Petera Lehkhathawn Pahnihna

2 Nimahsela, mite zînga zâwlnei derte an lo chhuak ang khân, in zîngah pawh zirtîrtu derte an lo chhuak ang. Anni chuan in rinna ti chhe thei inṭhen hranna a rûkin an awmtîr ang a, anmahni tlantu* meuh pawh phatsanin chawplehchilhin chhiatna an inthlen ang. 2 Chu bâkah, tîmna nei lova thil sual an tih* ang chuan mi tam takin an ti ve ang a, anmahni avângin thutak kawng chu sawichhiat a ni ang. 3 Tin, an duhâmna avângin dâwt thua bum che u an tum bawk ang. Hmân aṭanga rêl tawh an chunga rorêlna lo thleng tûr chu tih khawtlai a ni lo vang a, tih boral an ni ngei ngei ang.

4 Thil sual titu vântirhkohte kha Pathianin hrem lohvin a chhuah lo va, Tartarus-ah* paih lûtin rorêlsaka awm tûrin khaidiatin* a phuar a, thim chhah takah a dah ta zâwk a ni. 5 Tin, hmân lai khawvêl kha hrem lohvin a chhuah lo va; nimahsela, amah ngaihsak lote khawvêla tui a lêttîr khân, felna thu hriltu Nova leh mi dang pasarihte chu a chhandam a ni. 6 Tin, Sodom leh Gomorra khuate kha Pathian ngaihsak lote chunga thil lo la thleng tûr entîrnaah a hmang a, thiam loh chantîrin vutah a chantîr ta a. 7 Dân pawisakna nei lote’n tîmna nei lova thil sual an tih* avânga nasa taka lungngai mi fel Lota erawh chu a chhandam a; 8 chu mi fel chu mi sualte zînga a awm lai chuan, an nun dânte hmu a, an thusawite a hriatna chuan nî tin a ti lungngai êm êm ṭhîn. 9 Jehova* chuan amah ngaihsaktute chu harsatna* lak aṭanga chhanchhuah dân leh mi fel lote chu rorêlna nîa tih boral tûra khêk dân a hria; 10 a bîk takin, mi dangte tisa tih bawlhhlawh dân zawngtute leh thuneitute hmusittute chu tih boral dân a hre lehzual a ni.

Anni chu ât huai leh mi luhlulte an ni a, mi ropuite sawichhiat pawh an hlau lo. 11 Anni aia chak zâwk leh thiltithei zâwk vântirhkohte meuh pawhin, Jehova* an zah avângin chûng mite chu an sawichhe lo. 12 Nimahsela, chûng mi, ramsa ang maia man leh tih boral tûra piangte chuan an thil hriat lohte chu an sawichhia a ni. An thil sual tih chuan an chungah chhiatna a thlen ang a, 13 an kawng sual zawh avângin hrem an ni ang.

Chhûn ên lai pawhin an tisa châk zâwngte tih puitlin chu nuam an ti a. Bawlhhlawh leh sawisêl kaiah an siam che u a, in hnêna ruai an ṭheh laiin, zirtîrna dik lova mi dangte bum chu nuam an ti hle. 14 An mit chu uirênain a khat a, thil sual tih an bânsan thei lo va, rinnaa chak lote* chu an thlêm ṭhîn. An thinlung chu duhâmnain a khat a.* Anchhe dawng fate an ni. 15 Kawng ngîl chu pênsanin, hruai bovin an awm ta a. Hlawh a ît êm avânga thil sual titu Bosora fapa zâwlnei Balaama kawng an zawh a, 16 Balaama chu a bawhchhiatnaah ngei chuan zilhin a awm a ni. Sabengtung ṭawng thei lo chu mihring anga lo ṭawngin, zâwlneiin kawng âtthlâk tak a zawh chu a lo dang a.

17 Chûng mite chu tuikhur tui awm lo leh ṭiau chhûm thlipui na takin a len ang an ni a, anni chu thim chhah berin a hmuak a ni. 18 Thu awmze nei lote chu pawimawh hmêl takin an sawi a. Tîmna nei lova thil sual tiin,* mite chu thil dik lo tih châkna an neihtîr leh a, thil ṭha lo an bânsan tawhte chu tihtîr leh tumin an thlêm ṭhîn. 19 Mite hnênah zalenna an tiam a; nimahsela, anmahni ngei chhiatna bâwihah an tâng a ni. Tu pawh mi dang hneha a awm chuan, amah hnehtu bâwihah a awm ṭhîn si a.* 20 Lalpa leh Chhandamtu Isua Krista hriatna dik tak avânga khawvêl bawlhhlawhnate tlân chhuahsan tawh hnu a, chûng thilte ngeia an inhnamhnawih leha hneha an awm chuan, tûna an awm dân chu an bul ṭanna aiin a chhe zâwk a ni. 21 Felna kawng chungchâng hriatna dik tak an neih hnua thupêk thianghlim an dawn hawisan leh ai chuan, chu felna kawng chungchâng hriatna dik tak chu nei lo se an tân a ṭha zâwk tûr. 22 “Ui chuan a luak a ei leh a, vawkpui bual fai tawh pawh chirhdiakah a inbual leh ṭhîn,” tih thufing hi an chungah a thleng dik a ni.