April

Bible hun laia Jehova chhiahhlawhte chuan an beisei loh harsatnate an hmachhawn a. Jakoba hi han ngaihtuah teh. Ani chu a pain ringtu an chhûng khat Labana fanute zînga mi nupuia nei tûrin thu a pe a, chutianga a tih chuan Jehova’n nasa takin mal a sâwm ang tih a hrilh bawk a ni. (Gen. 28:1-4) Jakoba chuan chutiang chuan a ti a. Tichuan, Kanaan ram chhuahsanin, fanu pahnih—Leaii leh Rakili—neitu Labana in lam a pan ta a ni. Jakoba chuan Labana fanu naupang zâwk Rakili chu a hmangaih êm avângin, nupuia a neih theih nân a pa hna kum sarih thawh a remti a. (Gen. 29:18) Mahse, Jakoba beisei angin thil a thleng lo. Labana’n ani chu bumin a fanu upa zâwk Leaii a neihtîr a. Kâr khat hnuah, Labana’n Jakoba chu Rakili neihtîr a remti a; mahse, kum sarih dang a rawng a bâwlsak leh a ngai thung ang. (Gen. 29:26, 27) Labana chuan Jakoba hlawh tûr chungchângah pawh dik lo takin thil a ti a. Chutiang chuan kum 20 chhûng zet Jakoba chungah dik lo takin a ti a ni!—Gen. 31:41, 42. w23.04 15 ¶5

Tu hnênah nge thlamuanna leh kaihhruaina kan dîl theih? Chu zawhna chhânna chu kan hria a ni. Ṭawngṭaiin Jehova kan pan thei a. Ani chuan chutianga ti tûr chuan min sâwm a. ‘Bâng lova ṭawngṭai’ tûrin min duh a ni. (1 Thes. 5:17) Ṭawngṭaiin zalên takin kan pan thei a, kan nun kawng engkimah a kaihhruaina kan dîl thei a ni. (Thuf. 3:5, 6) Pathian ngilnei tak a nih avângin, Jehova chuan a hnêna kan ṭawngṭai theih zât a bithliah lo. Isua chuan Jehova’n ṭawngṭaina a ngaihlu tih a hria a. Leia a rawn kal hmain, a Pain mi rinawm a hmei a pate ṭawngṭaina a chhâng tih a hmu a ni. Entîr nân, a Pain Hani te, Davida te, Elija te, leh mi rinawm tam takte tih tak zeta ṭawngṭaina a chhân lai chuan Isua chu a bulah a awm a. (1 Sam. 1:10, 11, 20; 1 Lal. 19:4-6; Sâm 32: 5) Chuvângin, Isua chuan a zirtîrte chu rinnghehna nêna ṭawngṭai tûrin a zirtîr a ni.—Mt. 7:7-11. w23.05 2 ¶1, 3

Puithiam Lal Jehoiada chuan Jehova a ṭih a. Chu chu Jezebeli fanu Athali’n Judai rama lalṭhutthlêng a chhuh khân a lang chiang hle. Mite chuan Athali hlauhna tûr chhan ṭha tak an nei a. Ani chu a nunrâwn êm avâng leh thuneihna a duh êm avângin lal thlah zawng zawng—a tupate ngei chu thah vek a tum a ni! (2 Chro. 22:10, 11) Chûng naupangte zînga pakhat—Joasa—chu Jehoiada nupui, Jehosabeathi’n a humhim a. Naupang chu an nupaa thukruin, an enkawl a. Chutiang kawng chuan Jehoiada leh Jehosabeathi chuan Davida lal thlah kal zêl humhimnaah an ṭanpui a ni. Jehoiada chu Jehova chungah a rinawm tlat a, Athali a hlauhna chu thil dik tih loh phah nân a hmang lo. Joasa chu kum sarih mi a nihin, Jehoiada chuan Jehova chunga a rinawmna chu a lantîr leh a. Ruahmanna a siam a ni. Ruahmanna chu a hlawhtlin chuan Davida ro luahtu tûr dik tak, Joasa chu lal a ni ang a. Ruahmanna chu a hlawhchham erawh chuan, Jehoiada’n a nun a chân ngei ang. Jehova malsâwmnain ruahmanna chu a hlawhtling a ni. w23.06 17 ¶12-13

Lal Nebukadnezzara tân chu a hrilhfiahna thu chu a lalram chunga helna anga thlîrin Daniela chu tihhlum theih a ni a. Mahse, Daniela chuan mumang awmzia chu huaisen takin a hrilhfiah a ni. Daniela dam chhûng zawnga huaisen tûra ṭanpuitu chu eng nge ni thei ang? A tleirâwl lai aṭangin a nu leh pate entawn tûr siam chu a zir tih rinhlelh rual a ni lo. (Deut. 6:6-9) Daniela chuan Thusâwm pêk ang chi, Dân bulte chauh ni lovin, Israel mite ei theih leh ei theih loh chungchângte pawh chipchiar takin a hria a ni. (Lev. 11:4-8; Dan. 1:8, 11-13) Ani chuan hmân laia Pathian mite chanchin a zir bawk a, Jehova tehnate an zawm loh avânga an chunga thilthlengte pawh a hria a ni. (Dan. 9:10, 11) A dam chhûnga a thiltawnte chuan Daniela chu eng thil pawh thleng se, Jehova leh a vântirhkoh thiltithei takte chuan an ṭanpui ang tih a rinnghehtîr a ni.—Dan. 2:19-24; 10:12, 18, 19. w23.08 3 ¶5-6

Rebeki chuan a dam chhûngin a ṭûlna hmun leh a ṭûl dân azira hma laa thiltih dân a hria a, ani chu huaisen taka thu tlûkna siam thei hmeichhe fing tak a ni a. (Gen. 24:58; 27:5-17) Mahse, ani chuan mi dangte zahna a neiin kaihhruainate a zâwm a ni. (Gen. 24:17, 18, 65) Nang pawh Rebeki anga Jehova ruahmanna siamte inngaitlâwm taka i thlâwp chuan, i chhûngkuaah leh kohhranah entawn tûr ṭha i ni ang. Kristian mi puitling zawng zawngte neih ngai mizia chu thuhnuairawlhna hi a ni a. Estheri chu Pathian ṭih mi, mi thuhnuairawlh tak a ni a. A thuhnuairawlhna chuan lalnu a nih khân chapo lo tûrin a ṭanpui a ni. Ani chuan a unaupa Mordekaia thurâwn pêk chu ngaithlain a zâwm a. (Est. 2:10, 20, 22) Nang pawhin mi dangte hnên aṭang thurâwn ṭhate dîla zâwmin, chutiang thuhnuairawlhna chu i lantîr ve thei a ni. (Tit. 2:3-5) Estheri chuan kawng dang pawhin thuhnuairawlhna a lantîr a. Ani chu a “nalhin a hmêl a ṭha hle mai a;” mahse, mi dangte ngaihvenna lâk tumin thil a ti lo.—Est. 2:7, 15. w23.12 19 ¶6-8

A lutuka inthiam lohna chu kan phurh tûr phur a ni lo. Kan sual kan puan a, kan inlamlêt a, tisual leh tawh lo tûra hma kan la mêk a nih chuan, Jehova’n min ngaidam tawh tih kan ring thei a ni. (Tirh. 3:19) Chûng rahbite kan rah hnu chuan Jehova’n inthiam lohna nei reng tûrin min duh lo. Inthiam lohna neih rengnain min tihnat theih dân chu a hria a. (Sâm 31:10) Kan lungngaihna kan thunun zo lo a nih chuan, nun intlânsiakna chu kan tlâwmsan thei a ni. (2 Kor. 2:7) A lutuka inthiam lohna i la nei reng a nih chuan, Pathian “ngaihdamna” chu ngaihtuah tlat ang che. (Sâm 130:4) Ani chuan inchhîrna dik tak lantîrtute a ngaihdam hian, “an sualna pawh ka hre reng dâwn tawh si lo,” tiin a tiam a. (Jer. 31:33, 34) Chumi awmzia chu Jehova’n tûn hmaa i thil tihsualte chu a ngaihtuahnawn tawh lo tihna a ni. Kohhrana mawhphurhna ṭhenkhat i chân avâng pawhin lungngai suh ang che. Jehova’n i sualte a ngaihtuahnawn tawh lo ang bawkin, nang pawhin ngaihtuah nawn tawh lovang che. w23.08 30-31 ¶14-15

COVID-19 hripui a lên chhûng khân, inawpna pâwl aṭanga kaihhruaina zâwmtu Jehova Thuhretute chu chanchin dik lo ngaithlatute angin an mangang lutuk lo a ni. (Mt. 24:45) “Thil pawimawh zâwkte” chu kan ngaihven tlat tûr a ni a. (Phil. 1:9, 10, NWT) Rilru kal pêntîrna chuan kan hun tam tak a lain, min tichau thei a. Nuna kan thiltih pângngaite—ei leh in te, chawlh hahdamna te, leh ei zawnna hnathawhte—chu nuna kan dah pawimawh ber a nih chuan, chu chuan kan rilru a kal pêntîr thei a ni. (Lk. 21:34, 35) Chu bâkah, nî tin hian khawtlâng inlungrual lohna leh politics thila inhnialna chanchin hriat tûr a tam hle a. Chûng thilte’n kan rilru la pêng lo tûrin theih tâwp kan chhuah tûr a ni. Chutiang a nih loh chuan kan rilru leh thinlungah ṭan lam kan nei ṭan thei a. Satana chuan thil dik ti tûra kan tumna chu min tihchhiatsak tumin kawng chi hrang hrang a hmang a ni. w23.07 16-17 ¶12-13

Jehova mite tân Krista thih Hriatrengna nî chu kum khata ni pawimawh ber a ni a. Chu nî chu Isua’n hmang chhunzawm zêl tûra a zirtîrte hnêna thu a pêk awmchhun a ni. (Lk. 22:20) Isua inthawina chunga kan lâwmzia lantîr theih dân kawng tam tak min hriat nawntîr a ni. (2 Kor. 5:14, 15) Chu bâkah, chu chuan kan unaute nên “inthlamuan tawn theihna” hun remchâng min pe bawk. (Rom 1:12) Tichuan, tuina nei tam tak pawh an thil hmuh leh an thu ngaihthlâkte avângin, nunna kawng zawh ṭan tûra chêttîrin an awm a. Hriatrengnain khawvêl puma unaute a inpumkhattîr dân chu ngaihtuah bawk ang che. Chuvângin, Hriatrengnain kan thinlunga hmun pawimawh tak a luah chu thil mak a ni lo! w24.01 8 ¶1-3

Jehova leh Isua’n tlanna atâna man an pêk chu kan chhût ngun poh leh mi tinte min hmangaihzia kan hre thiam lehzual thei a ni. (Gal. 2:20) Tlanna chu Jehova rorêl diknain a phût avâng chauhva pêk a ni lo va. Hmangaihna thilpêk a ni. Ani chuan a neih hlu ber—Isua chu hlânin, min hmangaihzia a lantîr a. A Fapa chu kan tâna hrehawm tuar a, thih a phal a ni. Jehova chuan a rilru awm dânte chu ngawihpui mai lovin, min hmangaihzia chu a sawi chhuak a. (Jer. 31:3) Ani chuan min hmangaih avângin a lamah min hîp a ni. (Deuteronomy 7:7, 8 nên khaikhin rawh.) Eng thil mahin, tu mahin chu hmangaihna ata chu min ṭhen thei lo vang. (Rom 8:38, 39) Chu hmangaihna chuan engtin nge a awmtîr che? w24.01 28 ¶10-11

Hriak thih Kristiante chuan chu beiseina chu an ngaihlu tak zet a. Hriak thih unaupa Frederick Franz-a chuan thinlung takin: “Kan beiseina chu a chiang ngei a, chu chu kan ngaihtuah phâk bâkin, pâwl tlêm tê mi 1,44,000-te chungah a thleng famkim ṭheuh dâwn tih kan chiang a ni,” tiin a sawi. Kum 1991-ah unau Franz-a chuan heti hian a sawi a ni: “Kan beiseina chu kan la ngaihlu reng a. . . . Kan nghah chhûng a rei poh leh kan ngaihlu tial tial a. Kum maktaduai khat pawh nghah ngai dâwn mah se, chu chu nghah manhla tak a ni a. Tûn hma zawng aiin kan beiseina chu ka ngaihlu lehzual a ni,” tiin. Kan beisei chu vâna chatuana nun emaw, leia chatuana nun emaw pawh ni se, chu beiseina ropui tak chuan lâwmna tûr chhan min pe a ni. Lâwmna min neihtîrtu kan beiseina chu kan tinghet lehzual thei a ni. w23.12 9-¶6; 10-8

Biak bûk luhna pâwn lamah chuan Jehova hnêna rana hâlral inthawi nân dâr maichâm a awm a. (Ex. 27:1, 2; 40:29) Mahse, chûng inthawinate chuan mite tân sual ngaihdamna pumhlûm a pe thei lo a ni. (Heb. 10:1-4) Chutianga biak bûka rana inthawina hlan ṭhinna chuan mihringte sual ngaihdamna pumhlûm thlentu tûr a entîr a ni. Isua chuan a lei nunna chu mihringte tâna tlanna inthawina atâna hlân tûrin Jehova’n leiah a rawn tîr tih a hria a. (Mt. 20:28) Chuvângin, baptisma a chan khân, Jehova duh zâwng ti tûrin a inpe a ni. (Joh. 6:38; Gal. 1:4) Isua chuan tu pawh amah ringtu apiangte chu an sualna ngaihdam pumhlûm a nih theih nân ‘vawi khatah’ a nun a hlân a ni.—Heb. 10:5-7, 10. w23.10 26-27 ¶10-11

Keimahni chuan engtikah mah sual leh thihna ata kan intlan thei ngai lo vang. (Sâm 49:7, 8) A Fapain kan tâna a nun a pêkna tûr chu buatsaihin, Jehova leh Isua’n inpêkna nasa tak an lantîr a. Kan tâna an inpêkna chungchâng kan chhût ngun poh leh tlanna chu kan ngai hlu lehzual dâwn a ni. Adama’n thil a tihsual khân chatuana nun theihna thilpêk chu amah leh a thlah zawng zawngte’n an chân ta a. Adama hloh tâk chu nei lêt leh tûrin Isua’n a nun ṭha famkim a hlân a. Leia a awm chhûng zawng khân “ani chuan thil rêng a tisual lo va, a kaah ngamthlêmna a awm hek lo.” (1 Pet. 2:22) Isua a thih khân ṭha famkim a ni a; chuvângin, a nun hlutna chu Adama hloh tâk nên a intluk chiah a ni.—1 Kor. 15:45; 1 Tim. 2:6. w24.01 10 ¶5-6

Isua kaihthawh a nih hnu chuan, thlarau lam biak ina Hmun Thianghlim Berah a lût a. Heta ṭang hian tlanna inthawina leh Isua Krista puithiam nihna ṭanchhana biakna thianghlim atâna Jehova ruahmanna chungnun zâwkzia chiang takin kan hmu thei a. Israel rama puithiam lal chu mihring kuta sak Hmun Thianghlim Berah rana inthawina thisen kengin a lût a; mahse, Isua chu Jehova hmaa inlan tûrin hmun thianghlim ber “vânah ngei” a lût a ni. Chutah chuan “amah leh amah inhlânin, sual tihbo nân” a nun ṭha famkim hlutna chu a hlân a. (Heb. 9:12, 24-26) Vân lam beiseina nei kan ni emaw, lei lam beiseina nei kan ni emaw pawh ni se, kan za vai hian Jehova chu a thlarau lam biak inah kan be ṭheuh thei a ni. w23.10 28 ¶13-14

Rorêl mêk Lalber leh khawngaihna nei tak Puithiam Lalber vâna Isua chanvo hi han ngaihtuah teh. Amah kal tlangin Pathian “khawngaihna lalṭhutphah” chu puih “kan ngaih huna” ṭawngtaia panin khawngaihna leh ṭanpuina kan dîl thei a ni. (Heb. 4:14, 15) Vân aṭanga Jehova leh Isua’n kan tâna an tih tawhte leh an la tih tûrte ngaihtuah lovin, nî i liamtîr lovang u. Min hmangaihna chuan kan thinlung a khawihin ṭhahnemngai taka rawngbâwlnaah leh biaknaa tel tûrin min chêttir tûr a ni. (2 Kor. 5:14, 15) Kan lâwmzia kan lantîr theih dân kawng ṭha ber pakhat chu mi dangte Jehova Thuhretu ni tûr leh Isua zirtîr ni tûra ṭanpui hi a ni a. (Mt. 28:19, 20) Pathian leh Krista chunga a lâwm êm avângin tirhkoh Paula’n chutiang chuan a ti a. Jehova’n “mi zawng zawng chhandama awmah leh thutak hriaah a duh,” tih a hria a ni.—1 Tim. 2:3, 4. w23.10 22-23 ¶13-14

Kan zînga tam tak chuan Paradis chungchâng mi dangte kan hrilh hunah, he Bible châng thlamuanthlâk tak hi kan hmang ṭhîn a. A nih leh, engtin nge Thu Puan 21:3, 4-a malsâwmnate chu a lo thleng ngei ang tih keimahni ngeiin kan chian a, mi dangte pawh kan chiantîr theih? Jehova chuan he thutiam thlamuanthlâk tak hi min pêk mai bâkah, a lo thleng ngei ang tih kan rin theih nachhan chu a dawta Bible chângah kan hmu a. Chutah chuan: “Tin, lalṭhutphaha ṭhu chuan, ‘Ngai teh, thil engkim ka siam thar e,’ a ti a. Tin, ‘Ziak rawh, hêng thu hi a rinawmin a dik si a,’ a ti a. Tin, ka hnênah, ‘A lo thleng ta. Kei Alpha leh Omega, a Bul leh a Tâwp ka ni,’” tiin kan chhiar a ni.—Thup. 21:5, 6a. w23.11 3 ¶3-5

Ṭhalai unaupain ngaihtuah thiamna a lantîr theih dân kawng khat chu a thawmhnaw hâk dânah leh a inchei dân kawngah a ni a. Incheina chhuak thar a tam zâwk chu Jehova chunga zahna nei lotute leh nungchang bawlhhlawh taka nungtute chawilâr leh tihchhuah a ni. Nungchang bawlhhlawhna lam an ngaihtuahna chuan an thawmhnaw hâkte chu tâwt lutuk, a nih loh leh mipate pawh hmeichhia angin a lantîr a. Kristian puitlinna lam pan ṭhalai unaupa chuan thawmhnaw hâk tûr a thlan hunah kohhranah entawn tûr ṭha siamin Bible thu bulte a inkaihhruaitîr ngei ang. Heti hian a inzâwt thei a ni: ‘Ka duh thlanna hian rilru dik tak ka puin, mi dangte chungah zahna ka lantîr tih a târ lang em? Ka inthuam dân hian mi dangte chu Pathian rawngbâwl ka ni tih awlsam takin a hriattîr em?’ tiin. (1 Kor. 10:31-33) Ngaihtuah thiamna nei ṭhalai unaupate chu an unaute chauh ni lovin, an Pa vâna mi pawhin a ngaihlu a ni. w23.12 26 ¶7

Hun kal tawhah ‘chhim lam lal’ pawhin Jehova mite chu a tiduhdah a. (Dan. 11:40) Entîr nân, kum zabi 20 tîr lamah khân unau tam tak chu an Kristian tualdawihna avângin lung ina tântîr an ni a, Thuhretu naupangte pawhin chumi chungchâng avâng chuan school aṭanga hnawhchhuah an tâwk a ni. Mahse, tûn hnai kumahte khân chu lal thuneihna hnuaia awm Pathian mite rinawmna chu kawng danga fiahin a awm a. Entîr nân, inthlanpui hun chhûngin Kristiante chuan politics party pakhat emaw, an candidate emaw chu thlâwp duhna kan nei thei a. Vote thlâk lo mah ila, chutiang hunah chuan rilruah ṭan lam kan nei palh thei a ni. Chuvângin, kan thiltih mai bâkah, kan ngaihtuahna thlenga tualdawihna vawn tlat chu a va pawimawh tak êm!—Joh. 15:18, 19. w23.08 12 ¶17

Nun intlânsiaknaa kan tlân hian ‘lâwmman kan hmuh theih nân kan tlân’ tûr a ni. (1 Kor. 9:24) Isua chuan “ei puar lutuk nên, zu ruih nên, dam chhûng khawsak ngaihtuah nên, [kan] rilru a khat lutuk” thei tih a sawi a. (Lk. 21:34) Hêngte leh Bible châng dangte’n nun intlânsiaknaa i mamawh inthlâk danglamnate hre thiam tûrin a ṭanpui thei che a ni. Pathian Jehova’n kan mamawh chakna min pêk dâwn avângin nun intlânsiaknaah lâwmman kan hmu ang tih kan chiang thei a. (Is. 40:29-31) Chuvângin, muangchâng suh! A hmaa lâwmman awm hmu tûra theih tâwp chhuaha tlân tirhkoh Paula chu entawn ang che. (Phil. 3:13, 14) He intlânsiaknaah hian tu mahin an tlânsak thei lo che a; mahse, Jehova ṭanpuinain i hlawhtling thei a ni. Ani chuan i phurte phur tûr leh thil ṭûl lote dah tûrin a ṭanpui thei che a. Nun intlânsiaknaah Jehova i lama a ṭan chuan, lâwmman hmu tûrin chhel takin i tlân thei ang! w23.08 31 ¶16-17

Isua kum 12 mi a nih laiin a nu leh pate chuan Jerusalem aṭangin an hawsan a. (Lk. 2:46-52) Kût an hman zawha, an hawpuite zînga an fate an tel kim leh kim loh hriat chu Josefa leh Mari te mawhphurhna a ni. A tâwpa Isua an zawn hmuh hnu chuan a tih mangang êm avângin Mari chuan a hau va! Isua chuan an dik lohna chu sawi langin a chhâng lêt thei a. Chu aiin, zah thiam takin a chhâng lêt zâwk a ni. Mahse, Josefa leh Mari chuan, “an hnêna a thusawi chu a ngaihna an hre lo va.” Chuti chung chuan, Isua chu “an thu zâwmin a awm” a ni. Ṭhalaite u, in nu leh pate’n thil an tihsual hunah emaw, an hriatthiam loh che u hunah emaw an thuâwih chu harsa in ti em? Engin nge ṭanpui thei che u? Jehova ngaih dân tûr chu ngaihtuah rawh u. Bible chuan in nu leh pate thu in awih hian, “chu chu Lalpaah chuan a lâwmawm si a,” tiin a sawi a ni. (Kol. 3:20) Jehova chuan in nu leh pate’n an hre thiam vek lo che u, tih leh dân khirh takte zam châng an nei ṭhîn tih a hria a. Chuti chung pawha an thu in awih tih a hmuh hian a lâwm a ni. w23.10 7 ¶5-6

I school kalpui chuan Jehova Thuhretute chu neih inang kawp chîngte chunga an thlîr dân an thlâk danglam tûr a ni tiin a sawi thei a. Mi zawng zawng kan ngaihsakin, mi tin hian mi mal duh thlan theihna an nei tih kan hriat thu zahthiam takin kan hrilh thei a. (1 Pet. 2:17) Tichuan, nungchang lama Bible tehna sâng takte kan hlâwkpui theih dân kan hrilh thei a ni. Ngaih dân nghet tak nei tu emaw kan hmachhawn hunah, a rin dân chungchângah mahniin ngaih dân kan siam nghâl mai tûr a ni lo. Entîr nân i school kalpuiin, Pathian awm rin chu thil âtthlâk tak nia a sawi chuan engtin nge ni ang? Ani chu chanchhâwnnaa rinna nghet tak neitu leh chumi chungchâng hre tak niin i ngai nghâl tûr a ni em? Dik tak chuan chumi chungchâng mi dangte sawi a hriat chu a sawi chhuak mai pawh a ni thei. Kan website jw.org-a thilsiam chungchâng pho chhuahte chu i kawhhmuh thei a. A hnuah chuta thuziak emaw, video emaw a hmuhte chu sawipui a duh thei a ni. Ni e, zahthiam taka i chhân lêtna chuan a thlîr dânte ngaihtuah nawn tûrin a chêttîr thei a ni. w23.09 17 ¶12-13

Thil kan tisual a nih pawhin, kan kawngte siam ṭha tûra theih tâwp chhuah a, Jehova kan rinchhan zawm zêl chuan ani chuan min hmangin, mal min sâwm ang tih kan ring tlat thei a ni. (Thuf. 28:13) Samsona chu mi ṭha famkim a ni lo; mahse, Delili avângin thil a tihsual hnuah pawh Jehova rawngbâwl tûra theih tâwp a chhuahna chu a bânsan lo. Chu bâkah, Jehova pawh a chungah a beidawng lo a ni. Pathianin Samsona chu thil ropui tak ti tûrin a hmang leh a. Jehova chuan ani chu Hebrai bung 11-naa mi rinawmte zîngah telhin, rinna kawnga mi langsâr tak angin a la thlîr reng a ni. A bîk takin, kan chak loh laia, min tichak tûra min ṭanpui duhtu hmangaihna ngah tak kan Pa vâna mi rawng kan bâwl tih hriat chu a va phûrawm tak êm! Chuvângin, Samsona ang bawkin, Jehova hnênah: “Khawngaih takin, mi han hre reng langin, mi han tichak la,” tiin i ngên ang u.—Ro. 16:28. w23.09 7 ¶18-19

Jehova nî kan beisei tlatna chuan mi dangte hnêna chanchin ṭha hril tûrin min chêttir a. Mahse, dinhmun ṭhenkhatah chuan hlauh châng kan nei mai thei. Engvângin nge? Mihring hlauhna kan neih vâng a ni. Chutiang chu Petera pawhin a tawng a ni. Isua chung thu an rêl zânah Petera chuan Isua zirtîr a nih thu a sawi duh lo va. (Mt. 26:69-75) A hnûah, Petera vêk chuan: “An hlauhawmna chu hlau suh ula, mangang hek suh u,” tiin rinnghehna nên a sawi a ni. (1 Pet. 3:14) Petera thute chuan mihring hlauhna chu kan hneh thei tih min hriat chiantîr a ni. Mihring hlauhna hneh tûrin engin nge min ṭanpui thei? Petera chuan: “In thinlungah Krista chu Lalah ruat rawh u,” tiin min hrilh a. (1 Pet. 3:15) Chutah chuan kan Lal, Krista Isua nihna leh thiltihtheihna chhût ngunna a tel a ni. w23.09 27-28 ¶6-8

Keini pawh ‘thim thiltih rah nei ngai lote’ chu kan do zawm zêl a ngai a. (Eph. 5:11) Miin nungchang bawlhhlawhna lam hawi thil thianghlim lote a en a, a ngaihthlâk a, a sawi fo chuan awlsam takin sualah a tlu lût ṭhîn tih thiltawnte chuan a târ lang a ni. (Gen. 3:6; Jak. 1:14, 15) Setana khawvêl chuan Jehova ngaiha thil dik lo leh thianghlim lote chu sual lo nia rintîr min tum a. (2 Pet. 2:19) Chu chu mak kan ti tûr a ni lo! Tûn hma aṭanga Setana hmanraw pakhat chu thil dik leh dik lo thliar hrang thei lo tûra mite bum hi a ni. (Is. 5:20; 2 Kor. 4:4) Chuvângin, film te, T.V show te leh, website tam tak hmanga Jehova tehna felte kalh zâwng ngaih dân tam tak theh lâr a ni chu thil mak a ni lo! Chu bâkah, Setana chuan thil chîn ṭha lo leh nun kawng bawlhhlawh takte chu pawm theih a nih mai bâkah, hlauhawm lo leh nuam tak anga thlîr tûrin min bum a tum a ni.—Eph. 5:6. w24.03 22 ¶8-10

Biak bûk chu tûn hmaa Israel mite’n an insawnna apianga an ken tel ṭhin puan in a ni. Anni chuan chu puan in chu Jerusalema biak in sak a nih hma kum 500 dâwn lai an hmang a. (Ex. 25:8, 9; Num. 9:22) Chu “inbiakna puan in” chu Israel mite tân Pathian an hnaihna hmun leh inthawina an hlanna leh an biakna hmun a ni a. (Ex. 29:43-46) Mahse, chu biak bûk chuan Kristiante tâna lo awm tûr thil ropui zâwk a entîr a ni. Chu chu ‘vân thilte hlimthla’ a ni a, chu chuan Jehova thlarau lam biak in ropui tak a entîr a ni. Tirhkoh Paula chuan, “chu (puan in) chu tûn lai tehkhinna hi a ni,” tiin a sawi a. (Heb. 9:9) Chuvângin, Hebrai Kristiante hnêna lehkhathawn a ziah lai khân, Kristiante tâna thlarau lam biak in chu din a ni tawh a. Chu biak in chu C.E. 29-a din a ni. Chumi kum chuan, Isua baptisma changin, thlarau thianghlima hriak thih a ni a, chuta ṭang chuan thlarau lam biak inah “Puithiam Lalber ropui tak” niin Jehova rawng a bâwl ṭan a ni.—Heb. 4:14; Tirh. 10:37, 38. w23.10 25-26 ¶6-7

Thlarau lama ṭhang duang tûr chuan Kristiante’n thingkûng anga kûr âwn theihna, a nih loh leh insiamrem theihna an neih a ngai a ni. Engtin nge chu mizia chu kan neih theih? Kan dinhmun a inthlâk danglam hunah insiamremin leh mi dangte thil thlîr dân leh thu tlûkna siamte zahsakin a âwm tâwk kan hriatzia kan lantîr tûr a ni. Jehova chhiahhlawhte kan nih angin a âwm tâwk hriat kan duh a. Inngaitlâwm tak leh mi dangte khawngaih thei tak nih kan duh bawk. Jehova chu tihchêt rual lohva nghet a nih avângin “Lungpuia” tiha koh a ni a. (Deut. 32:4) Chutih rualin, a âwm tâwk a hre bawk. Hun a liam zêl rualin, kan Pathian chu a thiltum a tihhlawhtlin theih nân a insiamrem zêl a. Ama anpuiin mihringte pawh dinhmun inthlâk danglam azira insiamrem thei tûrin a siam a ni. Jehova chuan eng ang fiahna hnuaiah pawh thu tlûkna fingte siam tûra min ṭanpui tûrin Bible thu bul chiang tak min pe a. A entawn tûr siam leh thu bul min pêkte chuan “Lungpuia” a nih rualin, a âwm tâwk a hriatzia a finfiah a ni. w23.07 20 ¶1-3

Jehova chuan Bible-ah hmangaihna ngah tak nu nên a intehkhin a ni. (Is. 66:12, 13) Duat taka a fa enkawltu nu pakhat chu han mitthla teh. Keini pawhin kan mangan hunah Jehova hmangaihna chu kan rinchhan thei a. Thil tihsual engemaw kan neih hian kan chungah a beidawng mai lo. (Sâm 103:8) Israel mite chuan Jehova chu vawi tam tak an tilungni lo va; mahse, ani chuan: “Ka ngaiha hlu tak in niha, mi zahawm tak in nih bawka, ka hmangaih bawk che u,” tih thute hmangin a mi inlamlêtte chunga a hmangaihna dai ngai lo chu a lantîr a ni. (Is. 43:4, 5) Pathian hmangaihna chu a danglam ngai lo. Chu chu kan rinchhan thei reng a ni. Thil sual lian tak kan tih hunah pawh Jehova chuan min kalsan lo va. Inchhîra a lama kan kîr chuan, min la hmangaih reng tih kan hria ang. Ani chuan min “ngaidam nasa khawp dâwn” tih min tiam a. (Is. 55:7) Bible chuan chu a ngaihdamnain “Lalpa hnên ata harh hunte” a thlen tih a târ lang a ni.—Tirh. 3:19. w24.01 27 ¶4-5

Dinhmun harsa tak kan tawh hunah Jehova’n min ṭanpui thei a. Entîr nân, kan hnathawhna pu hnêna inkhâwmpuia kan tel theih nâna chawlh kan dîl hunah emaw, kohhran inkhâwmtea kan tel theih nâna hnathawh hunduan siamrem kan dîl hunah emaw hian kan nuna Jehova ṭanpuina hmu tûrin hun remchâng kan insiam a ni. Kan beisei aia ṭhain dinhmunte chu a lo inher chhuak thei a. Chutiang hunah chuan, Jehova chunga kan rinna chu a nghet lehzual a ni. Ezra chu Jehova hnênah inngaitlâwm takin a ṭawngṭai ṭhîn a. (Ezr. 8:21-23; 9:3-5) A rilru put hmang chuan mi dangte chu amah ṭanpui tûr leh a rinna entawn tûrin a chêttîr a ni. (Ezr. 10:1-4) Kan tisa lam mamawhte leh kan chhûngkaw himna atâna lungkhamna kan neih hunah, Jehova chungah rinna nghet tak neiin kan ṭawngṭai tûr a ni. w23.11 18 ¶15-17

Jehova chuan mi fel nia ruat kan duh chuan Abrahama tih ang chiah kan ti tûr a ni tiin a sawi lo. Dik tak chuan, rinna chu thiltiha lantîr theih dân kawng tam tak a awm a ni. Kohhranah mi tharte kan lâwm theiin, ṭanpui ngai unaute kan ṭanpui theih bâkah, kan chhûngte chunga ngaihsakna kan lantîr chuan Pathian kan tilâwmin, malsâwm kan ni ang. (Rom 15:7; 1 Tim. 5:4, 8; 1 Joh. 3:18) Kan rinna chu thiltiha kan lantîr theih dân kawng pawimawh tak pakhat chu ṭhahnemngai taka mi dangte hnêna chanchin ṭha hrilh hi a ni a. (1 Tim. 4:16) Kan vai hian Jehova thutiamte chu a lo thleng ngei ang tih leh a kawngte chu a ṭha ber tih kan rinzia thiltihin kan lantîr ṭheuh thei a. Chutianga kan tih chuan Pathianin mi fel ang leh a ṭhian angin min thlîr ang tih kan chiang thei a ni. w23.12 2 ¶3; 6 ¶15

A thih dâwn hnaihah, Lal Davida chuan Solomona vawiin ni châng thu hian a fuih a. (1 Lal. 2:1, 3) He fuihna thu hi tûn laia Kristian unaupa zawng zawngte’n an nunpui tûr a ni. Chutianga nunpui thei tûr chuan an nun kawng hrang hrangah Pathian dân zâwm tûr leh Bible thu bulte nunpui tûra an zir a ngai a. (Lk. 2:52) Engvângin nge ṭhalai unaupate tân Kristian mi puitling nih chu thil pawimawh tak a nih? Kristian unaupate chuan chhûngkuaah leh kohhranah mawhphurhna pawimawh takte an nei a. Ṭhalai unaupate u, nakina in la dawn tûr mawhphurhnate chungchâng chu in ngaihtuah tawh ngei ang. Hunbi kima rawngbâwl te, kohhrana rawngbâwltu, leh kohhran upa nihte in tum thei a ni. Nupui fanau neih in duh pawh a ni thei bawk. (Eph. 6:4; 1 Tim. 3:1) Hêng thiltumte tihlawhtling tûr chuan Kristian mi puitling in nih a ngai a ni. w23.12 24 ¶1-2

Kristian upate chu Jehova berâm hlu takte enkawl tûra mawhphurhna pêk an ni a. Hêng mi inpe takte hian an unaute rawngbâwlsak tûra an chanvo chu an ngaihlu hle a; chu bâkah, “anmahni ngaihsak tûr . . . berâmpu” ni tûrin theih tâwp an chhuah bawk. (Jer. 23:4; 1 Pet. 5:2) Kan kohhranah chutiang upate kan nei chu kan va lâwm tak êm! Upate chu Rorêltu Gideona hnên aṭangin an inzir thei a. (Heb. 6:12) Ani chu Pathian mite vênghimtu leh kaihruaitu a ni. (Ro. 2:16; 1 Chro. 17:6) Gideona angin upate chu hun khirh tak chhûnga Pathian mite ngaihsak tûra ruat an ni a. (Tirh. 20:28; 2 Tim. 3:1) Keini pawh Gideona thuhnuairawlhna, inngaihtlâwmna, leh thuawihna aṭangin kan inzir thei a ni. A mawhphurhnate a hlen rualin a chhelna chu fiah a ni a. Upa kan ni emaw, ni lo emaw kan kohhran upate kan ngaihhlutna chu kan tipung thei a. Kohhrana min ngaihsaktu hêng unaupa thawkrim takte hi kan ṭanpui thei a ni.—Heb. 13:17. w23.06 2 ¶1; 3 ¶3