Jakoba Lehkhathawn
3 Ka unaute u, zirtîrtute’n rorêlna nasa lehzual* kan dawng dâwn tih hriain, in zînga tam tak hi zirtîrtute in rawn ni tûr a ni lo. 2 Kan vai hian vawi tam tak thil kan ti sual fo ṭhîn. A thusawia ti sual ngai lo mi chu mi ṭha famkim, a taksa pum pawh thunun thei mi a ni. 3 Kan thu an âwih theih nân sakawr kâahte hian thîr barh kan barh chuan an taksa pum pawh kan thunun thei ṭhîn. 4 Lawngte pawh hi en teh u: An lian hle a, thli na takin ti kal ṭhîn mah se, a khalhtu chuan a kal duhna apiangah a khalhna te tak têin a ti her ṭhîn.
5 Chutiang bawkin, lei hi taksa pêng te tak tê ni mah se, nasa takin a uang ṭhîn. Mei sî te tak têin ram a va ti kâng nasa thei tak êm! 6 Lei pawh hi mei ang a ni. Lei hi kan taksa pêngte zînga fel lohnaa khat a ni a, taksa pum pui a ti bawlhhlawh a, mi nun a ti chhe thei a, chhiatna a thlen avângin Gehenna* ang a ni. 7 Ram sakawlh chi tinrêng te, sava chi tinrêng te, nungcha bawkvâka kal chi tinrêng te leh, tuifinriata nungcha chi tinrêngte hi khawi ngam theih an ni a, mihringte’n an khawi ngam bawk ṭhîn. 8 Amaherawhchu, tu mahin lei hi an khawi ngam thei lo. Thihna tûra khat, thunun theih loh leh mi ti na thei a ni. 9 Chu chuan kan Pa, Jehova* kan fak ṭhîn a, chumi vêk chuan, “Pathian anga siam” mihringte ânchhia kan lawh bawk ṭhîn. 10 Kâ hmun khat aṭangin malsâwmna leh ânchhia a lo chhuak ṭhîn a ni.
Ka unaute u, chutianga tih chu a dik lo ve. 11 Tui hna pakhat aṭangin tui thianghlim leh tui al a chhuak kawp ṭhîn em ni? 12 Ka unaute u, theipui kûngah oliv a rah thei em ni? A nih loh leh, grêp hruiah theipui a rah thei em ni? Chutiang bawkin, tui hna al pawhin tui thianghlim a ti chhuak thei hek lo.
13 In zîngah finna leh hriatthiamna nei an awm em? An awm chuan, nungchang ṭha an nei tûr a ni a, chu chuan an thil tih zawng zawng chu finna aṭanga lo awm nunnêmna* nêna tih a nihzia a târ lang tûr a ni. 14 Nimahsela, in thinlungah îtsîkna nasa tak leh inhnial châkna* in neih chuan in finna chu in uanpui tûr a ni lo, chutianga in tih chuan dâwt sawi in ni ang. 15 Chu chu chung lam aṭanga lo chhuk finna a ni lo va, khawvêla mi tisa châkna anga nungte leh ramhuai aṭanga lo chhuak a ni zâwk e. 16 Itsîkna leh inhnialna* awmna hmun apiangah buaina leh thil ṭha lo tinrêng a awm bawk ang.
17 Nimahsela, chung lam aṭanga finna lo chhuak chu a hmasa berin a thianghlim a, chumi hnuah inrem a duh a, a âwm tâwk a hria a, thuâwih tûrin a inpeih a, zahngaihna leh rah ṭhatein a khat a, thlei bîk a nei lo va, a vervêk hek lo. 18 Chu bâkah, felna rah chu remna siamtute tân* remna dinhmun hnuaia tuh a ni.