Thusawi Dân Tûr Entîrnate Hman Dân Tûr
1. Thusawi dân tûr entîrna pêkte chu engtin nge kan thlîr ang?
1 Kan magazine-te leh thu leh hla chhuah dangte semchhuah huna sawi dân tûr entîrna chu Kan Lalram Rawngbâwlna-ah a lang zîng hle a. Thlawhhma rawngbâwlnaa kan tel hunah, hêng rawtnate hi a inziak ang chiah chiaha sawi chhuah a ngai lo. Kan sawi dân tûr tlângpui târ lanna mai a ni. Keimahni ir-âwm chhuak ngeia kan sawi chuan kan hlawhtling zâwk ṭhîn ang. Pângngai taka inhmêlhriattîrna chuan in neitu chu mangang lo tûrin a ṭanpui a, kan tih tak zetna leh rin tlatna a târ lang a ni.—2 Kor. 2:17; 1 Thes. 1:5.
2. Engvângin nge thusawi dân tûr kan inpuahchah laiin tualchhûng chîn dân kan ngaihtuah a ṭûl?
2 I Thusawi Dân Siamrem Rawh: Tualchhûng chîn dân chuan chanchin ṭha kan hrilh dân chu nasa takin a nghawng a. In neitu nên chibai inbûk tawnin, i thusawi tûr chu titinaah i zep tel thei nge, i bialchhûnga mite chuan i sawi tûr tak sawi nghâl chawt tûrin an beisei zâwk che? Chu chu a hmun azir leh a châng phei chuan a mihring azirin a danglam a ni. Zawhna zawh dânah pawh hriat theihna hman a ngai bawk a ni. Hmun ṭhenkhata inzawh âwm tak zawhnate pawh hi hmun dangah chuan mite tilaitu a ni thei a ni. Chuvâng chuan, thu tlûkna ṭha siamin, tualchhûnga mite pawm theih tûrin kan thusawi dân kan siamrem a ngai a ni.
3. Kan biakate pian leh mûrna leh an rilru chu engvângin nge kan ngaihtuah ang?
3 Chu bâkah, thlawhhma rawngbâwl tûra kan inpuahchah laiin, bialchhûnga mite pian leh mûrna leh an rilru kan ngaihtuah tel a ngai bawk a ni. Entîr nân, Matthaia 6:9, 10 thu Catholic ruh tak nêna i sawi dân leh ‘Lal Ṭawngṭaina’ hre ngai lo i sawipui dân chu a inang lo vang. Kan ngaihtuah lâwk deuh hlek chuan kan thusawi dân chu thlawhhma rawngbâwlnaa kan tawn mite tâna tuiawm zâwk ni tûrin kan siamrem thei a ni.—1 Kor. 9:20-23.
4. Engvângin nge inpuahchahna ṭha chu a pawimawh?
4 Thusawi dân rawtna pêkte chu a inziak ang thlapa hman kan tum hunah pawh, inpuahchahna ṭha neih a ngai tho tho. Kan târ lan tum thuziak emaw, bung emawa tuina chawk tho thei tûr thu pawimawh laite chu uluk takin kan chhiar tûr a ni a. Tichuan, kan thusawiah chûngte chu kan telh tûr a ni. Kan thu leh hla chhuaha târ lan thu ṭha takte kan hriat chian chauhvin, phûr takin kan semchhuak thei ang.
5. Engvângin nge thusawi dân dang kan inpuahchah theih a, chu chu engtin nge kan tih theih?
5 Tih Dân Dangte: Thusawi dân tur rawtnaa târ lante chauh hman kan tum em? Tum lo ve. Thusawi dân dang emaw, Bible châng dang emaw hman remchâng zâwka i hriat chuan hmang rawh. A bîk takin, magazine i sem hunah chuan i thawhna bialchhûnga mite tuizâwng riau ni thei tûr, a kâwma târ lan thuziak inzawm aṭanga lâk chhuah ni lote târ lan theihna hun remchâng zawng rawh. Rawngbâwlna Inkhâwma thlawhhma rawngbâwlnaa thusawi dân tûr lemchan entîr a ngaih hunah chuan tualchhûnga thusawi dân hlawhtling engpawh târ lang tûrin ruahmanna siam theih a ni. Hetiang kawng hian, kan zain chanchin ṭha hlawhtling taka thlen thei tûra ṭanpui kan ni thei ang.