Bible-in Eng Nge A Sawi?

Diabola chu tu nge ni a, eng nge a nih?

DIABOLA CHU  . . .

• Thlarau thilsiam a ni i ti ang em?

• Mihring chhûngrila awm sual sawina mai a ni i ti ang em?

• Mihringte ngaihruatna mai a ni i ti ang em?

BIBLE SAWI DAN CHUAN

Diabola chuan Isua biain a “thlêm” a. (Matthaia 4:1-4) Chuvângin, Diabola chu ngaihruatna mai emaw, sual chhinchhiahna mai emaw a ni lo. Thlarau thilsiam suaksual tak a ni zâwk a ni.

BIBLE AṬANGIN ENG NGE KAN ZIR BELH THEIH?

• Diabola chu atîrin vântirhkoh thianghlim a ni a; mahse, ‘thutakah a ding nghet lo.’ (Johana 8:44) Dawthei a lo ni a, Pathian lakah a hel a ni.

• Vântirhkoh dangte chuan Setana helna chu an thlâwp.—Thu Puan 12:9.

• Diabola chuan a awm tih hre lo tûrin mi tam takte mit a tihdelsak a ni.—2 Korinth 4:4.

Diabola’n mite a thunun thei em?

ṬHENKHAT CHUAN Diabola thununa awm tih hi inbumna mai nia an ngaih laiin, mi dangte chuan thlarau suaksualin a man ang tih an hlau hle a ni. Nang, eng nge i ngaih ve dân?

BIBLE SAWI DAN CHUAN

“Khawvêl pumhlûm hi mi sual thu thuin a awm.” (1 Johana 5:19) Diabola chuan mihringte chu nasa takin thunun mah se, mihring zawng zawngte chu a thunun lo.

BIBLE AṬANGIN ENG NGE KAN ZIR BELH THEIH?

• Diabola chuan mite a thunun lehzual theih nân inbumna a hmang.—2 Korinth 11:14.

• Thlarau suaksualte chuan, mite thunun theih châng an nei.—Matthaia 12:22.

• Pathian ṭanpuina nên ‘Diabola chu hlawhtling takin i dodâl’ thei.—Jakoba 4:7.