan hmain vawi thum mi phat ang,” tiin a hrilh a. 35 Petera chuan: “I rualin thi ve dâwn mah ila, ka phat tawp lo vang che,” tiin a chhâng a. Zirtîr dang zawngte pawhin chutiang chuan an sawi ṭheuh va.

36 Tin, Isua chu a zirtîrte nên Gethsemane huanah an kal a, an hnênah: “Saw ta ka va ṭawngṭai chhûng zawng hetah hian lo ṭhu rawh u,” a ti a. 37 Tichuan, Petera leh Zebedaia fapa pahnihte chu a hruai a, a lungngaiin a mangang ta êm êm a. 38 An hnênah: “Ka lungngai hle a, thihna khawp hial a ni. Hetah hian awm ula, harhvâng takin awm reng rawh u,” a ti a. 39 Tlêmin hma lamah a va kal hrang a, bawkkhupin: “Ka Pa, a theih chuan khawngaihin he no hi mi lâk bosak rawh. Nimahsela, ka duh ang ni lovin, i duh angin ni zâwk rawh se,” tiin a ṭawngṭai a.

40 A zirtîrte hnêna a lêt leh chuan anni chu muhîlin a hmu a; tichuan, Petera hnênah: “Dârkâr khat lek pawh harhvâng takin i awm thei lo a ni maw? 41 Thlêmnaa in tlûk luh loh nân harhvâng taka awmin ṭawngṭai reng rawh u. Thlarau zawngin a peih* ngei mai; nimahsela, tisa erawh a chak lo a ni,” a ti a. 42 A vawi hnihna atân kal hrang lehin: “Ka Pa, he ka no in tûr hi pumpelh theih a nih si loh chuan, i duh angin lo thleng rawh se,” tiin a ṭawngṭai leh a. 43 A rawn lêt leh chuan muhîlin a rawn hmu leh a, anni chu an mut a chhuak hle si a. 44 Tichuan, a vawi thumna atân kal hrang lehin, a thusawi ngai sawiin a ṭawngṭai leh a. 45 A zirtîrte hnêna a rawn lêt leh chuan an hnênah: “Engvângin nge hetiang hun pawimawh takah hian muhîla in lo chawlh hahdam? Mihring Fapa hi mi sualte kuta mantîr tûra phatsan a nih hun a thleng dâwn ta. 46 Tho ula, i kal ang u. En teh u! Mi phatsantu pawh a lo hnaih tâk hi,” a ti a. 47 A la ṭawng lai mêkin, Sâwm Pahnihte zînga pakhat Juda chu a lo kal a, puithiam lalte leh vântlâng upate rawn tirh ngûnhnâm leh talhtum keng mipui tam takin an rawn zui a.

48 Amah phatsantu chuan: “Ka fawh* apiang chu Isua a ni ang, man ang che u,” tiin chhinchhiahna a lo hrilh tawh a. 49 Tichuan, a va pan ta nghâl a, a hnênah: “Chibai, Rabbi!” a ti a, a fâwp ta ngawih ngawih a. 50 Nimahsela, Isua’n a hnênah: “Eng ti tûrin nge i lo kal?” a ti a. Tichuan, mipuite chu rawn kal hnaiin Isua chu an hual a, an man ta a. 51 Nimahsela, ngai teh! Isua zirtîrte zînga pakhat chuan a ngûnhnâm a phawi a, puithiam lalber bâwih chu a sât a, a beng a sah thlâksak a. 52 Tin, Isua’n a hnênah: “I ngûnhnâm kha a paiah thun rawh, ngûnhnâm hmangtu zawng zawngte chu ngûnhnâma tih boral an ni ang. 53 Tûnah hian ka Pa hnênah vântirhkoh sâng tam tak* min rawn tirhsak tûra ngên thei lo tûrin min ngai em ni? 54 Nimahsela, chutiang chuan ngên ta ila, engtin nge Pathian Lehkha Thua inziakte chu a thlen famkim theih ang?” a ti a. 55 Tichuan, Isua’n mipuite hnênah: “Suamhmang man tûr ang maiin, ngûnhnâmte leh talhtumte kengin min man tûrin in rawn kal a ni maw? Nî tin biak inah ṭhuin ka zirtîr ṭhîn a; nimahsela, min man si lo. 56 Amaherawhchu, hêng zawng zawng hi zâwlneite ziah Pathian Lehkha Thute a famkim theih nân a thleng a ni,” a ti a. Tichuan, a zirtîr zawng zawngte chuan ani chu thlahthlamin an tlânchhe ta a.

57 Isua mantute chuan dân hre mite leh upate kal khâwmna, puithiam lalber Kaiapha inah ani chu an hruai a. 58 Nimahsela, Petera chuan a âwm tâwka hla aṭangin puithiam lalber kawtlai thlengin a zui zêl a, a thlen hnu chuan chhiahhlawhte zîngah thil thlen dân hmuh tumin a ṭhu ve a.

59 Tichuan, puithiam lalte leh Sanhedrin-a* ṭhuho zawng zawng chuan Isua chu an tih hlum theih nân, dik lo taka puhna tûr an zawng a. 60 Thuhretu der tam tak lo kal mah se, Isua thiam loh chantîrna tûr eng mah an hmu lo. A hnuah, mi pahnih an lo kal a. 61 Anni chuan: “He pa hian, ‘Pathian biak in hi ṭhiatin, ni thum chhûngin ka sa ṭha leh thei,’ a ti e,” an ti a. 62 Tichuan, puithiam lalber chu a ding a, a hnênah: “Engtin mah i chhâng lo maw? Hêng mite hêkna che hi i hre lo vem ni?” a ti a. 63 Isua erawh chu a ngawi reng a. Tin, puithiam lalber chuan a hnênah: “Pathian nung chhâlin thu ka pe a che, Krista, Pathian Fapa chu i ni nge ni lo min hrilh rawh,” a ti a. 64 Isua chuan a hnênah: “I sawi ang ngei chu a ni e. Nimahsela, ka hrilh a che: Tûn aṭang chuan mihring Fapa hi Pathian thiltithei tak ding lama a ṭhu leh vân chhûm chunga a lo kal in la hmu ang,” a ti a. 65 Tin, puithiam lalber chuan a kawrfual pawt thlêrin: “Pathian a sawichhe ta! Thuhretu dang kan ngai tawh em ni? En teh u! Pathian a sawichhiatzia chu tûnah khân in hria e. 66 Eng nge in ngaih dân?” a ti a. Anni chuan: “Thi tlâk a ni,” tiin an chhâng a. 67 Tichuan, a hmaiah chil chhâkin a taksaah an hnek a. Ṭhenkhatin a hmaiah bêngin: 68 “Nang Krista, tuin nge bêng che? Min han hrilh teh!” an ti a.

69 Petera chu pâwn lam kawt laiah chuan a la ṭhu a, a hnênah chhiahhlawh hmeichhe pakhat rawn kalin: “Nang pawh hi Isua, Galili mi bula awm kha i ni,” a ti a. 70 Nimahsela, ani chuan: “I thusawi awmzia chu ka hre hauh lo mai,” tiin an vaia hmaah chuan a pha a. 71 In hungna kawngka lama a va kal chuan hmeichhe dang pakhatin ani chu a lo hmu a, chuta awmte hnênah chuan: “He pa hi Nazaret mi Isua hnêna awm ṭhîn kha a ni,” a ti a. 72 Ani chuan: “Chu pa chu ka hre lo!” tia chhia chhamin a pha leh a. 73 A hnu lawkah, a bula dingte chu rawn kalin Petera hnênah chuan: “Nang pawh hi an zînga mi i ni chiang mai, i aw phawiah a hriat vek,” an ti a. 74 Tin, ani chuan ânchhia inlawha chhechhamin: “Chu pa chu ka hre lo!” a ti a. Chu veleh âr a khuang ta nghâl a. 75 Petera chuan Isua thusawi: “Ar a khuan hmain vawi thum mi phat ang,” tih thu kha a hre chhuak a. Tichuan, a kal chhuak a, a ṭap ta zawih zawih a.