Mi Ṭhate Chungah Thil Ṭha Lo A Thleng Ṭhîn Engvângin Nge?

Pathian Jehovaa chu thil engkim Siamtu leh engkimtithei a nih avângin, mi tam tak chuan thil ṭha lote pawh tiamin, khawvêla thil thleng zawng zawngah mawhpuh an duh mai thei a ni. Mahse, Pathian dik chungchânga Bible sawi chu ngaihtuah rawh.

• ‘LALPA chu a awm dân zawng zawngah a fel.’—Sâm 145:17.

• “[Pathian] awm dân zawng zawng chu dân a ni: Pathian rinawm, khawlohna nei lo, fel leh ṭha a ni.”—Deuteronomy 32:4.

• “Lalpa chu khawngaihnain a khahzia leh zah a ngaih theihzia pawh kha.”—Jakoba 5:11.

Pathian chuan thil ṭha lo a thlentîr lo. Mahse, mite chu thil suaksual takte ti tûrin a fuih em? Fuih lo. Bible chuan, “Tuman thlêmna an tawh laiin, ‘Pathian thlêm ka ni,’ ti suh se,” a ti a ni. Engvângin nge? “Pathian chu sual thlêm rual a ni lo, amah pawhin tumah a thlêm ngai lo.” (Jakoba 1:13) Ani chuan awm dân ṭha lo taka awm tûrin mi tumah a thlêm lo va, a fuih bawk hek lo. Thil ṭha lote a thlentîr lo va, mi dangte chu thil ṭha lo ti tûrin a fuih lo bawk. A nih chuan, thil ṭha lo a thlenin tu nge, a nih loh leh eng nge kan mawhpuh ang?

A HUN LO LEH A HMUN LOVA AWMIN

Mihringte hrehawm tawrh chhan pakhat sawiin, Bible chuan: “Mi zawng zawng chungah hun leh beisei loh thilte a thleng ṭhîn,” tiin a sawi a. (Thuhriltu 9:11, New World Translation) Beisei loh thil emaw, chêtsualna emaw a thlenin tuemawin a tuar leh tuar loh chu, chu thil a thlen laia a awmna hmunah a innghat thui hle a ni. Kum 2,000 dâwn lai kal ta khân Isua Krista chuan insâng chimin mi 18 a delhhlum avânga chhiatna thleng chungchâng chu a sawi a. (Luka 13:1-5) An nun an hman dân avâng ni lovin, insâng a chim laia a hnuaia an awm palh vâng maia tuar an ni. Tûn hnai mai, kum 2010 January thlaa Haiti rama lîr nasa tak a nghîn khân mi 300,000 chuangin nun an chân tih Haiti sawrkâr chuan a sawi a. Chûng mite chu eng ang mi pawh ni se, an thi vek a. Natna pawh hian engtik lai pawhin mi tinte chu a tlâk buak thei vek a ni.

Ṭhenkhat chuan: ‘Pathianin chutiang chhiatna râpthlâk tak chu thleng lo tûrin a dang thei lo em ni? Mi ṭhate chu chhiatna lakah a hum thei lo em ni?’ tiin an zâwt mai thei a. Chutianga Pathian inrawlh tûr chuan, thil ṭha lo thlengte chu a thlen hmain a hria tihna a ni dâwn a. Pathian chuan hma lam hun tûr hriat theihna a neih rualin, zawhna kan ngaihtuah tûr chu hei hi a ni: Pathian chuan chutianga thil a hriat lâwk theihna chu tâwp chin nei lovin a hmang em?—Isaia 42:9.

Bible chuan: “Pathian chu vânah a awm si a: A duh apiang a ti a ni,” tiin a sawi. (Sâm 115:3) Jehova chuan a thiltih theih apiang ni lovin, ṭûl nia a ngaihte chauh a ti a ni. Thil hmuh lâwk a tum chungchângah pawh chutiang tho chu a ni. Entîr nân, hmân laia Sodom leh Gomorra khawpuia suahsualna a hluar hle khân, Pathian chuan thlahtu Abrahama hnênah: “Ka zuk kal ang a, an au thâwm ka hnêna lo thleng ang ngei hian an ti nge ti lo ka en ang a; an tih loh chuan ka hre mai ang,” tiin a hrilh a. (Genesis 18:20, 21) Jehova chuan chûng khawpuia suahsualna chungchâng chu hun engemaw chhûng atân hriat vek loh a thlang a ni. Chutiang a nih chuan, thil engkim hriat lâwk loh a thlang thei tih a chiang hle. (Genesis 22:12) Chu chu eng kawng mahin ama lama ṭhat famkim lohna emaw, chak lohna emaw târ langtu a ni lo. “A thiltih a fel famkim” avângin, Pathian chuan hma lam hun a hriat theihna chu a thiltum nên a inbûk tâwktîr a, mihringte chu kawng engemaw zawh tûrin a tilui ngai lo.b (Deuteronomy 32:4) A nih chuan, eng thutâwp nge kan siam ang? Pathian chuan a hriat lâwk theihna chu a duhnaah chauh a hmang ṭhîn, tih hi.

MIHRINGTE’N MAWH AN PHUR EM?

Mihringte chuan engemaw chen chu suahsualna mawh an phur a. Bible-in chhiatna thlen thei thiltihte awm chhohtîrtu chungchâng a sawi dân hi chhinchhiah rawh. “Mi tin mahni châknaa hruai bo leh hîpa an awm chuan thlêmna an tâwk a ni zâwk e. Tin, châkna chuan no a pai a, sual a hring ṭhîn a; tin, sual chuan a lo puitlinin thihna a hring ṭhîn.” (Jakoba 1:14, 15) Mite chuan châkna ṭha lo anga thil an tih emaw, châkna suala an tlûk luh emaw hian a rah chhuah ṭha lo chu an tuar ngei ngei dâwn a ni. (Rom 7:21-23) Mihringte chanchinin a târ lan angin, mite chuan thil râpthlâk tak tak an ti a, chu chuan hrehawm tawrhna nasa tak a thlen a ni. Chu bâkah, mi suaksualte chuan mi dangte chu khawlo tûrin an thunun thei a, chutiang chuan sualna chu a awm reng a ni.—Thufingte 1:10-16.

Pathian chuan mite thil ṭha lo tihna laka inrawlhin, a dang tûr a ni em? Mihringte siam an nih dân hi han ngaihtuah teh. Bible chuan Pathianin mihring chu ama anpuia a siam thu a sawi a. Chutiang chuan, mihringte’n Pathian miziate târ lan theihna an nei a ni. (Genesis 1:26) Mihringte chu zalên taka duh thlan theihna pêk an ni a, Pathian hmangaih a, a mithmuha thil ṭha tiin a chunga rinawm chu an thlang thei a ni. (Deuteronomy 30:19, 20) Pathian chuan mite chu kawng engemaw zui luihtîr ta se, zalên taka duh thlan theihna chu engmah lovah a chantîr a ni dâwn lâwm ni? Mihringte chu tih tûr duan sa ang thlap thlapa thil ti, khâwlte ang lek an ni dâwn si a! Kan thiltih leh kan chunga thil thleng engkim chu ruat lâwk, a nih loh leh chan tâwka khawrêl a nih chuan chutiang tho chu a ni ang. Pathian chuan kan kawng zawh tûr chungchângah duh thlan theihna pêkna hmanga min chawimawi avângin kan va lâwm tak êm! Mahse, chu chu mihringte dik lohna leh duh thlanna ṭha lovin a awmtîr chhiatna chuan anni chu a tihrehawm kum khua dâwn tihna a ni lo.

KARMA VANGA HREHAWMNA LO THLENG A NI EM?

Hindu leh Buddhist sakhaw vuantu mi tam tak chuan piannawnna leh Karma an ring a. Karma chu eng nge ni? Karma tih chu miin tûn hma a nun hmasaa a thiltihin tûna a nunah nghawng a nei tih rinna a ni. Chuvângin, Hindu sakhua emaw, Buddhist sakhua emaw vuantute hnênah he magazine kâwma zawhna hi i zawh chuan: “Mi ṭhate chunga thil ṭha lo a thlen chhan chu Karma vâng a ni a. An nun hmasaa an tuh rah chu an seng a ni,” tiin an chhâng ngei ang.

Karma zirtîrna nêna inkûngkaihin, thihna chungchânga Bible sawi dân hriat chu a ṭangkai hle a. Mihringte awm ṭanna Eden huanah khân, Siamtu chuan mipa hmasa ber, Adama hnênah: “Huana thing tinrêng rahte hi i duh duhin i ei thei e; a chhia leh a ṭha hriatna thing rah erawh hi chu i ei tûr a ni lo: i ei chuan i ei nî la lain i thi ngei tûr a ni,” tiin a hrilh a ni. (Genesis 2:16, 17) Adama kha Pathian thu âwihin thil sual ti lo ta se, chatuana nung tûr a ni a. Thihna chu Pathian thupêk zawm loh avânga hremna a ni. Tichuan, nausên an lo pianin, “thihnain mi zawng zawng a fan chhuak ta a ni.” (Rom 5:12) Chutiang chuan “sual man chu thihna a ni” tia sawi theih a ni a. (Rom 6:23) Bible chuan: “Tupawh thi tawh chu sual lakah a chhuak tawh si a,” tiin a hrilhfiah a ni. (Rom 6:7) Kawng danga sawi chuan, mite chuan an thih tawh hnuah an sual man chu an rûl chhun zawm tawh lo.

Tûn laia mi maktaduai tam tak chuan mihringte hrehawm tawrh chhan chu Karma vâng niin an sawi a. Chu zirtîrna ringtute chuan anmahni leh mi dangte hrehawm tawrhna chu an tuar thiam tlângpui ṭhîn. Mahse, chu thurin aṭang chuan thil ṭha lote thleng lo tûra dan ngaihna a awm lo a ni. Chutianga piannawn fona aṭanga zalên theihna awmchhun chu nungchang ṭha leh hriatna engemaw bîk tak neihnaah a innghat nia rin a ni a. Mahse, hêng thurinte hi Bible zirtîrna nên chuan a inmil lo hle.c

A AWMTIRTU BUL BER CHU!

Mahse, suahsualna awmtîrtu bul ber chu mihring an ni lo. A hmaa Pathian vântirhkoh rinawm, ‘thutaka awm ta lo’ Diabol-Setana a ni a, ani chuan khawvêlah hian sualna a thlen a ni. (Johana 8:44) Eden huanah khân helna a awmtîr ṭan a. (Genesis 3:1-5) Isua Krista chuan ani chu “mi sual” leh “khawvêl lal” tiin a ko a ni. (Matthaia 6:13; Johana 14:30) Mi a tam zâwkte chuan Jehova kawng dikte ngaihthah tûra Setana fuihna zâwmin, a hnung an zui a ni. (1 Johana 2:15, 16) Johana thawn khat 5:19 chuan: “Khawvêl pumhlûm hi mi sual thu thuin a awm,” tiin a sawi a. Sualna kawng zawh a, Setana lam ṭang thlarau thilsiam dangte pawh an awm a ni. Setana leh a ramhuaite chuan ‘khawvêl zawng zawng bumin,’ ‘leiah chung pikna’ an thlen tih Bible chuan a târ lang. (Thu Puan 12:9, 12) Chuvângin, suahsualna avânga mawhphurtu ber chu Diabol-Setana a ni.

Mite chunga thil ṭha lo thlenna avângin Pathian chu mawhphurtu a ni lo tih a chiang hle a, anni chu hrehawm a tawrhtîr hêk lo. Chu aimah chuan, a dawta thuziakin a târ lan tûr angin, thil ṭha lote nuaibo a tiam zâwk a ni. (w14-E 07/01)