Thil Ṭha Lo Chungchânga Pathian Thiltih Tûr Chu

Bible chuan Jehova leh a Fapa, Isua Krista’n Diabol-Setana awmtîr hrehawm tawrhna chungchânga an tih tûr chiang takin min hrilh a. “Pathian Fapa lo lan chhan ber chu diabola hnathawhte a tihboral theih nân a ni,” tiin Bible chuan a sawi chhuak a ni. (1 Johana 3:8) He khawvêl hi duhâmna leh huatnain a khat a, thiltih suaksualte chu tihboral a la ni ang. Isua chuan “khawvêl lal” Diabol-Setana chu “paih chhuah a ni ang” tih a tiam a. (Johana 12:31) Setana thununna tel lovin, felna khawvêl thar chu din a ni ang a, he lei hi hmun thlamuang tak a la ni ang.—2 Petera 3:13.

Luhlul taka an kawng zawh thlâk duh lotute leh thil ṭha lo tilui tlattute chungchâng chu eng nge ni ve? He thutiam tlang tak: “Mi tluangte chu leilungah hian an chêng ang a, ṭha famkimte chu chutah chuan an awm reng a; mi suaksualte erawh chu leilung ata tihboral an ni ang a, vervêk taka titute chu tihboral phiar an ni ang,” tih hi ngaihtuah rawh. (Thufingte 2:21, 22) Mi suaksualte thununna chu a bo tawh ang a. Chutiang dinhmun thlamuanthlâk takah chuan thuâwih mihringte chu an rochun ṭhat famkim lohna laka zawi zawia tihzalên an ni ang.—Rom 6:17, 18; 8:21.

Engtin nge Pathianin khawvêl tharah thil ṭha lote chu a tihboral ang? Zalên taka duh thlan theihna chu engmah lova chantîrna leh mihringte chu robot ang maia thil tihtîrna hmangin a ni lo vang. Chu ai mah chuan thuâwih miringte chu zirtîrin, ngaihtuahna ṭha lo leh thiltih ṭha lote aṭanga inlamlêt tûrin a ṭanpui zâwk ang.

Hriat lâwk loh chhiatnate chungchângah Pathianin eng nge a tih dâwn? Nakin lawkah a Lalram sawrkârin lei hi a thunun dâwn tih a tiam a ni. Pathianin chu Lalram atâna Lala a ruat chu dam lote tidam tûra thiltih theihna neitu, Isua Krista a ni a. (Matthaia 14:14) Leilung chaknate thunun theihna a nei bawk a ni. (Marka 4:35-41) Chuvângin, “hun leh beisei loh thilte” avânga awm hrehawm tawrhna chu a bo tawh ang. (Thuhriltu 9:11, NW) Krista rorêlna hnuaiah chuan, mihringte chungah thil ṭha lo a thleng tawh lo vang.—Thufingte 1:33.

Hrehawmna râpthlâk tak tawrh avânga thi ta, pawisawi lo mi maktaduai têlte chungchâng hi eng nge ni ve? Isua chuan a ṭhian Lazara a kaihthawh leh hma lawk khân: “Kei hi thawhlehna leh nunna chu ka ni,” tiin a sawi a. (Johana 11:25) Ni e, Isua chuan thi tawhte kaitho leh tûrin thiltih theihna a nei si a!

Mi ṭhate chunga thil ṭha lo a thlen tawh lohna tûr khawvêla nun chu i châk a nih chuan, engvângin nge Bible zirin Pathian dik leh a thiltum chu hriat tam lehzual i tum loh vang? In vêngchhûnga Jehova Thuhretute chuan chutiang hriatna nei tûra ṭanpui che chu an châk hle a ni. Tualchhûnga anmahni be pawp tûrin, a nih loh leh he magazine chhuahtute hnêna lehkha thawn tûrin lâwm takin kan sâwm a che. (w14-E 07/01)