Sabengtung A Ṭawng

SABENGTUNG tawng i hre ngai em? ‘Ngai lo. Ran an tawng thei lo,’ i ti thei a. Mahse Bible-in sabengtung tawng chungchang a sawi a. A lo nih dan i en ang u.

Israel-mite chuan Kanaan-a luh an peih lek lek tawh a. Moab lal Balaka chuan Israel-mite chu a hlau va. Tichuan Israel-mite anchhe lawh tura lo kal turin mi verther Balama a chah a. Balaka chuan Balama chu tangka tam tak pek a tiam a, tichuan a sabengtungah a chuang a, Balaka hmu turin a kal ta a.

Jehovan A mite anchhe lawh turin Balama a duh lo va. Tichuan Balama dang tura khandaih sei pui nena kawnga ding turin vantirhkoh a tir a. Balama chuan vantirhkoh chu a hmu thei lo va, a sabengtung erawh chuan a hmu thei a. Chuvangin sabengtung chuan vantirhkoh chu hersan a tum thin a, a tawpah kawngah a bawk ta ringawt a. Balama a thinur ta em em a, tiangin a sabengtung chu a vua a.

Chu veleh Jehovan Balama chu a sabengtung tawng a hriattir ta a. ‘Mi vuakna turin i chungah enge ka tih,’ tiin, sabengtung chuan a zawt a.

Balaman a chhang a: ‘Mi a angin mi lantir a ni. Khandaih nei ila chuan ka tihlum ang che,’ tiin.

Sabengtung chuan: ‘Tun hmalamin hetiang hlan ka ti tawh ngai che em?’ tiin a zawt a.

‘Ngai lo,’ Balaman a ti a.

Chu veleh khandaih nena vantirhkoh kawnga ding chu Jehovan Balama a hmuhtir a. Vantirhkoh chuan: ‘Engvanginnge i sabengtung i vuak? Israel anchhe lawh tura kal lo tur i nih vangin i kawng tiping turin ka lo kal a ni. I sabengtungin mi hersan lo se chuan ka sathlum tawh ang che, i sabengtung erawh chu ka tina lo vang,’ a ti a.

Balama chuan: ‘Ka lo sual a ni. Kawngah i ding tih ka hre lo a ni,’ a ti a. Vantirhkoh chuan Balama a kaltir a, Balama chu Balaka hmu turin a kal ta zel a. Israel anchhe lawh a la tum tho va, mahse Jehovan Israel vawi thum mal a sawmtir ta zawk a.