‘Kohhran Dik’ Pakhat Chauh A Awm Em?

“KRISTA pakhat chauh a awm angin, Krista pâwl pakhat, Krista Mo pakhat chauh a awm: ‘Katholic pakhat leh tirhkohte Kohhran pakhat chauh chu.’”​—Dominus Iesus.

Hei hi kohhran dik pakhat chauh a awm theih chungchânga a kohhran vawn lai zirtîrna Roman Katholic puithiam, Joseph Ratzinger sawichhuah dân a ni. Chu kohhran chu, a sawi dân chuan “Krista Kohhran, Katholic Kohhran” hi a ni.

“Kohhran Tling Lo”

Pope John Paul II-na chuan, Dominus Iesus lehkhaah hian “kohhran dang zah lohna, a nih loh leh en hniamna a chuang lo” ti mah se, Protestant kohhran hruaitute chuan an duh lo hle a. Entîr nân, June 2001-a neih Ireland Chhak Lam, Belfast khawpuia Presbyterian General Assembly-ah chuan, rawngbâwltu pakhat chuan chu lehkha chu “Vatican II-na tihchhuah inlâk hran lohna pawhin a dan zawh loh . . . Roman Katholic kal pêng thiltithei takte” kut chhuak a nih thu a sawi.

The Church of Ireland kohhran Hotu lian pakhat, Robin Eames chuan, chu lehkha chu “Vatican II-na hun hma lama kîrlehna” a nih chuan, a “lungchhe hle” dâwn tih a sawi a. Katholic thurin eng engemawte hnâwltu kohhran chu “kohhran tling lo” anga Vatican inchhâlna chungchâng sawiin, Eames chuan: “Chu zawng inhmuhsitnaah ka ngai ang,” a ti.

Engin nge Dominus Iesus awmtîr le? Roman Katholic Rorêl Khâwl chu sakhaw ngaihsamna (religious relativism) chuan a tibuai hle niin a lang. The Irish Times chanchinbuin a sawi dânin, “pluralist theology​—sakhua zawng zawng ṭha vek anga ngaih dân lo chhuak chuan . . . Cardinal Ratzinger chu a tibuai tawlh tawlh a ni.” Chu sakhaw ngaihsamna thlîr dân chuan kohhran dik pakhat chauh a awm theih chungchâng chu a sawi chhuahtîr ni berin a lang.

I Lawina Kohhran Chu A Pawimawh Em?

Mi ṭhenkhat tân chuan “sakhaw ngaihsamna” emaw, “sakhua zawng zawng ṭha vek anga ngaihna” emaw chu, kohhran dik pakhat chauh awm thei tih ngaih dân petu engpawh aiin a ṭha zâwkin a duhawm zâwk ngei mai. Anni chuan sakhua chu mi mal duhthlanna liau liau ni tûrah an ngai a. ‘A tâwp a tâwpah chuan i lâwina kohhran chu a pawimawh lo’ an ti ṭhîn.

Chu chu thlîr dân zau tak niin a lang mai thei​—a rah chhuah pakhat chu sakhaw tam taka keh chhiatna ni mah se. Mi tam tak chuan ‘Chutianga sakhaw chi hrang hrang a awm chu, mi mal zalênna târ lanna mai a ni,’ an ti. Mahse, ziaktu Steve Bruce ngaih dân chuan, chutiang “sakhaw indawhtheihna” chu “sakhaw ngaihsak lohna” bâk a ni lo thung.​—A House Divided: Protestantism, Schism, and Secularization.

Eng hi nge thlîr dân dik chu ni ta ang? Kohhran dik pakhat chauh a awm em? Chu kohhran dik chu Roman Katholic Kohhran hi a ni em? Kohhran dangte pawh Pathian tân pawm tlâk vek a ni em? Hêng zawhnaahte hian min Siamtu nêna kan inlaichînna a tel avângin, a ngaih dân lâk chu a pawimawh hle a ni. Engtin nge kan lâk theih ang? Pathian thâwk khum a Thu, Bible bih chiangin kan la thei a ni. (Tirhkohte 17:11; 2 Timothea 3:​16, 17) Bible-in kohhran dik pakhat chungchâng a sawi chu i lo en ang u. (w03 9/1)