Matthaia Ziak

12 Chutih lai chuan Isua’n Sabbath Nîah buh hmunte a pal tlang a. An ril a ṭâm êm avângin, a zirtîrte chuan buh vuite chu thliakin an ei a. 2 Pharisaite’n chu chu an hmuhin a hnênah: “Engvângin nge i zirtîrte’n Sabbath Nîa tih thiang lo an tih?” an ti a. 3 Ani chuan an hnênah: “Davida leh a mite an rilṭâm laia an thil tih kha in chhiar lo vem ni? 4 Pathian ina a luh dân leh, amah leh a mite tâna ei thian loh, puithiamte chauhvin an ei thian chhangdah an ei thu kha. 5 A nih loh leh, biak ina puithiamte chuan Sabbath dân bawhchhe mah se, thiam loh chantîr an ni chuang lo tih pawh Dân thu-ah in chhiar lo vem ni? 6 Nimahsela, biak in aia ropui zâwk hetah hian a awm tih ka hrilh a che u. 7 ‘Inthawina ni lovin, khawngaihna* ka duh,’ tih awmzia hi hre thiam ula chuan, pawisawi lote chu in dem tawp lo vang. 8 Mihring Fapa hi Sabbath Lal a ni si a,” tiin a chhâng a ni.

9 Chuta ṭanga a chhuah hnu chuan, an inkhâwmna inah a va lût a. 10 Chutah chuan kut zeng pakhat a lo awm a. Tichuan, Pharisaite’n Isua chu an hêk theih nân a hnênah, “Sabbath Nîah tih dam a thiang em?” tiin an zâwt a. 11 Ani chuan an hnênah: “Berâm pakhat nei ula, Sabbath Nîah khuarkhurumah tla ta se, in zînga tuin nge la chhuak lo vang che u? 12 Berâm aiin mihring hi an hlu zâwk hle lo vem ni? Chuvângin, Sabbath Nîa thil ṭha tih hi a thiang e,” tiin a chhâng a. 13 Tin, kut zeng hnênah chuan: “I kut phar rawh,” a ti a. Tichuan, a phar a, a kut lehlam ang chiahin a lo dam leh ta a. 14 Nimahsela, Pharisaite chu an kal chhuak a, amah tih hlum theih dân tûr an ruahmanho va. 15 Isua’n chu chu a lo hriatin, chulai hmun chu a chhuahsan a. Mi tam takin ani chu an zui a, dam lo zawng zawngte chu a ti dam hlawm a. 16 Mahse, tu hnênah mah hrilh lo tûrin anni chu uluk takin a chah a ni. 17 Zâwlnei Isaia hmanga lo sawi tawh kha a thlen famkim theih nân:

18 “En teh u! Ka chhiahhlawh atâna ka thlan, ka duh tak, min ti lâwm êm êmtu hi! A chungah ka thlarau ka dah ang a, ani chuan hnamte hnênah Pathian rorêlna dik a hriattîr ang. 19 A hnial lo vang a, ring takin a au lo vang a, kawtthlêr lûn laiahte chuan tu man a aw an hre hek lo vang. 20 Rorêlna dik a thlentîr hma chuan phairuang* tliak lek lek chu a ti chhum lo vang a, khâwnvâr thi lek lek pawh a chhêm hlum hek lo vang. 21 Hnamte chuan a hmingah beiseina an nei ang,” tih hi.

22 Tichuan, mitdel leh ṭawng thei lo ni bawk ramhuai man pakhat Isua hnênah an rawn hruai a, ani chuan a lo ti dam a, ṭawng thei lo chu a lo ṭawng theiin, a lo hmu thei ta a. 23 Chu chu mipui zawng zawngin mak an ti hle a: “Ani hi Davida Fapa a ni lo vem ni?” an ti a. 24 Pharisaite’n chu chu an hriatin: “He mi hian ramhuaite lal Beelzebula* thiltihtheihna tel lo chuan ramhuaite hi a hnawt chhuak thei tawp lo vang,” an ti a. 25 Isua’n an ngaihtuahnate chu hriain an hnênah: “Eng ram pawh mahni indo apiang chu an tlu chhe ṭhîn a, khawi khua pawh, khawi chhûngkua pawh mahni indo apiang chu an ding chhuak hek lo vang. 26 Chutiang bawkin, Setana’n Setana a hnawh chhuah chuan mahni indo a ni dâwn asin; chutiang a nih chuan engtin nge a lalram a din chhuah ang? 27 Chu bâkah, Beelzebula* avânga ramhuaite hnawt chhuak ka nih chuan, in zirtîrte’n tu thiltihtheihnain nge ramhuaite an hnawh chhuah? Chuvângin, in zirtîrte ngeiin in thusawi dik lohzia hi an la hai lang ang. 28 Nimahsela, Pathian thlarau avânga ramhuaite hnawt chhuak ka nih chuan, in hriat loh hlânin Pathian Ram a lo thleng tihna a ni ang. 29 A nih leh, miin mi chak tak chu a phuar hmasak phawt loh chuan, engtin nge a in chhûnga lûta a rawk theih ang? A phuar hnuah chauh a thil neih zawng zawng a lâksak thei ang. 30 Tu pawh ka lama ṭang lo chuan mi do a ni; tin, tu pawh min lâk khâwmpui lo chuan a ti darh a ni.

31 “Chuvângin, ka hrilh a che u, tu pawh an sualna leh an sawichhiatna tinrêngah ngaihdam an ni ang a; nimahsela, thlarau thianghlim sawichhia chu ngaihdam an ni lo vang. 32 Tin, tu pawh mihring Fapa sawichhia apiang chu ngaihdam an ni ang a; nimahsela, tu pawh thlarau thianghlim sawichhia apiang chu tûnah mai ni lovin, hun lo la awm tûrah pawh ngaihdam an ni lo vang.

33 “Thing ṭha chu a rah ṭha ṭhîn in tih loh pawhin, thing chhia chu a rah chhe ṭhîn ti mai rawh u, thing chu a rah aṭangin a ṭhat leh ṭhat loh a hriat a ni. 34 Rûl tûr nei thlahte u, engtin nge sual reng chung sia thu ṭha in sawi theih ang? Thinlunga khat liam chu kâin a sawi ṭhîn si a. 35 Mi ṭha chuan a thinlung ro bâwm thil ṭhaa a khah avângin thu ṭhate a sawi ṭhîn a, mi sual erawh chuan a thinlung ro bâwm thil ṭha lova a khah avângin thu ṭha lote a sawi ṭhîn. 36 Ka hrilh a che u, thu lawilo sawitute chu Rorêlna Nîah chuan an thusawite ṭanchhana rorêlsak an ni ang. 37 Mi chu a thusawi avângin thiam chantîr a ni ang a, a thusawi avâng vêkin thiam loh chantîr a ni bawk ang,” a ti a.

38 Tichuan, dân hre mite leh Pharisai ṭhenkhat chuan a hnênah: “Zirtîrtu, i hnên aṭangin chhinchhiahna hmuh kan duh e,” an ti a. 39 Ani chuan: “Chhuan sual leh uirê hmangte* chuan chhinchhiahna an zawng reng a; nimahsela, zâwlnei Jona chhinchhiahna chauh lo chu pêk an ni lo vang. 40 Jona kha nghapui kawchhûnga ni thum leh zan thum a awm ang chiahin, mihring Fapa pawh hi thlânah ni thum leh zan thum a awm ang. 41 Ninevi khuaa mite kha rorêlna nîah chuan he chhuan rual hian kaihthawh an ni ang a, Jona thu hrilh pawma an inlamlêt avângin, he chhuan sualzia hi an la târ lang ang. En teh u! Jona aia ropui zâwk heta hi a awm e. 42 Seba lalnu pawh kha rorêlna nîah chuan he chhuan rual hian kaihthawh a ni ang a, Solomona finna ngaithla tûra hmun hla tak aṭanga a lo kal avângin, he chhuan sualzia hi a la târ lang ang. En teh u! Solomona aia ropui zâwk heta hi a awm e.

43 “Mi pakhat kawchhûng aṭanga lo chhuak ramhuai chu awmna tûr hmun dang zawngin thlalêrah a vâk kual a; mahse, a hmu lo. 44 Tichuan, ‘Ka chhuahsan tâka hnênah khân ka lêt leh mai teh ang,’ a ti a. A va lêt leh chuan, chu pa chu in ruak, phiah fai leh cheimawi ang maiin a va hmu a. 45 Tin, a kal chhuak a, amah aia sual zâwk ramhuai dang pasarih a rawn hruai a, chu pa kawchhûngah chuan an lût ta a; chu pa dinhmun chu a hma aiin a chhe lehzual a ni. Chutiang chiah chu he chhuan sual tak chungah hian a thleng ang,” tiin a chhâng a.

46 Mipuite hnêna thu a sawi lai mêkin a nu leh a unaute chu amah biak tumin pâwnah an ding a. 47 Tin, tu emaw hian a hnênah: “Nangmah biak tum chein i nu leh i unaute pâwnah an ding reng asin,” a ti a. 48 Ani chuan amah rawn betu chu: “Ka nu leh ka unaute chu tute nge ni?” tiin a lo zâwt a. 49 Tichuan, a zirtîrte lamah a kut phar chhuakin: “En teh u! Ka nu leh ka unaute hi! 50 Tu pawh ka Pa vâna mi duh zâwng ti apiang chu, chu mi ngei chu ka unaupa te, ka farnu te, ka nute an ni,” tiin a sawi a.