ZIRLAI 10

Engtin Nge Jehova Thuhretute Inkhâwmte Chu I Hlâwkpui Theih?

Chhut Chhuah Edition

Jehova Thuhretute inkhâwmah i tel ngai tawh em? I la tel ngai lo a nih chuan, i vawi khat inkhâwmnaah chuan i zâm deuh pawh a ni thei a. Heti hian i ngaihtuah mai thei: ‘Hêng inkhâwmnaahte hian eng nge an tih ṭhin? Engvângin nge a pawimawh? Engvângin nge ka inkhâwm ang?’ tiin. He zirlaiah hian mi dangte ruala inkhâwmnain Pathian a hnaihtîr dân che leh mi mal taka a ṭanpui dân che i hria ang.

1. Kan inkhâwm chhan pawimawh ber chu eng nge ni?

Bible ziaktu pakhatin mi dangte ruala kan inkhâwm chhan pawimawh ber a sawi chu chhinchhiah rawh: “Inkhâwmnaahte chuan LALPA chu ka fak ang” tiin. (Sâm 26:12) Chutiang bawkin, Jehova Thuhretute chuan inkhâwm aṭangin hlimna nasa tak an hmu a. Khawvêl pumah hian chawlhkâr tinin Pathian chawimawi tûr te, fakna hla sa tûr te, leh ṭawngṭai tûrtein an inkhâwm ṭhîn. Kum tinin chutiang tih nâna ruahman inkhâwmpuiahte chuan an tel ṭhîn bawk.

2. Kan inkhâwmahte chuan eng thu nge i zir ang?

Inkhâwmahte chuan Pathian Thu ‘a awmzia hrilhfiah leh mite hriat chiantîr’ chu kan tum ber a ni a. (Nehemia 8:8 chhiar rawh.) I rawn inkhâwm chuan Jehova leh a mize ropui takte chu i hria ang. A hmangaihna che i hriat tam poh leh amah i hnaih lehzual ang a. Nun awmze nei tak nei tûra a ṭanpui theih dân che pawh i hmu chhuak bawk ang.—Isaia 48:17, 18.

3. Engtin nge kan inkhâwmnaa mi dangte nêna inbiakna chu i hlâwkpui theih?

Jehova chuan ‘hmangaih leh thil ṭha tiha inchawk tho tûra inngaihtuah tawn tûrin leh kan inkhâwmte bânsan lo tûrin’ kaihhruaina min pe a ni. (Hebrai 10:24, 25) Kan inkhâwmahte chuan mi inhmangaih takte leh nangmah anga Pathian chungchâng zir belh duhtute chu i hmu ang. Bible ṭanchhan mi tichak thei tak thusawite chu i ngaithla ang a. (Rom 1:11, 12 chhiar rawh.) Kawppui nei leh nei lote tawh ṭhin harsatnate hlawhtling taka hmachhawntute pawh i be thei bawk ang. Hêng hi Jehova’n inkhâwm ṭhîn tûra min duh chhan ṭhenkhatte a ni.

ZIR BELHIN HMUH BELH RAWH

Jehova Thuhretute inkhâwm dân leh an inkhâwma tel tûra theih tâwp chhuah a phû chhan hriat tum rawh.

4. Jehova Thuhretute inkhâwmte

Kum zabi pakhatnaah khân, Kristiante chu Jehova be tûrin an inkhâwm ziah a. (Rom 16:3-5) Kolossa 3:16 chhiarin, he zawhna hi sawiho vang che u:

Engtin nge Kristian hmasate’n Jehova an biak?

Tûn laiah pawh, Thuhretute chu an inkhâwm ziah bawk. An inkhâwm dân hriat nân, VIDEO chu chhuah rawh. Tichuan, kohhran inkhâwm lai lem chu enin, a hnuaia zawhnate hi sawiho vang che u.

VIDEO: Kingdom Hall-ah Eng Nge Thleng Ṭhîn? (2:13)

Kingdom Hall-a thilthleng leh Kolossa 3:16-a i thu chhiarah inanna eng nge i hmuh?
Video, a nih loh leh milem-ah hian inkhâwm chungchânga i rilru latu thil dang eng nge i hmuh?

Korinth thawn hnih 9:7 chhiarin, he zawhna hi sawiho vang che u:

Engvângin nge Jehova Thuhretute inkhâwmah thawhlâwm khawn a nih loh?

Bible zirpuitu che nên hian inkhâwm lo awm tûra sawiho tûr thu pakhat chu lo en lâwk rawh u.

Inkhâwma a eng lai nge i tân ngaihvenawm ber, a nih loh leh ṭangkai ber tûra i rin?

I lo hre tawh em?

Kan website jw.org-ah hian khawvêl hmun hrang hranga kohhran inkhâwm kan neihna hun leh hmunte a hmuh theih.

Milem: Kingdom Hall-a inkhâwm hma, inkhâwm hnu, leh inkhâwm laia thilthlengte. A aṭanga D thlengin târ lan nawn a ni.

A. Thuhretu pakhatin dawhsân aṭangin Bible ṭanchhanin thu a sawi.

Kan inkhâwmahte chuan thusawi te, lemchan te, leh video-te a tel a. Inkhâwmte chu hla leh ṭawngṭainaa ṭan leh tihtâwp a ni
Inkhâwma hun ṭhenkhatah chuan ngaithlatute pawh chhânna pe tûra sâwm an ni
Chhûngkuate, nula tlangvâlte, kum upate, leh naupangte pawh tiamin, mi zawng zawng an tel thei
Kan inkhâwmahte chuan thawhlâwm khawn a ni ngai lo

5. Inkhâwma tel tûr chuan theih tâwp chhuah a ngai

Isua chhûngkua lo ngaihtuah ta i la. Kum tina neih Pathian biakna kûta tel tûrin, Nazareth aṭanga mêl 60 vêla hla Jerusalem panna tlâng ram kawngah kein an zin ṭhîn a ni. Luka 2:39-42 chhiarin, hêng zawhnate hi sawiho vang che u:

Jerusalem panna zin kawng chu a hahthlâk i ring em?
Engvângin nge inkhâwma tel thei tûrin theih tâwp i chhuah a ngaih mai theih?
Chutianga theih tâwp chhuah a phûin i hria em? Engvângin nge?

Milem: Josefa, Mari, leh Isua unaute zînga pakhat zin tûrin an inbuatsaih. 1. Josefa’n sabengtung chungah ipte a hlâng a, Mari’n ei tûrte a buatsaih. 2. Nazareth aṭanga Jerusalem zin kawng.

Bible chuan Pathian be tûra inkhâwm chu thil pawimawh tak niin a sawi. Hebrai 10:24, 25 chhiarin, he zawhna hi sawiho vang che u:

Engvângin nge kan inkhâwm ziah ang?

MI ṬHENKHAT SAWI DAN: “Mi dangte ruala inkhâwm kher a ngai lo. Ina mahnia Bible chhiar a tâwk.”

Eng Bible châng leh Bible entîrnain nge hemi chungchânga Jehova duh zâwng târ lang?

KHAIKHAWMNA

Inkhâwma telna chuan Jehova chungchâng hriat belh tûr te, amah nêna inṭhianna nghet lehzual nei tûr te, leh mi dangte ruala amah be tûrtein a ṭanpui ang che.