Khaikhinna Ṭangkai Ber I Siam Theihte

KRISTIAN niin i inhria em? I inhria a nih chuan, Krista zuitu nia inchhâl khawvêla mi tlûklehdingâwn hnih chuangte—mi 3 zêla 1 dâwn laite—zînga mi i ni. Tûn laiah, Kristian tia koh pâwl a sâng têlin a awm a, thurin inkalh tak tak leh ngaih dân hrang hrang an neih avângin an inṭhen a ni. Chuvângin, i thurin chu Kristian nia inchhâl dangte thurin nên chuan a inang lo hle thei a ni. Chuti chu, i thurin chu a pawimawh tak zet em? Bible zirtîr Kristianna vawn i duh chuan a pawimawh a ni.

Isua Krista hnungzui hmasate chu “Kristian” nia hriat an ni a. (Tirhkohte 11:26) Kristian rinna pakhat chauh a awm avângin, anmahni hriat hran nân hming dang an neih a ngai lo. Kristiante chuan Kristianna dintu Isua Krista zirtîrna leh kaihhruaina chu inlungrual takin an zui a ni. I lawina kohhran hi a ni ve em? I kohhran chuan Krista zirtîrna a zirtîrin, Krista hnungzui hmasate thurin ang chu a zirtîr tih i ring em? Engtin nge i hriat chian theih? Hriat theih dân kawng khat chauh a awm a, chu chu Bible hmanga teh hi a ni.

Hei hi han ngaihtuah teh: Isua Krista chuan Bible hi Pathian Thu a ni tih pawmin a zah hle a. Ani chuan mihring thurochhiahte dah pawimawh zâwka Bible zirtîrna pawlh daltute chu a lâwm lo. (Marka 7:9-13) Chuti a nih chuan, Isua hnungzuitu dik takte rinna chuan Bible a ṭanchhan ang tih kan sawi thei a ni. Chuvângin, Kristian tinte chu heti hian an inzâwt ṭheuh tûr a ni: ‘Ka kohhran zirtîrnate chu Bible zirtîrna nên a inmil em?’ tiin. Chu zawhna chhân nân, engvângin nge in kohhran zirtîrnate chu Bible zirtîrnate nên i khankhin loh vang?

Pathian kan biakna chuan Bible-a chuang thutak a ṭanchhan tûr a ni tih Isua chuan a sawi a. (Johana 4:24; 17:17) Tirhkoh Paula pawhin kan chhandamna chu ‘thutak kan hriatnaah’ a innghat tih a sawi bawk. (1 Timothea 2:4) Chuvângin, kan rinna chuan Bible thutak a ṭanchhan chu a pawimawh hle. Kan chhandamna ngei pawh hi a derthâwng si a!

BIBLE NENA KAN RINNA KHAIKHIN THEIH DAN

A hnuaia zawhna parukte chhiar a, Bible chhânnate chhinchhiah tûrin kan sâwm a che. Bible châng târ lante chu keuvin chhiar la, a chhânnate chu ngaihtuah ang che. Tichuan, heti hian inzâwt rawh: ‘Ka kohhran zirtîrnate chu Bible zirtîrna nên a inrem em?’ tiin.

He zawhnate hian khaikhinna i siam theih azawnga ṭangkai ber siam tûrin a ṭanpui ang che. I kohhran zirtîrna dangte chu Bible zirtîrna nêna khaikhin belh i duh ang em? Jehova Thuhretute chuan Bible thutak bih chiang tûra ṭanpui che an duh a. Engvângin nge Jehova Thuhretu pakhat hnênah a thlâwna Bible zirpui tûr chea i sâwm loh vang? A nih loh leh kan website, jw.org chu i tlawh thei ang. ▪ (wp16.04-E)

1 ZAWHNA: Pathian chu tu nge ni?

CHHANNA: Isua Pa, Pathian Jehova chu chatuan Pathian leh thil engkim Siamtu engkimtithei a ni.

BIBLE ZIRTIRNA:

“In tâna ṭawngṭai fovin, Pathian kan Lal Isua Krista Pa hnênah chuan lâwmthu kan hril ṭhîn.”—Kolossa 1:3-5.

“Nang, kan Lalpa leh kan Pathian, ropuina te, chawimawina te, thiltihtheihna te chu hmu tlâk i ni e; nangin engkim i siam a.”—Thu Puan 4:10-11.

Rom 10:13; 1 Timothea 1:17 en bawk rawh.

2 ZAWHNA: Isua Krista chu tu nge ni?

CHHANNA: Isua chu Pathian Fapa piang hmasa ber a ni a. Isua chu siam a ni a, chuvângin awm ṭan hun a nei. Pathian hnuaia intulûtin, a duhzâwng angin a awm.

BIBLE ZIRTIRNA:

“Pa chu keimah aiin a ropui zâwk si a.”—Johana 14:28.

“[Isua] chu hmuh theih loh Pathian anpui, thil siam zawng zawnga piang hmasa ber chu a ni.”—Kolossa 1:15.

Matthaia 26:39; 1 Korinth 15:28 en bawk rawh.

3 ZAWHNA: Thlarau thianghlim chu eng nge ni?

CHHANNA: Thlarau thianghlim chu Pathianin a duhzâwng tihpuitlin nâna a hman chakna a ni a, mi pakhat a ni lo. Mite chu thlarau thianghlimin an khat thei a, chu mi hmanga tihchak theih an ni.

BIBLE ZIRTIRNA:

“Elizabetin Mari chibai bûk chu a hriat veleh, a pum chhûnga nautê chu a che a; tin, Elizabeti chu thlarau thianghlimin a lo khat ta a.”—Luka 1:41.

“Thlarau thianghlim chu in chunga a lo thlen hunah thiltihtheihna in la nei ang.”—Tirhkohte 1:8.

Genesis 1:2; Tirhkohte 2:1-4; 10:38 en bawk rawh.

4 ZAWHNA: Pathian Ram chu eng nge ni?

CHHANNA: Pathian Ram chu vân sawrkâr a ni a. Isua chu Lalber a ni. Rei lo têah he Lalram hian lei chung zawng zawngah Pathian duhzâwng a rawn thlentîr ang.

BIBLE ZIRTIRNA:

“Vântirhkoh pasarihna chuan [a tawtawrâwt] a han hâm a, tichuan, ‘Khawvêl ram chu kan Lalpa leh a Krista ram a lo ni ta, ani chuan chatuanin ro a rêl ang,’ tiin vânah chuan aw ring takte a lo chhuak ta nghâl a.”—Thu Puan 11:15.

Daniela 2:44; Matthaia 6:9, 10 en bawk rawh.

5 ZAWHNA: Mi ṭha zawng zawng vânah an kal vek em?

CHHANNA: Kal vek lo. “Pâwl tlêmte” tia koh mi rinawm ṭhenkhat chu vâna kal tûrin Pathianin a thlang a. Anni chuan mihringte chungah lal niin Isua nên ro an rêl ang.

BIBLE ZIRTIRNA:

“Pâwl tlêmte u, hlau suh u; ram pêk che u hi in Pa lâwmzâwng tak a ni.”—Luka 12:32.

“Pathian leh Krista puithiamte an ni ang a, amah nên kum sângkhat rorêlin an awm zâwk ang.”—Thu Puan 20:6.

Thu Puan 14:1, 3 en bawk rawh.

6 ZAWHNA: Lei leh mihringte tâna Pathian duhzâwng chu eng nge ni?

CHHANNA: Pathian Ram hnuaiah lei hi paradis a lo ni ang a, mi rinawmte chuan hrisêlna ṭha famkim, remna tluantling leh chatuan nun an chên ang.

BIBLE ZIRTIRNA:

“Thuhnuairawlhte erawh chuan ram hi an luah ang a: remna chênin an hmuingîl ang.”—Sâm 37:10, 11.

“An mit ata mittui zawng zawng a hrufai ang a; thihna a awm leh thei tawh lo vang a, lungngaih te, ṭah te, nat te pawh a awm leh tawh hek lo vang; thil hmasate chu a ral ta.”—Thu Puan 21:3, 4.

Sâm 37:29; 2 Petera 3:13 en bawk rawh.