Bible Zirpuinaa Ṭha Taka Bible Hman Dân
1. Bible zirna kan kaihhruainaah engvângin nge Bible kan ṭanchhan ber ang?
1 Mite Bible kan zirpui chhan ber chu Bible zirtîrna hre thiam a, pawm bawk a, nunpui tûra ṭanpuina hmanga ‘zirtîra siam’ a ni a. (Mt. 28:19, 20; 1 Thes. 2:13) Chuvângin, zirna chuan Bible a ṭanchhan ber tûr a ni. Zirlaite hnêna Bible chângte zawn hmuh dân kawhhmuh hmasak chu a ṭangkai mai thei a. Mahse, chutiang mite thlarau lama ṭhang chho tûra ṭanpui tûrin engtin nge Bible kan hman ang?
2. Bible châng chhiar tûr leh sawiho tûrte chu engtin nge kan thlan ang?
2 Bible Châng Chhiar Tûrte Thlang Rawh: I inpuahchah hian, Bible châng târ lan tinte leh zirlai thu a inkungkaih dân hmuh tum tlat la, zirna i kaihhruai laia chhiara in sawiho tûrte chu thlang rawh. A tlângpui thuin, kan thurin ṭanchhan Bible chângte chhiar chu a ṭha ṭhîn. A ṭobul târ langtu Bible chângte chu chhiar kher a ngai lo mai thei a. Zirlai tinte mamawh leh dinhmun chu ngaihtuah tel ang che.
3. Zawhna hman a hlâwkna chu eng nge ni a, engtin nge zawhna kan hman theih?
3 Zawhna Hmang Rawh: Zirlai hnêna Bible chângte hrilhfiah ai chuan, amah chu inhrilhfiahtîr zâwk rawh. Thiam taka zawhna zâwtin i inhrilhfiahtîr thei a. Bible châng hman dân chu awlsam taka hriat theih a nih chuan, paragraph-a thu awm a thlâwp dân chu i zâwt thei a ni. Chutiang a nih loh chuan, zirlai chu thu tâwp dik siam tûra ṭanpui tûrin zawh bîk chat nei zawhna emaw, zawhna pahnih thum vêl emaw a indawta zawh a ngai thei a ni. Hrilhfiah belh a ngaih chuan, zirlaiin chhânna a pêk hnuah hrilhfiah theih a ni ang.
4. Bible châng kan chhiarte chu engtiang khawpa hrilhfiah ngai nge a nih?
4 Titluangtlam Rawh: Thal kah thiam tak chuan a tum fuh tûrin thal pakhat chauh a mamawh ṭhîn a. Chutiang bawkin, zirtîrtu thiam tak chuan a thiltum tak sawifiah nân thu tam tak a mamawh lo. Tluangtlam tak, chiang tak, leh dik takin a sawi thei a ni. A châng chuan, Bible châng hre thiam tûr leh dik taka hrilhfiah tûrin Kristian thu leh hla chhuahahte zir bingna i neih a ngai mai thei a. (2 Tim. 2:15) Mahse, lehkhabua chuang Bible châng tinte hrilhfiah chu tum suh ang che. Zirlai thu tifiah thei tûr thu pawimawhte chauh hrilhfiah zâwk ang che.
5, 6. Pathian Thu nunpui tûrin engtin nge zirlaite chu kan ṭanpui theih a; mahse, eng nge kan pumpelh ang?
5 Nunpui Dân Tûr Hrilh Rawh: Tih âwm a nih chuan, zirlai chu Bible chângte a nunpui theih dân hmu thiam tûrin ṭanpui rawh. Entîr nân, Kristian inkhâwmnaa la tel lo zirlai nêna Hebrai 10:24, 25 thu in sawi dun hunah, inkhâwm kan neih zînga pakhat chu sawipuiin, inkhâwm tûrin i sâwm thei a. Mahse, tilui suh. Jehova tihlâwm nâna thil ṭûlte a tih nân Pathian Thuin ani chu chêttîr zâwk rawh se.—Heb. 4:12.
6 Zirtîr siam tûra kan hna thawh tûr kan thawh laiin, Bible ṭha taka hmangin, ‘rinnaa thuawihna’ chu i awmtîr ang u.—Rom 16:25, 26.