Fel Hlelhna Khawvêl

KHAWVEL fel hlel takah kan awm tih i pawm em? I pawm ang tih chu rinhlelh rual a ni lo. Dik takin, thiamna engpawh neiin, kan nun fing takin ruahman mah ila, hausakna emaw, hlawhtlinna emaw, a nih loh leh ei tûr tak ngial emaw pawh kan nei ngei ang tih sawi theih a ni chuang si lo. Hmân lai Lal fing, Solomona’n: “Mi fingin ei tûr a hmu bîk lo va, mi nîkhaw hria an hausa chuang hek lo va, mi themthiamin duhsak an hlawh chuang hek lo,” a tih ang hi a thleng fo a ni. Engvângin nge? Solomona chuan, “mi zawng zawng chungah hun leh khawrêl ang angin a thleng” tiin, a chhan a sawi zawm a ni.​—Thuhriltu 9:11.

‘Hun Ṭha Lo A Lo Thlen Phutin’

Ni e, “hun leh khawrêl”​—a hun lo leh a hmun lova awm palhna tihna ni ṭhîn—​chuan fîmkhur taka kan thil ruahmante leh kan beiseina duhawm takte chu a tisukuk ṭhîn. Solomona sawi angin, “sangha, lên hlauhawma man leh sava, thanga âwk ang” kan ni a, ‘hun ṭha lo chu kan chungah a lo thleng phut ṭhîn’ a ni. (Thuhriltu 9:12) Entîr nân, mi maktaduai têlte chuan an chhûngkaw châwm nân lei letin an thawk rim hle a, mahse ruah a sûr loh chuan khawkhêngin an thlaite chu tichhiain, “hun ṭha lovah” an awm thut a ni.

Mi dangte chuan ṭanpui an tum a; mahse, khawvêl mihring zawng zawngin ‘hun ṭha lo’ tuartute ṭanpui an tumna ngei pawh hi a fel hlel ṭhîn. Entîr nân, ṭâm dona kawnga chhawmdâwltu pâwl challang tak pakhat sawi dân chuan tûn hnai mai khân, “[Africa] khawmual pum pui chuan Gulf war atâna sum sên hmun ngaa ṭhen hmun khat ang chauh chu ṭanpuina atân an dawng a ni.” Ram pakhata indo nâna khawmual puma ṭâm tuar avânga natna leh hrehawm tawrhna chhâwkzângkhai nâna hman zât a lêt nga lai han hman chu thil fel a ni em? Mi tam takte an hausak hle laia, leia chêng hmun lia ṭhena hmun khatte rethei tak zeta an nun leh kum tin naupang maktaduai telte dan theih natna avânga an thi chu thil fel a ni em? A ni hauh lo!

Dik takin, ‘hun ṭha lo lo thleng phutte’ chu “hun leh khawrêl” vâng mai a ni lo. Kan thunun phâk hauh loh chakna thiltithei tak chuan kan nun a awpbetin, kan chunga thil thleng tûrah thu a nei bawk a ni. Chu chu kum 2004 favâng lai, Beslan, Alania rama mi fîrfiakho leh sipaite indona râpthlâk taka mi za têl thi, a tam zâwk naupang an school kal hmasak ber nîa thite tân a dik chiang hle. Chu chhiatnaa thi leh dam khawchhuak chu khawrêl ang ang a ni teh meuh mai​—mahse, chung ‘hun ṭha lo’ thlentîrtu bul ber chu mihringte indona hi a ni.

Hetiang Hi A Ni Reng Ang Em?

Fel hlelhna chungchâng sawi a nihin, ṭhenkhat chuan: “Mahse, hei hi nun awm dân a ni mai. Hetiang hi a ni reng ṭhîn a, a la ni zêl bawk ang,” an ti a. An ngaih dân chuan, mi chakin chak lote a awpbet reng angin, mi hausain retheite a chhawr khaw lo reng dâwn a ni. An sawi dân chuan chu mi leh “hun leh khawrêl” inkawp chuan mihringte awm chhûng zawng min nghawng reng dâwn a ni.

Chutiang a nih kher chu a ṭûl em? Thiam tak leh fing taka an theihna hmangtute tân, an thawhrimna zawng zawng chunga lâwmman fel tak dawn theih a ni ngai ang em? Fel hlelhna khawvêl thlâkthleng hlenna thlentîr thei tûr tuemaw an awm em? Chu mi chungchânga a dawta thuziakin sawi tûr a neih chu ngaihtuah ang che. (w05 11/1)

[Phêk 2-naa Thlalâk Hawhtîrtu]

A KAWM: Putar leh naupang: UN PHOTO 148426/McCurry/Stockbower