‘Engmah An Hre Duh Lo’

VAUKHANNA ngaihzamna chuan chhiatna a thlen thei a ni.

Kum 1974 khân, Australia rama Darwin khawpuia mite chu kût hlimawm tak hmang tûra an inbuatsaih mup mup laiin, thlipui (cyclone) a lo tleh dâwn tih hriattîrna ham rîk chu a rawn ri ta phut mai a. Mahse, Darwin khawpui chuan kum 30 vêl chu cyclone tihchhiat a tuar tawh si lo. Tûnah pawh engvângin nge a tihchhiat kher ang? A mi chêng tam tak chuan thlipui na tak mai a lo tleh a, in chungte a thlawh vek a, a bangte a tihchhiat hma loh zawng an ngaizam lui tlat a. A tûk zîngah chuan, chu khawpui chu a ram hneh hle a ni.

Kum 1985 November thla khân Colombia ramah tlâng a kâng a. Vûr sûr chi leh vûr tlangte a tui vek avânga chirhdiak luang chuan Armero khuaa mi chêng 20,000 chuang chu a nung chungin a chhilh vek a ni. Vaukhân lâwkna a awm lo vem ni? Chu tlâng chu thla engemaw zât chhûng thâwm neiin a nghîng dur dur tawh a. Mahse, Armero-a mite chuan tlâng kâng bula khawsa ṭhang tawh tih takah an ngai pawimawh lêm lo va. Khaw chhûng hotute chuan tlâng a kâng thuai dâwn tih vaukhânna dawng mah se, mipuite chu an vaukhân lêm lo a ni. Mite thlamuan nân radio-ahte thu puanchhuahna neih a ni a. Biak ina thu puannaah lah mite chu thlamuang taka awm tûra fuih an ni zâwk mah a. Tlai lam a rawn thlen chuan, puak thâwm nasa tak mai vawi hnih a rawh chhuak ta. Nang ni ta la, i thil neihte kalsanin, i tlân chhia ang em? Mi tlêm tê chauhvin a tlai luat hmain chutiang chuan an ti a ni.

Leilung chanchin zir mite chuan lîr a nghînna tûr hmun chu an hrilh lâwk dik thei tlângpui a. Mahse, a hun dik tak chu an sawi dik khât hle thung a ni. Kum 1999 khân, lîrnghîng chuan khawvêl pumah mi 20,000 vêl nunna a la a. Chuta thi ta tam takte chuan chutiang an tawn chu an inring ngai lo rêng rêng a ni.

Pathian Vaukhânnate Hi Engtin Nge I Chhân Lêt?

Bible chuan kum rei tak kalta aṭangin ni hnuhnûngte târ langtu thilthlengte chu a sawi lâwk diam tawh a. Chu mi chungchângah chuan “Nova dam lai” hun kha ngaihtuah tûrin min fuih a ni. “Chûng nî tuilêt hmate chuan” tharum thawhna hluar takin mite rilru khawih hle mah se, an nî tin nun dân pângngaiah an buai êm êm a. Pathianin a chhiahhlawh Nova hmanga vaukhânna thu a pêkte chungchâng erawh chu “tui a lo lêt a, an zaa a lâk bo vek hma loh chuan engmah an hre [duh] lo,” a ni. (Matthaia 24:​37-39) Nang ni ta la, vaukhânna thu chu i ngaihsak ang em? Tûnah chutiang chuan i ngaihsak em?

A nih leh, Abrahama tupa Lota hun laia Tuipui Thi (Dead Sea) bul, Sodom khuaa awm ni ta la, engtin nge i tih ang? Chu mi hmun vêl chu paradis ang mai a ni a. A khawpui lah a hausa hle bawk a. A mi chêngte lah engto rêng nei lovin nuam takin an khawsa a ni. Lota hun lai chuan mite chuan “an eiin an bâr a, an leiin an hralh a, an chîngin an sa ṭhîn a.” An chênna hmuna mite nungchang lah a bawlhhlawh êm êm bawk nên. Chuta awm chu ni ta la, Lota’n an thil chîn ṭha lote laka vaukhânna thu a sawi chu i lo ngaihsak ang em? Pathianin Sodom khua tihboral a tum tih a hrilh che chu i lo ngaihthlâksak ang em? Nge Lota mâkpa ni tûrte’n an nuihsan ang khân, fiamthuah i lâksak zâwk dâwn? Lota nupui ang khân, i tlân chhiatsan hnuah i hawikîr leh mai lâwng maw? Mi dangte chuan vaukhânna chu la thutak lo mah se, Lota’n Sodom a tlânchhiatsan nî chuan, “vân aṭangin mei leh kât a sûr a, an zain a tihlum ta vek a.”​—⁠Luka 17:​28, 29.

Kan hun laia a tam zâwk pawh hian engmah an hre duh lo. Mahse, hêng entîrnate hi kan tâna vaukhânna ni tûrin Bible-ah chhinchhiah a ni, NGAIHVEN RENGA kan awm theih nân.

[Phêk 22-naa bâwm/milem]

Khawvêl Pumah Tui A Lêt Tak Tak Em?

Mi thiamte chuan a lêt tak tak lo an ti. Mahse, Bible chuan a thleng tak tak a ti thung.

Isua Krista ngei pawhin tuilêt chanchin a sawi a; tin, tui a lêt lai pawhin a awm reng a, vân aṭangin a thlîr reng a ni.

[Phêk 23-naa bâwm/milem]

Sodom leh Gomorra Kha Tihchhiat A Ni Tak Zet Em?

Thil hlui chanchin zirna chuan tihchhiat a ni tak zet tih a târ lang.

Khawvêl thilthleng chanchin ziahnaah pawh sawi lan a ni.

Isua Krista pawhin a thlen ngei thu a nemnghet a, chuta thilthleng chu Bible bu chi hrang hrang 14-ah târ lan a ni.