Matthaia Ziak

17 Ni ruk hnuah chuan Isua’n Petera te, Jakoba te leh, a unaupa Johana te chu tlâng sâng takah a hruai a. 2 Tichuan, a lan dân chu an hmaah a lo danglam ta a; a hmêl chu nî angin a lo êng a, a silhfênte pawh nasa takin a lo êng* bawk a. 3 Tin, ngai teh! Mosia leh Elija rawn inlârin Isua nên an inbia a. 4 Tichuan, Petera’n Isua hnênah: “Lalpa, heta awm hi kan tân a ṭha e. I duh chuan bûktê pathum ka sa dâwn nia, i tân pakhat, Mosia tân pakhat, Elija tân pakhat,” a ti a. 5 A la ṭawng lai mêkin, ngai teh, chhûm vâr takin anni chu a hliah ta a; tin, chhûm aṭang chuan awin: “Hei hi ka Fapa duh tak, min ti lâwm êm êmtu a ni. A thusawi ngaithla rawh u,” a rawn ti a. 6 Zirtîrte’n chu chu an hriat chuan an hlauh êm avângin an tlu bawkkhup a. 7 Tichuan, Isua chu rawn kal hnaiin anni chu a khawih a: “Tho ula, hlau suh u,” a ti a. 8 Tin, an han en chhoh chuan Isua chauh chu an hmu ta a. 9 Tlâng aṭanga an chhuk laiin Isua’n an hnênah: “Mihring Fapa hi thihna ata a thawhleh hma loh chu in thil hmuhte kha tu mah hrilh suh u,” tiin thu a pe a.

10 Amaherawhchu, zirtîrte’n a hnênah: “A nih leh, engvângin nge dân hre mite’n ‘Elija chu Krista aiin a lo kal hmasa tûr a ni,’ an tih?” tiin an zâwt a. 11 Ani chuan: “Elija chu a lo kal ngei ang a, engkim a siam ṭha leh ang. 12 Nimahsela, ka hrilh a che u, Elija chu a lo kal daih tawh a; mahse, ani chu an hre lo, an duh dân dânin a chungah thil an ti ta zâwk a. Chutiang bawkin, mihring Fapa hian dân hre mite kutah hrehawm a tuar ang,” tiin a chhâng a. 13 Tin, zirtîrte chuan Baptistu Johana chungchâng a sawi tih an hre thiam ta a.

14 Mipuite hnên an va thlen chuan mi pakhatin a rawn pan a, ṭhingṭhiin a hnênah: 15 “Lalpa, ka fapa saw khawngaih* ang che, phûngzâwl a ni a, a tuar nasa êm mai. Meiah leh tuiah a tlu fo ṭhîn. 16 I zirtîrte hnênah ka hruai a; nimahsela, an ti dam thei si lo,” a ti a. 17 Tin, Isua chuan: “Chhuan rinna nei lo leh sual takte u, eng chen nge in zîngah ka awm zêl ang? Engtia rei nge ka dawh ang che u? Ka hnênah rawn hruai rawh u,” a ti a. 18 Tichuan, Isua’n ramhuai chu a hau va, mipa naupang kawchhûng aṭang chuan a lo chhuak a, chumi dârkârah chuan naupang chu a dam ta nghâl a. 19 Tin, zirtîrte chu a hrangin Isua hnênah an lo kal a: “Engvângin nge keini’n kan hnawh chhuah theih loh?” an ti a. 20 Ani chuan an hnênah: “Rinna in neih tlêm vâng a ni. Tih tak meuhvin ka hrilh a che u, anṭam mu fang khat tiat rinna in neih chuan, he tlâng hnênah hian, ‘Heta ṭang hian sawtah sâwn va insawn rawh,’ in ti ang a, a insawn mai ang, in tân tih theih loh rêng a awm lo vang,” a ti a. 21* ——

22 Galili rama an awm khâwm laiin, Isua’n an hnênah: “Mihring Fapa hi phatsan a ni ang a, a hmêlmate kutah pêk a ni ang. 23 Tin, an ti hlum ang a, ni thum nîah a tho leh ang,” a ti a. Tichuan, an lungngai ta êm êm a.

24 Kapernaum khua an thlen hnuah, biak ina chhiahkhawntute chu Petera hnênah lo kalin: “In zirtîrtuin biak in chhiah* a pe ve ṭhîn em?” an ti a. 25 Ani chuan: “Pe ve ṭhîn e,” a ti a. Nimahsela, ina a va luh chuan Isua’n lo be hmasain a hnênah: “Simon, engtin nge i ngaih? Leia lalte’n tu hnên aṭangin nge chhiah chi hrang hrang an lâk ṭhin? An fate hnên aṭangin nge ni a, mi dangte hnên aṭangin?” a ti a. 26 Petera’n: “Mi dangte hnên aṭangin,” tia a chhân chuan Isua’n a hnênah: “Chuti a nih chuan, fate chuan chhiah an pêk a ngai lo a ni ang chu. 27 Nimahsela, anmahni kan tih tlûk loh nân dîlah va kal la, nghakuai va chiah la, i sangha awh hmasak ber chu a kâ keu la, tangkaraw pawisa* i hmu ang. Chu chu la la, ka tân leh i tân an hnênah pe ang che,” a ti a.