Ṭhen 10
Pathian Siam Khawvêl Thar Ropui Chu
1, 2. Thenfaina indona Armageddon hnuah eng nge lo thleng ang?
PATHIAN thenfaina Armageddon indona hnuah chuan, eng nge ni leh ta ang? Chumi hnuah chuan hunbi thar ropui tak a inṭan dâwn a ni. Armageddon-a dam khawchhuakte, Pathian rorêlna laka an rinawmna fiah tawhte chu, khawvêl tharah hruai luh an ni dâwn a ni. Pathian aṭanga mihringte tâna hlâwkna mak tak mai luang chhuak chu sawi a va nuam dâwn êm!
2 Pathian Ram kaihhruaina hnuaiah dam khawchhuakte chuan paradis an siam ṭan leh dâwn a ni. Chumi huna chêngten an hlâwkpui vek tûrin mahni hmasialna tel lova hnathawh nân an tha leh zung zawng zawngte pawh hman a ni tawh ang a. Lei chu mihringte tâna chênna in mawi, muanawm leh lungawithlâk takah tihdanglam ṭan a ni dâwn a ni.
Felnain Sualna A Thlâk
3. Armageddon zawh veleh thawventhlâk nghâl huai tûr eng thil nge hriat tûr awm ang?
3 Hêng thil zawng zawng hi Setana khawvêl tihboral hnuah a takin a thleng dâwn a ni. Sakhaw dik lo hrang hrangte, khawtlâng inrêl dânte emaw, sawrkârte emaw a awm tawh lo vang a. Mipuite bum tûrin ramhuai thil sawimawina a awm tawh lo vang a, hêng thil rawn siam chhuaktu hnathawhna hmun zawng zawngte pawh Setana khawvêl ruala tihchhiat vek an ni dâwn a ni. Han ngaihtuah mah teh: Setana khawvêla boruak chhia zawng zawng a han fai vek tûr chu! A va thawventhlâk dâwn tehrêng êm!
4. Zirtîrna inthlâkthleng tûr chungchâng kha han sawifiah teh?
4 Chumi hnuah mihring rorêlna mi tichhe thei ngaihdânte chu Pathian aṭanga lo kal mi tihmasâwn tûr zirtîrna chuan a thlâk dâwn a ni. “I fate zawng zawng chu Jehova zirtîrin an awm ang.” (Isaia 54:13) Kumtina hetiang inzirtîrna ṭha hnuaiah chuan, “tuite hian tuifinriat a khuh reng angin, leilung hi Jehova hriatnain a khat zo vek dâwn a ni.” (Isaia 11:9) Mipuiten thil ṭha lo chu an zir tawh ngai lo vang, “khawvêla awmte chuan felna chu an zir ṭhîn” dâwn si a. (Isaia 26:9) Intihhmasâwnna thil ngaihtuah leh tih chu nitin nunphung a ni tawh ang.—Tirhkohte 17:31; Philippi 4:8.
5. Sualna leh mi suaksual zawng zawngte chungah eng thil nge thleng ang?
5 Chutiang chuan, tualthahna, dik lo taka tharum thawhna, pâwngsual, rûkrûk leh dân bawhchhiatna chi dang rêng rêng a awm leh tawh lo vang. Mi dangte thil sual tih avângin tuman an tuar a ngai tawh lo vang. Thufingte 10:30 chuan: “Mi felte chu tihsawnin an awm lo vang a, mi suaksualte erawh chu leilungah an awm lo vang” tiin a sawi a ni.
Hrisêlna Ṭha Famkim Pêk Kîr Leh
6, 7. (a) A tak taka thil awm tûr eng nge Ram rorêlnain a rawn tihtâwp ang? (b) Hemi chungchâng hi Isuan leia a awm laiin engtiangin nge thiltiha a lantîr?
6 Khawvêl tharah chuan, atîra helnain a rah chhuah ṭha lo tak takte chu zial bo vek a ni dâwn a ni. Entîr nân, Ram rorêlna chuan natna leh tarna a nuai bo ang. Tûnah chuan, hrisêlna ṭha tak neiin awm mah la, a tak taka thil awm tûr chu: i lo tar a, i mit a lo fiah lo va, i hate a lo chhia a, ri hriat theihnate a lo chak lo va, i vun a lo chuar a, i taksa chhûnga pêngte an lo tlachhia a, a tâwpah chuan i la thi dâwn a ni.
7 Amaherawhchu, chûng thil retheihthlâk tak tak kan nu leh pa hmasa berte aṭanga kan rochun chu hmânlai thil an ni thuai tawh dâwn a ni. Isuan leia a awm laia hrisêlna chungchângah thiltiha a entîr kha i la hrereng em? Bible chuan: “Mipui tam tak, kebaite, mitdelte, ṭawng thei lo te, piangsualte rawn hruaiin a hnênah an lo kal a, a ke bulah an dah a; tin, a lo tidam ta hlawm a. Chutichuan, mipui chuan ṭawng thei lote chu lo ṭawnga, piangsualte chu lo ṭhaa, kebaite chu kea kala, mitdelte chu hmutheia an hmuhin mak an ti hle a,” tiin a sawi a ni.—Matthaia 15:30, 31.
8, 9. Hrisêlna ṭha famkim pêk kîr leh huna khawvêl thara hlimna lo thleng tûr kha han sawifiah teh?
8 Kan dam lohna zawng zawngte nuai bo a nih chuan khawvêl thara hlimna lo thleng tûr chu a va nasa dâwn em! Hrisêl lohna avânga tuarna awm ṭhînte chuan nâ min tuartîr leh tawh ngai lo vang. “Chumi khuaa awm chuan ‘Ka dam lo ve’ a ti lo vang.” “Chumi hunah chuan mitdelte mit chu tihmenin a awm ang a, bengngawngte beng chu tihvârin a awm ang. Chumi hunah chuan kebaite chu sakhi angin an zuang ang a, ṭawngtheilote lei chu hlim takin a zai ang.”—Isaia 33:24; 35:5, 6.
9 Tûk tin zîng thawh apiangin a hma ni ai khân i hrisêl zâwk a ni tih hriat chhuah chu a nuam hle lo vang maw? Tarte tân pawh ni tin, Evi leh Adaman atîra an lo neih taksa leh rilru ṭha famkim an neih ve thlengin, an naupang leh tial tial a ni tih hriat chu a lungawithlâk hle lo vang maw? Bible thutiam chu: “A taksa hi tleirâwl thar leh sela, a vânglai chakna nîte chu lo kîr leh tawh se,” tih hi a ni. (Joba 33:25) Tarmitte, ri hriat theihna tûra puitute, kebaite tiang zak do te, ṭhutthleng nawrlirh te leh damdawite han paih bo chu a va hlimawm dâwn êm! Damdawi in te, damlo enkawltu dâktawr te, ha dâktawr te chu mamawh an ni leh ngai tawh lo vang.
10. Thihna chungah eng thil nge thleng ang?
10 Chutiang hrisêlna ṭha tak nei mite chuan thih an duh lo vang a. An tân thih a ṭûl bawk hek lo vang, mihringte hi kan rochun ṭhat famkimlohna leh thihna thununna hnuaiah kan awm dâwn tawh loh avângin. Krista chu “a hmêlma zawng zawng a ke hnuaia a dah hma loh chuan lalah a awm tûr rêng a ni si a. Hmêlma hnuhnûngber tihbova awm tûr chu thihna hi a ni.” “Pathian thilthlâwnpêk erawh chu chatuana nunna a ni.”—1 Korinth 15:25, 26; Rom 6:23; Isaia 25:8 pawh en rawh.
11. Engtiangin nge Thupuanin khawvêl thar hlâwknate a khaikhâwm?
11 Ngaihsaktu Pathian aṭanga Paradis-a awm mihring chhûngkaw hnêna hlâwkna lo luang tûr chu khaikhâwmin, Bible-a bu tâwp ber chuan heti hian a sawi: “An mit ata mittui zawng zawng [Pathianin] a hrufai ang a; thihna a awm leh thei tawh lo vang a, lungngaih te, ṭah te, nat te pawh a awm leh tawh hek lo vang; thil hmasate chu a ral ta,” tiin.—Thu Puan 21:3, 4.
Mitthite An Lo Kîr Leh
12. Isuan Pathian pêk a mitthi tihnun leh theihna kha engtiangin nge thiltiha a lantîr?
12 Isua khân damlo tihdam leh kebaite tihdam mai aia tam kha a ti a. Mitthite pawh thlân aṭangin a kaitho leh a ni. Chutiang chuan Pathianin mitthite kaihthawh theihna thiltihtheihna mak tak a pêk chu thiltihin a lantîr a ni. Pa pakhat a fanu thi tawh ina Isua a kal ṭum kha i hre chhuak em? Isua chuan hmeichhe naupang thi tawh hnênah chuan: “Chêmtê, tho rawh, ka ti a che,” a ti a. Eng nge a rah chhuah? “Hmeichhe naupang chu a lo tho va, a kal thei ta nghâl a.” Chu chu an hmuhin chuta awmte chuan “mak tih namênin mak an ti lo va.” An hlimna chu an ngawihbopui hlei thei lo a ni!—Marka 5:41, 42; Luka 7:11-16 pawh en rawh; Johana 11:1-45.
13. Mi eng angte nge tihnun leh ni dâwn?
13 Khawvêl tharah chuan, “mi felte leh fel lote thawhlehna a awm ang.” (Tirhkohte 24:15) Chumi hunah chuan Isuan mitthite kaihthawh theihna Pathianin a pêk chu a hmang dâwn a, a chhan chu hetianga a lo sawi avâng hian: “Kei hi thawhlehna leh nunna chu ka ni; tupawh mi ring chu thi mah sela a nung leh ang,” tiin. (Johana 11:25) Heti hian a sawi bawk: “Hriatrengna thlâna [Pathian hriatreng] awm zawng zawngin a [Isua] aw an hria ang a, an chhuak vek ang,” tiin.—Johana 5:28, 29.
14. Thihna a awm tawh dâwn loh avângin, eng thilte nge tihbo ni ve dâwn?
14 An hmangaihte rawn fin ve tûra a pâwl pâwla mitthite an lo nun leh hunah chuan lei pumpuia hlimna chu a va nasa dâwn tehlul êm! Dam khawchhuakte lungngaihna thlen tûrin mitthite chanchin thu ziakte a awm leh tawh lo vang a. Chu ai chuan anmahni hmangaihtute hlimna thlen tûrin mitthi tihnun leh tharte puanna a awm zâwk ang. Tichuan mitthi vuina te, mitthi vuinaa ruang hâlna tûr thing aichheh te, mitthi hâlna hmun te, thlânmual te emaw a awm tawh dâwn lo!
Remna Khawvêl Dik Tak Chu
15. Engtin nge zâwlnei Mika hrilhlâwkna hi a awmzia kimchanga hriat a nih ang?
15 Inremna tak tak chu mihringte nunphungah a tak takin a lang tawh ang a. Indona te, indona chawisângtute leh râlthuam siamchhuahte chu hmânlai thil a ni tawh dâwn a ni. Engvângin maw? A chhan chu hnam inṭhen hranna, hotu hran neia hnam awmkhâwm leh chi bîk ngaihsakna te a bo tawh dâwn avângin. Tichuan, a awmze kim berah chuan, “hnam dangin hnam dang chungah khandaih a lek tawh lo vang a, indo dân pawh an zir tawh hek lo vang,” tih hi a ni.—Mika 4:3.
16. Engtin nge Pathianin indonate hi thil theih a ni tawh lo tih a en fel ang?
16 Mihring thisena a tuihâlna vânga chatlak lova indona awm reng chanchinte han ngaihtuah chuan hei hi thil mak tak niin a lang mai thei. Mahse chu chu mihringte hi mihring leh ramhuai rorêlna hnuaia an awm avânga lo thleng a ni. Khawvêl tharah, Ram rorêlna hnuaiah chuan, hei hi thil lo thleng tûr chu a ni: “Hawh u, Jehova thiltihte hi en rawh u . . . Ani chuan indonate chu kâwlkil thlengin a tireh ṭhîn a, thal ngul chu a titliak a, fei chu a sât bung ṭhîn a; [indona] tawlailîrte chu meiah a rawh ral ṭhîn,” tih hi.—Sâm 46:8, 9.
17, 18. Khawvêl tharah chuan, mihring leh ramsate inkârah eng ang inlaichînna nge awm ang?
17 Mihring leh ramsate pawh, Eden huana an awm ang khân, inrem takin an awm bawk ang. (Genesis 1:28; 2:19) Pathianin: “Chumi niah chuan ramsate, chunglêng savate, leia rannungte nên thuthlung an tân ka siam ang a, . . . him takin ka awmho tîr ang,” a ti a ni.—Hosea 2:18.
18 Chu remna chu engtianga huap zau tûr nge a nih le? “Chinghnia chu berâm no nên an awm dûn tawh ang a, keitê chu kêl no nên an bawk dûn tawh ang; bâwng no leh sakeibaknei vânglai leh ran châwmthaute chu an awmho tawh ang a; naupang têin a hruai duah duah ang.” Ramsate chu mihring leh anmahni tân ngei pawh hlauhawm an ni ngai tawh lo vang a. “Sakeibaknei chuan bâwngpa angin buhpâwl a ei tawh” zâwk dâwn a ni!—Isaia 11:6-9; 65:25.
Lei Hi Paradis-ah A Inlet
19. Lei hi engah nge a lo chan ang?
19 Lei pumpui hi mihringte tâna chênna in nuam tâwp thei lo paradis-ah a inlet tawh dâwn a ni. Chu chu Isua pawhin amah ringtu mi pakhat thu a tiam theihna chhan a ni: “Ka hnênah Paradis-ah i la awm ve ang,” tiin. Bible chuan: “Thlalêr leh ram pilril chu a lâwm ang a; ram ro chu phûl pangpâr angin a pâr ang . . . thlalêrah chuan tuite a lo chik chhuak luah luah dâwn si a, ram rovah chuan luite tui a lo chik chhuak luah luah bawk ang,” tiin a sawi.—Luka 23:43; Isaia 35:1, 6.
20. Engvângin nge rilṭâmnain mihringte a tihchiai tawh ngai loh vang?
20 Pathian Sawrkâr hnuaiah chuan, rilṭâmnain mi maktaduai tam takte a ti chiai leh ngai tawh lo vang. “Leiah, tlâng chungahte hian buh tam tak a awm ang.” “Rama thing chuan rah a chhuah ang a, leiin a hlâwkna a chhuah ang a, an ramah chuan him takin an awm ang.”—Sâm 72:16; Ezekiela 34:27.
21. Chênna in neih lohna te, michhe vêng te, leh ṭhenawm hnai ṭha lo tak takte chungah eng thil nge lo thleng ang?
21 Retheihna, chênna in nei lo mipui, mi chhe vêng te, dân bawhchhiatnain a bawm ṭhenawm hnaite a awm tawh ngai lo vang. “Inte an sa ang a, chûngah chuan an awm reng bawk ang; grêp huante an siam ang a, a rah an ei bawk ang. Mi dang awmna tûrin in an sa tawh lo vang a, mi dang eiah grêp huan an siam tawh lo vang.” “Mi tinte chu an grêp hrui hnuaiah leh an theipui kûng hnuaiah an ṭhu zâwk ang a; tuman an tihlau lo vang.”—Isaia 65:21, 22; Mika 4:4.
22. Pathian rorêlna avânga malsâwmnate kha Bible-in engtiangin nge a hrilhfiah?
22 Mihringte chu hêng thil zawng zawng, leh a aia tam pawhin Paradis-ah malsâwm an ni dâwn a ni. Sâm 145:16 chuan: “[Pathian] i kut i phar a, thil nung zawng zawng châkna chu i tihreh sak ṭhîn,” tiin a sawi a. Bible hrilhlâwknain hetia a lo puang pawh hi a mak lo ve: “Thuhnuairawlhte erawh chuan lei hi an luah ang a, remna chênin an hmuingîl ang . . . Mi felte chuan lei hi an luah ang a, a chhûngah hian kumkhuain an awm ang,” a tih hi.—Sâm 37:11, 29.
Hun Kal Tawh Sût Leh
23. Hrehawm kan lo tuar tawh zawng zawngte kha Pathian Ramin engtiangin nge a sût dâwn?
23 Pathian Ram rorêlna chuan kum sâng ruk kal ta chhûng zawnga mihring chhûngkaw chunga thil tihchhiat tawh zawng zawng chu a rawn sût dâwn a ni. Chumi huna hlimna chuan miten hrehawm an lo tuar tawh rêng rêng kha a khûm vek dâwn a ni. A hmaa hrehawm tuar tawh hriatrengna chuan nunkhua a tibuai lo vang. Intihhmasâwnna ngaihtuah leh thiltih mite nitin nun dân tûr chuan thil hriatreng hrehawm tak takte chu zawi zawiin a nuai bo dâwn a ni.
24, 25. (a) Isaia’n thil lo thleng tûr eng nge a sawilâwk? (b) Hun kal tawha tuarna kan hriatrengnate kha an chuai tial tial ang tih engvângin nge kan chian theih?
24 Ngaihsaktu Pathian chuan: “Vân tharte [mihringte chunga vân sawrkârna thar] leh lei thar [mi fel awm khâwm] ka siam a nih hi; tûn hma thilte chu hriat rengin a awm tawh lo vang a, rilruah pawh a lût tawh hek lo vang. Nimahsela ka thil siamah chuan kumkhuain lâwmin hlim rawh u,” tiin a puang a ni. “Leilung pumpui hi a châwl a, a reh rawih rawih a: hla an sa chhuak phut a.”—Isaia 14:7; 65:17, 18.
25 Tichuan a Ram hmangin, Pathian chuan hun rei tak chhûng lo awm tawh dinhmun chhe tak hi a letling fai vek dâwn a ni. Kan hun kal tawha tuarna kan lo neih tawh rêng rêng min rulh mai bâk aia tam daih malsâwmna min vûrin min ngaihsakna ropui tak chu kumkhaw tlaitluanin a lantîr dâwn a ni. Chutih hunah chuan hmâna harsatna kan tuar tawhte pawh, kan la hre reng duh a nih pawhin kan hriat rengna chu a reh tial tial dâwn a ni.
26. Engvângin nge Pathianin hun kal tawha kan tuarna rêng rêng min rulh leh ang?
26 Chu chu Pathianin he khawvêla hrehawmna kan lo paltlangte avânga min rulh dân tûr a ni. Ṭha famkim lova kan piang hi kan tih dik loh a ni lo tih a hre reng a ni, a chhan chu kan thlahtu bul berte aṭangin ṭhat famkim lohna chu kan rochung si a. Ramhuai khawvêla kan lo piang hi kan tih dik loh a ni lo, a chhan chu Evi leh Adama kha lo rinawm ta sela chuan, Paradis-ah kan piang ngei dâwn si a. Tichuan Pathian chuan khawngaihna nasa tak avângin hun kal tawha thil ṭha lo kan chunga thlentîrte chu rulh mai aia tam a ti dâwn a ni.
27. Eng zâwlnei hrilhlâwknate nge khawvêl thar mak taka thleng famkim tûr?
27 Khawvêl tharah chuan, Rom 8:21, 22-a zalênna a lo sawilâwk hi mihringten an tem tawh dâwn a ni: “Thil siam zawng zawngte ngei pawh chu chhiatna bâwih ata tihchhuahin an awm ang a, Pathian fate zalênna ropuiah chuan an lût dâwn si a. Thil siam zawng zawngte chu tûn thlengin rûm leh nauvei na tuarin an awm hlawm tih kan hre si a,” tih hi. Chumi hunah chuan mipuiten: “I ram lo thleng rawh se. I duhzâwng vâna an tih angin leia mi’n ti rawh se,” tia ṭawngṭaina thlen famkimna hi an hmu ang. (Matthaia 6:10) Lei Paradis dinhmun mak tak mai chuan vân lam dinhmun chiah chiah a lantîr dâwn a ni.
[Phêk 23-naa milemte]
Khawvêl tharah chuan tarte chu an vânglai nîah an kîr leh ang
[Phêk 24-naa milem]
Natna leh piansualna zawng zawngte chu khawvêl tharah nuai bo vek an ni ang
[Phêk 25-naa milem]
Khawvêl tharah chuan mitthite chu nunnaa kaihthawh leh an ni ang
[Phêk 26-naa milem]
‘Indo dân pawh an zir tawh hek lo vang’
[Phêk 27-naa milem]
Mihringte leh ramsate chu inrem takin Paradisah an awm ang
[Phêk 27-naa milem]
‘Pathian chuan a kut pharin thil nung zawng zawng châkna a tihreh sak ang’
[Phêk 28-naa milem]
Pathian Ram chuan hrehawmna kan lo tuar chhuah zawng zawngte min rulh mai aia tam a ti dâwn a ni