Siamtu Hnên Aṭanga Chatuan Daih Thilpêk Chu
SCIENTIST-TE’NA khawi hmunah pawh nise nun nâna thil pawimawh nia an hriatte chu Bible bung hmasa berah hian fiah taka a nih loh leh pehhêl deuh hleka târlan a ni hi mak i ti em? Chûngte chu eng nge ni?
Nunna ṭha taka ṭhang chho tûr chuan, Genesis 1:2-a târ lan angin tui tam tâwk a awm tûr a ni. Khawvêla tuite hi tuirila a awm reng theihna tûrin sik leh sa inchawih tâwk chiah a ngai a. Chu mi atân chuan khawvêl hi nî aṭanga a hlatzâwng âwm tâwk chiaha a awm a ngai bawk. Genesis thuziak chuan nî leh nîin leilung a nghawng dân chu a sawi lang nawn fo a ni.
Mihringte awm theih nân, leilung hian boruak inpawlh tâwk chiah a mamawh a. He thil pawimawh tak hi Genesis 1:6-8 hian a târ lang a ni. Genesis 1:11, 12-a târ lan thlai ṭote chuan oxygen tam tak a awmtîr a. Leilunga rannung chi hrang hrangte nun theih nân Genesis 1:9-12 târ lan angin khawmual, leilung chu a awm a ngai a ni. A tâwp berah, sik leh sa inchawih tâwk tûr chuan leilung chu a âwm tâwk chiaha a âwn a ngai a, chutianga a awm reng chu a ngai a ni—leilung tân chuan a ṭhen a zâr chu thla hîpna hmanga tihpuitlin a ni. He thla lo pian chhuah dân leh a ṭangkaina ṭhenkhat chu Genesis 1:14, 16 hian a târ lang bawk.
Engtin nge hmân laia lehkha ziaktu Mosia chuan, tûn lai science thiamna tel lovin a chunga thilte khi min hrilh theih? Mosia’n chûng thilte pawimawhna chu a dam rualpuite aia a bengvâr zâwk avângin a hre mai mai em ni? A chhânna chu lei leh vân Siamtuin a thlarauva a thâwk khum vâng tih hi a ni. Science lama Genesis thuziak dikzia ngaihtuahin chu chu thil chhinchhiah tlâk tak a ni.
Bible chuan kan chhehvêl lei leh vâna kan hmuh thil mak ropui takte hian siam chhan a nei tih a nemnghet a. “Vânte khi LALPA vânte a ni a, leilung erawh hi chu mihring fate a pe a ni,” tiin Sâm 115:16 chuan a sawi. Fakna hla dang chuan: “Leilung nghahchhante chu a phûm a, kumkhuaa a nghîn loh nân,” a ti bawk. (Sâm 104:5) Vânlâwt leh kan leilung mawi tak hi Siamtuin a duan leh a siam a nih chuan, a vawng ṭha thei bawk a ni tih rin chu a âwm hle. A awmzia chu thutiam ropui tak: “Mi felte chuan ram hi an luah ang a, a chhûngah hian kumkhuain an awm ang,” tih hi i ring tlat thei tihna a ni. (Sâm 37:29) Pathian chuan “leilung hi . . . engmah lovah a siam lo,” a thiltihte hriaa hluttu mihringte chatuana “awm nân a din zâwk a ni.”—Isaia 45:18.
Pathian Lehkha Thu sawi dânin, Isua chu Pathian leh a thiltumte min zirtîr tûr leh thuâwih mihringte chatuan nunna pe tûrin leiah a lo kal a. (Johana 3:16) Rei lo têah, Pathianin ‘lei tichhetute chu a tichhe ve thung’ ang a, a chhandamna pêk pawmtu hnam tina mi remna ngainatute chu an dam khawchhuak ve thung ang tih chu kan ring tlat a ni. (Thu Puan 7:9, 14; 11:18) Mihringte’n Pathian thil siam mak takte chu chatuana an hmuhchhuah belh zêl leh an hlimpui zêl chuan nun chu a va nuam dâwn êm!—Thuhriltu 3:11; Rom 8:21. (w07 2/15)
[Phêk 8-naa Milem Hawhtîrtu]
NASA photo